នៅថ្ងៃប្រកាសសាលក្រមនៃមេការរោងចក្រកាត់ដេរ ថប វឺល នេះដែរ កម្មករនៃរោងចក្រចំនួនពីរដែលមានកម្មករជាង ៤ពាន់នាក់ ធ្វើបាតុកម្មប្រឆាំងមេការរបស់ខ្លួនហើយ ទាមទារឲ្យមេការនោះដើរដង្ហែជាក្បួនចំពោះសាធារណជន ដើម្បីសុំខមាទោសចំពោះព្រះឆាយាល័ក្ខណ៍នៃអតីតព្រះមហាក្សត្រ នៅមុខព្រះបរមរាជវាំង។
ចៅក្រមសាលាដំបូងរាជធានីភ្នំពេញ ប្រកាសសាលក្រមកាត់ទោសអ្នកស្រី វ៉ាង សៀវជីវ មេការជនជាតិចិន នៃរោងចក្រ ថប វឺល នៅថ្ងៃទី២៣ តុលា ដោយកាត់ទោសឲ្យជាប់ពន្ធនាគារ ១ឆ្នាំ ពីបទធ្វើឲ្យខូចខាតដោយចេតនា។ ប៉ុន្តែទោសនេះត្រូវព្យួរ ក្រៅពីនេះសាលក្រមក៏បានតម្រូវឲ្យមេការចិន រូបនេះ បង់ប្រាក់ចំនួន ២,៥លានរៀល និងបណ្ដេញចេញពីប្រទេសកម្ពុជា។ ដោយឡែករឿងរ៉ាវទាក់ទងនឹងរដ្ឋប្បវេណីវិញ ចៅក្រម លោក សេង នាង បានឲ្យអ្នកស្រី វ៉ាង សៀវជីវ ចរចាពីសំណងជំងឺចិត្តជាមួយកម្មករ គឺអ្នកស្រី ស៊ាង សេងលី ជាដើមបណ្ដឹង។
នៅពេលបើកសវនាការមុនប្រកាសសាលក្រម អ្នកស្រី ស៊ាង សេងលី បានទាមទារឲ្យមេការរូបនេះសង់ជំងឺចិត្តនូវទឹកប្រាក់ចំនួន ៦លានរៀល។ ប៉ុន្តែក្រោយការសម្របសម្រួលពីសំណាក់ចៅក្រម ដោយសុំឲ្យភាគីដើមចោទធ្វើការពិចារណាឡើងវិញ នូវការទាមទាររបស់ខ្លួន អ្នកស្រី ស៊ាង សេងលី បានទាមទារសំណងជំងឺចិត្តចំនួន ២លានរៀលវិញ។
រោងចក្រ ថប វឺល ស្ថិតនៅភូមិជ្រោយអំពិល សង្កាត់ក្បាលកោះ ខណ្ឌមានជ័យ រាជធានីភ្នំពេញ។
នៅថ្ងៃទី២៣ តុលា នោះដែរ កម្មកររោងចក្រ ស៊ុន ឡុង ហ្គាមិន (Sunn Lung Garment) ស្ថិតនៅភូមិដំណាក់៣ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ មានចំនួនប្រហែល ៧០០នាក់ ធ្វើបាតុកម្មប្រឆាំងនឹងមេការជនជាតិចិនរបស់ខ្លួន ហើយកម្មករទាំងនោះបានឲ្យស្ត្រីមេការរូបនេះកាន់ព្រះឆាយាល័ក្ខណ៍នៃអតីតព្រះមហាក្សត្រដើរដង្ហែពីរោងចក្រ ដែលមានចម្ងាយប្រហែល ១០គីឡូម៉ែត្រ ឆ្ពោះទៅកាន់ព្រះបរមរាជវាំង ដើម្បីសុំខមាទោសចំពោះព្រះបរមសពនៃព្រះករុណាព្រះបាទសម្ដេចព្រះ នរោត្តម សីហនុ។ ព្រឹត្តិការណ៍នេះកើតឡើងបន្ទាប់ពីស្ត្រីមេការដែលមិនប្រាប់ឈ្មោះរូបនេះ បានយករូបថតនៃដួងព្រះចន្ទ្ររបស់កម្មករ ទៅហែកចោល។
កាលពីថ្ងៃទី២១ តុលា ដែលត្រូវនឹងថ្ងៃ ៦កើត ខែអស្សុជ ឆ្នាំរោង ចត្វាស័ក ពលរដ្ឋជាច្រើនបានភ្ញាក់ផ្អើលនាំគ្នាទៅមើលដួងព្រះចន្ទ្រ ដែលមានពពកបាំងមួយចំហៀង ហើយថារូបនោះស្រដៀងនឹងព្រះភក្ត្រនៃអតីតព្រះមហាក្សត្រ។ ជាមួយគ្នានេះ រូបព្រះខែនោះត្រូវគេថតយកមកលក់ឲ្យពលរដ្ឋ។
កម្មការិនីឈ្មោះ ពេជ្រ សាខន ឲ្យដឹងថា អ្នកស្រីខកចិត្តយ៉ាងខ្លាំងនៅពេលអ្នកស្រីឃើញមេការរបស់អ្នកស្រីហែករូបនោះ។
ទោះយ៉ាងណារឿងរ៉ាវនេះបានស្ងប់ស្ងាត់ទៅវិញ បន្ទាប់មេការរូបនោះបានទៅដល់មុខព្រះបរមរាជវាំង ថ្វាយបង្គំសុំខមាទោសចំពោះព្រះបរមសពនៃអតីតព្រះមហាក្សត្រ។
ស្របគ្នានេះនៅឯខេត្តកណ្ដាល ឯណោះវិញ កម្មកររោងចក្រ ញូអាឃីត ស្ថិតនៅភូមិត្រពាំង ឃុំពើក ស្រុកអង្គស្នួល ប្រមាណជាង ៣ពាន់នាក់ ក៏បាននាំគ្នាធ្វើបាតុកម្មតវ៉ាចំពោះមេការរបស់ពួកគាត់ដែរ ដោយសារមេការឈ្មោះ ស៊ែង រូបនោះបានយករូបព្រះចន្ទ្ររបស់កម្មករដែលគេថតបានយកទៅហែកចោល។
អធិការរងស្រុកអង្គស្នួល ទទួលបន្ទុកការងារសន្តិសុខ លោក រ៉េត ជា ឲ្យដឹងថា បន្ទាប់ពីសមត្ថកិច្ចបានចូលសម្របសម្រួល និងយកអ្នកស្រី ស៊ែង ដល់អធិការស្រុក និងរៀបចំឲ្យស្រ្តីរូបនោះ ថ្វាយបង្គំព្រះឆាយាល័ក្ខណ៍ ដែលគេដាក់តាំងនៅមុខសាលាស្រុក ទើបកម្មករទាំងនោះបានរំសាយការខឹងក្រោធរបស់ពួកគាត់។
ទាក់ទងនឹងការប្រតិកម្មរបស់កម្មករដែលបានកើតឡើងចំនួនបីករណីនៅថ្ងៃបន្ទាប់ៗ គ្នានេះ ត្រូវគេជឿថា ឥទ្ធិពល និងប្រជាប្រិយភាពនៃព្រះមហាក្សត្រ ហាក់មិនបានថមថយនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។