គណៈរដ្ឋមន្ត្រី​អនុម័ត​សេចក្ដី​ព្រាង​វិសោធនកម្ម​ច្បាប់​សហ​លក្ខន្តិកៈ​មន្ត្រី​រាជការ

រដ្ឋាភិបាល​កម្ពុជា សម្រេច​អនុម័ត​សេចក្ដី​ព្រាង​ច្បាប់​ស្ដីពី​វិសោធនកម្ម​មាត្រា​ទី​៩ និង ទី​១០ នៃ​ច្បាប់​ស្ដីពី​សហ​លក្ខន្តិកៈ​មន្ត្រី​រាជការ​ស៊ីវិល​នៃ​ព្រះរាជាណាចក្រ​កម្ពុជា មាត្រា​ថ្មី​នៃ​ច្បាប់​ដែល​កើត​ចេញ​ពី​ការ​ធ្វើ​វិសោធនកម្ម​នេះ បាន​បរិយាយ​ឲ្យ​កាន់​តែ​ច្បាស់ និង​បង្កើត​ច្បាប់​បន្ថែម​ស្ដីពី​អត្ថប្រយោជន៍​មន្ត្រី​រាជការ​ស៊ីវិល។
ដោយ វណ្ណ វិចារ
2013-01-05
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ផៃ ស៊ីផាន ៣០៥
អ្នក​នាំ​ពាក្យ​ទីស្ដីការ​គណៈរដ្ឋមន្ត្រី និង​ជា​អនុ​ប្រធាន​នៃ​ក្រុម​ការងារ​អន្តរ​ក្រសួង លោក ផៃ ស៊ីផាន ផ្ដល់​បទសម្ភាសន៍​ដល់​អ្នក​កាសែត នា​រាជធានី​ភ្នំពេញ កាល​ពី​ថ្ងៃ​ទី​១៤ ខែ​កក្កដា ឆ្នាំ​២០១១។
RFA/Sok Serey

មន្ត្រី​ជាន់​ខ្ពស់​ទីស្ដីការ​គណៈរដ្ឋមន្ត្រី​ពន្យល់​ថា ការ​អនុម័ត​សេចក្ដី​ព្រាង​ច្បាប់​នេះ​ជា​ជំហាន​ថ្មី​មួយ​ទៀត ដែល​នាំ​កម្ពុជា ទៅ​កាន់​នីតិរដ្ឋ ហើយ​ទៅ​ថ្ងៃ​អនាគត​កម្ពុជា ធ្វើ​អ្វី​ក៏​ដោយ ត្រូវ​ស្ថិត​នៅ​ក្រោម​ច្បាប់ មិន​មែន​ធ្វើ​អ្វី​តាម​តែ​នឹក​ឃើញ​នោះ​ទេ។

មន្ត្រី​អ្នក​នាំ​ពាក្យ​ទីស្ដីការ​គណៈរដ្ឋមន្ត្រី និង​ជា​រដ្ឋ​លេខាធិការ លោក ផៃ ស៊ីផាន មាន​ប្រសាសន៍​ថា សេចក្ដី​ព្រាង​ច្បាប់​ស្ដីពី​វិសោធនកម្ម​មាត្រា​ទី​៩ និង​ទី​១០ នៃ​ច្បាប់​ស្ដីពី​សហ​លក្ខន្តិកៈ​មន្ត្រី​រាជការ​ស៊ីវិល ធ្វើ​ឡើង​ក្នុង​គោលបំណង​ត្រួសត្រាយ​ផ្លូវ​នាំ​ឲ្យ​មាន​ការ​គោរព​ច្បាប់​ជា​ធំ។

លោក​បន្ត​ថា តាម​ច្បាប់​ចាស់ ការ​ផ្ដល់​ការ​សុំ​ច្បាប់​សម្រាក  ប្រាក់​ផ្សេងៗ ក្រៅ​ពី​ប្រាក់ខែ​ជូន​ទៅ​មន្ត្រី​រាជការ​ស៊ីវិល ធ្វើ​ឡើង​តាម​ច្បាប់​ដោយ​ឡែក ប៉ុន្តែ​មិន​មាន​ច្បាប់​ណា​មួយ​និយាយ​ច្បាស់​ពី​រឿង​នេះ​នៅ​ឡើយ។ ទោះ​ជា​យ៉ាង​ណា បន្ទាប់​ពី​សេចក្ដី​ព្រាង​ថ្មី​នេះ​សម្រេច រាល់​ចំណាយ​ទាំង​នោះ​នឹង​ត្រូវ​ចែង​ច្បាស់​ដោយ​ព្រះរាជក្រឹត្យ ឬ​អនុក្រឹត្យ។

លោក ផៃ ស៊ីផាន៖ «ត្រូវ​តែ​មាន​របប​មួយ​ដែល​ចេញ​ដោយ​ព្រះរាជក្រឹត្យ និង​អនុក្រឹត្យ។ កាល​មុន​អត់​ច្បាស់ ឥឡូវ​គេ​ដាក់​ឲ្យ​ច្បាស់ មាន​ន័យ​ថា នីតិរដ្ឋ​ត្រូវ​ធ្វើ​អ្វីៗ​ឲ្យ​មាន​ច្បាប់ មិន​មែន​ធ្វើ​តាម​ការ​យល់​ឃើញ​ណា​មួយ​ឡើយ គឺ​យើង​ពង្រឹង​នីតិរដ្ឋ និង​ការ​ផ្ដល់​សេវាកម្ម​ទៅ​តាម​ព្រះរាជក្រឹត្យ និង​អនុក្រឹត្យ»

លោក ផៃ ស៊ីផាន បន្ត​ថា ច្បាប់​នេះ​ក៏​ធ្វើ​ឡើង​ដើម្បី​ឲ្យ​មាន​ការ​គ្រប់គ្រង​មន្ត្រី​រាជការ​ស៊ីវិល​ឲ្យ​មាន​ភាព​រលូន​ទៀត​ផង។

ទោះ​យ៉ាង​ណា​ក៏ដោយ មន្ត្រី​អ្នក​នាំ​ពាក្យ​គណបក្ស សម រង្ស៉ី លោក យឹម សុវណ្ណ ឲ្យ​ដឹង​ថា លោក​មិន​ទាន់​បាន​ទទួល​សេចក្ដី​ព្រាង​ច្បាប់​នេះ​នៅ​ឡើយ​ទេ ប៉ុន្តែ​លោក​យល់​ថា ការ​ធ្វើ​វិសោធនកម្ម​ច្បាប់ ឬ​បង្កើត​ច្បាប់​ថ្មី​ណា​មួយ​ត្រូវ​ធ្វើ​ឡើង​ដើម្បី​ធានា​ឲ្យ​ផល​ប្រយោជន៍​សង្គម​ទាំង​មូល និង​ប្រសើរ​ជាង​ច្បាប់​ចាស់ មិន​មែន​អនុម័ត​ច្បាប់​ដើម្បី​កេង​ប្រយោជន៍​ឲ្យ​បក្សពួក​ខ្លួន​មួយ​ក្រុម​នោះ​ទេ។

លោក​បន្ត​ថា មន្ត្រី​រាជការ​ស៊ីវិល​បច្ចុប្បន្ន មាន​ប្រាក់ខែ​ចាយ​មិន​គ្រប់ ដូច​នេះ​ការ​ដោះ​ស្រាយ​ជីវភាព​ជូន​ពួក​គាត់​ជា​កត្តា​សំខាន់ និង​ចម្បង​ជាង​គេ​បង្អស់។

លោក យឹម សុវណ្ណ បញ្ជាក់​ថា មក​ពី​ប្រាក់​ខែ​ចាយ​មិន​គ្រប់​ទើប  មន្ត្រី​រាជការ​ទាំង​នោះ​ប្រព្រឹត្ត​អំពើ​ពុករលួយ ដើម្បី​រស់ និង​មិន​គោរព​ច្បាប់ នាំ​ឲ្យ​អ្នក​រង​ទុក្ខ​គឺ​ពលរដ្ឋ​ក្រីក្រ៖ «អនុម័ត​ច្បាប់​អី​ក៏​អនុម័ត​ទៅ ធ្វើ​ឲ្យ​ដើម្បី​ធានា​ឲ្យ​គាត់​បាន​ប្រាក់​ខែ​យ៉ាង​តិច ១​លាន​រៀន ឬ ២៥០​ដុល្លារ សម្រាប់​ការ​រស់​នៅ​របស់​គាត់។ អា​នេះ​ជា​គោល​បំណង​ធំ​បំផុត​របស់​យើង កុំ​ពេល​ខ្លះ​គ្រាន់​តែ​ធ្វើ​ទៅ​ដើម្បី​ឲ្យ​ល្អ​មើល ដល់​អា​ធាតុ​ពិត​ផលប្រយោជន៍​ពិត​របស់​គាត់​ត្រឹម​សាមសែ​សិប​ដុល្លារ​ហ្នឹង»

ក្រៅ​ពី​ការ​ធ្វើ​វិសោធនកម្ម​ច្បាប់​នេះ កិច្ច​ប្រជុំ​គណៈរដ្ឋមន្ត្រី​នៅ​ថ្ងៃ​ទី​៤ មករា ក៏​បាន​អនុម័ត​សេចក្ដី​ព្រាង​ព្រះ​រាជក្រឹត្យ ស្ដីពី​ការ​ផ្ដល់​ឋានៈ​សាស្ត្រាចារ្យ សេចក្ដី​ព្រាង​អនុក្រឹត្យ​ស្ដីពី​ក្រមសីលធម៌​ពេទ្យ​ឆ្មប និង​បញ្ហា​ផ្សេងៗ​មួយ​ចំនួន​ទៀត។

ច្បាប់​ស្ដីពី​សហ​លក្ខន្តិកៈ​មន្ត្រី​រាជការ ស៊ីវិល​ចែង​មាត្រា​ទី​៩ ចែង​ថា របប​ស្ដីពី​ការ​សុំ​ច្បាប់ និង​ការ​ឈប់​សម្រាក​ប្រចាំ​ឆ្នាំ ប្រាក់​បំណាច់​បេសកកម្ម  ប្រាក់​បំណាច់​ព្យាបាល​រោគ​ក្នុង​មន្ទីរពេទ្យ និង​ប្រាក់​សោធន​និវត្តន៍ ត្រូវ​កំណត់​ដោយ​ច្បាប់​ដោយ​ឡែក។ មាត្រា​ទី​១០ ចែង​ថា បៀវត្សរ៍ និង​ប្រាក់​បន្ទាប់​បន្សំ ប្រាក់​តំបន់ និង​ប្រាក​ឧបត្ថម្ភ​ផ្សេងៗ ត្រូវ​កំណត់​ដោយ​ច្បាប់​ដោយ​ឡែក​បាន​ន័យ​ថា មិន​ទាន់​មាន​ច្បាប់​កំណត់​ច្បាស់លាស់​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

Chan

ពី Nagoya

It is ridiculous to hear that the government is trying to promote the rule of law in Cambodia, while ordinary citizens are still the victims of the law. If you are all sitting on the laws, using the laws to intimidate people, how can you promote the rule of law? The civil servants' salaries are really low in Cambodia compared to other countries.

Jan 06, 2013 11:57 PM

អ្នក​អាន​អនាមិក

ពី oregon

you shoul have this chapter of law in 80'. now 30 year pass. you made this law for the election only.

Jan 06, 2013 10:56 AM

KODAK

ពី P.PENH

សំណូមពរបស់ខ្ញុំសូមអោយរដ្ឋាភិបាលថាហើយ
សូមអនុវត្តន៍​កុំនិយាយហើយធ្វើមិនដឹងុ៕

Jan 06, 2013 05:38 AM