អគ្គស្នងការដ្ឋាន នគរបាលជាតិកម្ពុជា កំពុងតែស្វែងរកចាប់ខ្លួនមេខ្លោងជនជាតិចិនតៃវ៉ាន់ និងចិនដីគោក មួយចំនួនទៀត ក្រោមបទជំរិតទារប្រាក់ឆ្លងដែនតាមប្រព័ន្ធអ៊ីនធឺណិត (Internet) ពីប្រទេសកម្ពុជា ក្រោយពេលបានរកឃើញបណ្ដាញជម្រិតទារប្រាក់ជនជាតិចិនដ៏ធំមួយ នៅប្រទេសកម្ពុជា។
ការស៊ើបអង្កេតនៅតែបន្តនោះ គឺក្រោយពេលដែលនគរបាលជាតិកម្ពុជា បានចាប់ខ្លួនជនជាតិចិនតៃវ៉ាន់ និងចិនដីគោក សរុបចំនួន ៥០នាក់ នៅក្នុងទីក្រុងភ្នំពេញ កាលពីសប្ដាហ៍កន្លងទៅនេះ ក្រោមបទជំរិតទារប្រាក់ឆ្លងដែន ជនជាតិចិនតៃវ៉ាន់ និងចិនដីគោកគ្នាឯង នៅប្រទេសកម្ពុជា។
គេបានទាក់ទងតាមប្រព័ន្ធ អ៊ីនធឺណិត ទៅគ្រួសាររបស់ជនរងគ្រោះ នៅប្រទេសចិន និងកោះតៃវ៉ាន់ ឲ្យផ្ញើប្រាក់មកចូលធនាគាររបស់គេជាថ្នូរនឹងការដោះលែងវិញ។
ជនសង្ស័យទាំង ៥០នាក់ នោះ មានជនជាតិចិនតៃវ៉ាន់ ចំនួន ៥នាក់ និងជនជាតិចិនដីគោក ចំនួន ៤៥នាក់។
រដ្ឋមន្ត្រី ក្រសួងមហាផ្ទៃ លោក ស ខេង បានដាក់ឈ្មោះអ្នកទាំងនោះ ក្នុងបញ្ជីខ្មៅរបស់ក្រសួងមហាផ្ទៃ ហាមមិនឲ្យចូលក្នុងប្រទេសកម្ពុជាទៀតឡើយ។ ការបណ្ដេញចេញជាបន្ទាន់នោះ គឺផ្អែកច្បាប់អន្តោប្រវេសន៍កម្ពុជា។
អគ្គស្នងការរងនគរបាលជាតិកម្ពុជា លោក ឧត្តមសេនីយ៍ឯក សុខ ផល បានមានប្រសាសន៍នៅថ្ងៃទី៣០ ខែឧសភា ឆ្នាំ២០១២ ថា សមត្ថកិច្ចកម្ពុជា នៅមិនទាន់បិទសំណុំរឿងឧក្រិដ្ឋកម្មឆ្លងដែននេះនៅឡើយទេ៖ «បទល្មើសបានប្រព្រឹត្តនៅប្រទេសកម្ពុជាយើងអញ្ចឹងមែន ប៉ុន្តែជនរងគ្រោះ នៅប្រទេសចិនដីគោក និងកោះតៃវ៉ាន់...សូមបញ្ជាក់ជូនដែរ ដោយសារតែសំណូមពររបស់ប្រទេសចិន បញ្ជូនទៅប្រទេសចិន ចិនគាត់រំលែកទៅតាមគាត់វិញ»។
ទាក់ទងនឹងការចាប់បញ្ជូនជនជាតិ ចិនតៃវ៉ាន់ និងចិនដីគោកនោះ មេធាវី លោក សុខ សំអឿន ជាប្រធានប្រតិបត្តិ នៃអង្គការក្រុមអ្នកច្បាប់ការពារសិទ្ធិកម្ពុជា បានមានប្រសាសន៍ថា ក្រុមឧក្រិដ្ឋជនទាំងនោះ ងាយប្រព្រឹត្តិអំពើឧក្រិដ្ឋកម្មលួចលាក់ នៅកម្ពុជាក្រោមលេសថា ជាអ្នកទេសចរ៖ «បើសិនជាយើងកាត់ក្តីដោយខ្លួនឯង ជួនកាលវាអស់លុយអស់កាក់ថវិកា ពាក់ព័ន្ធសាក្សី ឬសាក្សីផ្សេងៗណា។ ទី២ បើយើងធ្វើតាមបត្យាប័ន សាមីខ្លួនតុលាការរបស់គេកាត់ក្តីទៅ ជារឿងល្អម្យ៉ាងដែរ មិនសូវខាតបង់ថវិកា។ ជួនកាលគេមិនសូវទុកចិត្តប្រព័ន្ធតុលាការយើង ឬក៏គេយល់ថា នៅតុលាការគេមានយុត្តិធម៌ជាងអីជាដើម»។
លោក ឧត្តមសេនីយ៍ឯក សុខ ផល បានបញ្ជាក់ថា ប្រទេសកម្ពុជាមិនមែនជាប្រទេសតែមួយទេនៅតំបន់អាស៊ាន ដែលជនជាតិចិនតៃវ៉ាន់ និងចិនដីគោក បានមកប្រព្រឹត្តិបទល្មើសជំរិតទារប្រាក់តាមប្រព័ន្ធអ៊ីនធឺណិតនោះ។ ពួកនោះក៏ធ្វើសកម្មភាពនៅប្រទេសដទៃទៀតដូចជា ឥណ្ឌូណេស៊ី (Indonesia) ម៉ាឡេស៊ី (Malaysia) ថៃ (Thailand) និង វៀតណាម (Vietnam) ជាដើម។
គេបានកត់សំគាល់ថា ការបង្ក្រាប និងចាប់ខ្លួនជនជាតិចិនតៃវ៉ាន់ នៅចុងសប្ដាហ៍កន្លងទៅនេះ គឺការបង្ក្រាបទ្រង់ទ្រាយធំលើកទី២ហើយ នៅឆ្នាំ២០១១ និងឆ្នាំ២០១២ ក្រោយពីនគរបាលជាតិកម្ពុជាបានឆ្មក់បង្ក្រាបលើកដំបូងព្រមៗគ្នា នៅខែមិថុនា ឆ្នាំ២០១១ កន្លងទៅនេះនៅរាជធានីភ្នំពេញ នៅខេត្តព្រះសីហនុ និងនៅខេត្តស្វាយរៀង ដោយសហការជាមួយ នគរបាល នៃក្រសួងសន្តិសុខប្រទេសចិន។
ជាលទ្ធផល ពេលនោះនគរបាលជាតិកម្ពុជា និងនគរបាលក្រសួងសន្តិសុខប្រទេសចិននោះ បានចាប់ខ្លួនជនជាតិចិនដីគោក និងជនជាតិចិនតៃវ៉ាន់ សរុបចំនួន ១៨៧នាក់ ក្រោមបទជំរិតទារប្រាក់ឆ្លងដែន និងបានបញ្ជូនទៅប្រទេសចិនវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។