គ្រូប្រដៅសាសនាគ្រិស្ត៖ ឌុច ជាមនុស្សល្អនិងស្មោះត្រង់
ដោយ ឡេង ម៉ាលី
2009-09-16
គ្រូប្រដៅសាសនាព្រះយេស៊ូគ្រិស្តមួយរូប និយាយប្រាប់សាលាក្តីខ្មែរក្រហមថា ជនជាប់ចោទ កាំង ហ្កេកអ៊ាវ ហៅ ឌុច អតីតប្រធានគុកទួលស្លែង គឺជាមនុស្សឈ្មោះ ហង់ ពិន ដែលល្អរួសរាយនិងស្មោះត្រង់ចំពោះព្រះដែលលោកធ្លាប់ស្គាល់។
ឌុច បង្ហាញខ្លួនក្នុងសវនាការថ្ងៃទី ៣០ ខែមីនា ២០០៩ នៅសាលាក្ដីខ្មែរក្រហមក្នុងទីក្រុងភ្នំពេញ។
ការថ្លែងនេះបានធ្វើឡើងដោយសាក្សីមួយរូបឈ្មោះលោក គ្រីស្តូហ័្វរ ឡាប៉ែល (Christopher LaPel) កាលពីថ្ងៃអង្គារ ទី១៥ ខែកញ្ញា ឆ្នាំ២០០៩ នៅក្នុងអង្គសវនាការរបស់សាលាក្តីខ្មែរក្រហម នៅពេលដែលផ្តល់សក្ខីកម្មអំពីអត្តចរិតរបស់ជនជាប់ចោទ កាំង ហ្កេកអ៊ាវ ហៅ ឌុច ៖ «ខ្ញុំមិនដឹងថា គាត់បានប្រព្រឹត្តអ្វីខ្លះនៅអតីតកាលនោះទេ ប៉ុន្តែនៅពេលដែលគាត់ចូលរួមគោរពទៅលើព្រះ ខ្ញុំសង្កេតឃើញថា គាត់ជាមនុស្សមួយរូបដែលមានសីលធម៌ ហើយគោរពទៅលើព្រះ ហើយគាត់មានសន្តិភាពនិងមានភាពរីករាយនៅក្នុងចិត្ត ចំពោះអ្វីដែលគាត់បានគោរពទៅលើព្រះ ហើយរស់នៅជាមួយព្រះ។ គាត់ជាបុរសល្អមួយរូប»។
លោក គ្រីស្តូហ្វ័រ ឡាប៉ែល បច្ចុប្បន្ន អាយុ ៥១ឆ្នាំ កាន់សញ្ជាតិអាមេរិកាំង-ខ្មែរ បញ្ជាក់ជូនអង្គសវនាការថា លោកជាគ្រូប្រដៅសាសនាព្រះគ្រិស្តមួយរូបរបស់ កាំង ហ្កេកអ៊ាវ ហៅ ឌុច កាលពីពាក់កណ្តាលទសវត្សរ៍ឆ្នាំ១៩៩០ ៖ «ខ្ញុំជាគ្រូបង្រៀនរបស់គាត់ តាំងពីពេលដែលខ្ញុំជួបគាត់ នៅក្នុងឆ្នាំ១៩៩៥មក។ គាត់នៅពេលនោះក្លាយទៅជាអ្នកគោរពសាសនារបស់យើងខ្ញុំ ហើយបន្ទាប់មកខ្ញុំប្រាព្ធពិធីជ្រមុជទឹកជូនគាត់ នៅក្នុងខែមករា ថ្ងៃទី៦ ឆ្នាំ១៩៩៦»។
លោក គ្រីស្តូហ្វ័រ ឡាប៉ែល ថ្លែងទៀតថា ឪពុកម្តាយនិងប្អូនរបស់លោកបានស្លាប់នៅក្នុងរបបខ្មែរក្រហម ហើយមិត្តភក្តិរបស់លោកត្រូវបានសម្លាប់នៅគុកទួលស្លែងក្នុងរបបនេះដែរ។ នៅពេលសួរថា តើលោកអាចអត់ឱនឲ្យ ឌុច ដែរឬទេ លោក គ្រីស្តូហ្វ័រ ឡាប៉ែល ថ្លែងថា លោកស្អប់អំពើបាប ប៉ុន្តែលោកមិនស្អប់អ្នកប្រព្រឹត្តអំពើបាបទេ។ លោកអាចអត់ឱនឲ្យបាន។
នៅក្នុងការសន្និដ្ឋានតបសក្ខីកម្មរបស់លោក គ្រីស្តូហ័្វរ ឡាប៉ែល ជនជាប់ចោទ ឌុច មិនបានតវ៉ាអ្វីទេ ដោយគ្រាន់តែថ្លែងអំណរគុណចំពោះព្រះយេស៊ូគ្រិស្ត ជាម្ចាស់ប៉ុណ្ណោះ។
ឌុច ថ្លែងយ៉ាងដូច្នេះ ៖ «ខ្ញុំសូមអរគុណព្រះជាម្ចាស់ដែលប្រទានពរឲ្យខ្ញុំបានជួបលោកគ្រូ គ្រីស្តូហ្វ័រ ឡាប៉ែល ដែលជាគ្រូរបស់ខ្ញុំ ឯចំណែកជំនឿរបស់ខ្ញុំចំពោះព្រះជាម្ចាស់យ៉ាងម៉េច ខ្ញុំនឹងដាក់ខ្លួនជូនអង្គជំនុំជម្រះ សួរបញ្ជាក់ខ្ញុំថែមទៀតនៅពេលណាដែលអង្គជំនុំជម្រះលោកត្រូវការ។ សូមអរព្រះគុណព្រះជាម្ចាស់»។
លោក គ្រីស្តូហ្វ័រ ឡាប៉ែល ថ្លែងថា ក្រោយការបែកគ្នា លោកមានឱកាសបានជួប ឌុច នៅពន្ធនាគារសាលាក្តីខ្មែរក្រហមទៀត ដើម្បីរៀបចំពិធីគោរពសាសនា។ លោកបន្តថា ជនជាប់ចោទ ឌុច បានសម្តែងនូវការសោកស្តាយចំពោះអ្វី ដែលគាត់បានធ្វើកន្លងមក។
ជនរងគ្រោះនៅគុកទួលស្លែងមួយរូប គឺលោក ជុំ ម៉ី បានថ្លែងថា ជនជាប់ចោទ ឌុច មិនមែនជាមនុស្សស្លូតទេ ព្រោះជនជាប់ចោទរូបនេះ បានបញ្ជាឲ្យសម្លាប់មនុស្សជាងមួយម៉ឺននាក់ក្នុងឋានៈជាប្រធានគុកទួលស្លែងពីឆ្នាំ១៩៧៥ ដល់១៩៧៩៕
អត្ថបទដែលទាក់ទង
- រឿងក្ដីឌុចជិតដល់ទីបញ្ចប់ខណៈជនរងគ្រោះឃើញពន្លឺយុត្តិធម៌តិចនៅឡើយ
- ឌុចព្រួយបារម្ភចំពោះការប្រឈមមុខនឹងការកាត់សេចក្ដីចុងក្រោយ
- សង្គមស៊ីវិលផ្សព្វផ្សាយការយល់ដឹងពីសាលាក្ដីខ្មែរក្រហមនៅស្វាយរៀង
- មន្រ្តីនៃសាលាក្ដីខ្មែរក្រហមអំពាវនាវឲ្យជនរងគ្រោះដាក់ពាក្យបណ្ដឹងឲ្យបានឆាប់
- គ្រូបងៀននិងសិស្សជួបគ្នាស្វែងយល់ពីដំណើរការកាត់ក្តីអតីតមេខ្មែរក្រហម
