មន្ត្រីក្រសួងធម្មការជាង២០០នាក់មិនបានបើកប្រាក់ខែ២ខែហើយ
zr.mp3
មន្ត្រីមួយរូបក្នុងលក្ខខណ្ឌសុំមិនបញ្ចេញឈ្មោះ បានឲ្យដឹងនៅថ្ងៃទី៥ សីហា ថា មន្ត្រីនៅក្នុងក្រសួងធម្មការ និងកិច្ចការសាសនាទាំងអស់ មានជាង ២០០នាក់ ក្នុងនោះគិតចាប់ពីថ្នាក់រដ្ឋលេខាធិការដល់មន្ត្រីការិយាល័យថ្នាក់ក្រោម មិនទាន់បានបើកប្រាក់ខែនៅឡើយ គឺនៅប្រាក់ខែសម្រាប់ខែមិថុនា និងខែកក្កដា។
លោកបញ្ជាក់ថា មន្ត្រីនៅក្នុងក្រសួងមួយចំនួនសង្ស័យថា ខាងមន្ត្រីហិរញ្ញវត្ថុយកលុយប្រាក់ខែពួកគាត់ទៅចងការឲ្យគេ ដើម្បីជាប្រយោជន៍ផ្ទាល់ខ្លួន៖ «មន្ត្រីរាជការនៅក្នុងក្រសួងហ្នឹងវាមានច្រើន អ្នកដែលខ្វះខាត ដូច្នេះវាធ្វើឲ្យប៉ះពាល់ដល់ការចំណាយ កូនរៀនសូត្រ និងការធ្វើដំណើរ»។
មន្ត្រីមួយរូបទៀត បានអះអាងថា ក្រៅពីបើកប្រាក់ខែយឺត ក៏មានករណីកាត់ប្រាក់ខែដែរកន្លងមក។ មន្រ្តី រួបនោះបញ្ជាក់ថា អគ្គនាយិកាទទួលបានរដ្ឋបាល និងហិរញ្ញវត្ថុនៃក្រសួងធម្មការ និងកិច្ចការសាសនា គឺអ្នកស្រី កែវ សុធារី បានកាត់ប្រាក់ខែមន្ត្រីទីប្រឹក្សាក្រសួងម្នាក់ចំនួន ៤ម៉ឺនរៀលក្នុងមួយខែ ដែលគេកាត់រៀងរាល់ខែ តាំងពីខែមេសា ឆ្នាំ២០១២មក។
លោកបញ្ជាក់ទៀតថា អ្នកស្រីអគ្គនាយិកាបានប្រាប់ថា គាត់កាត់ប្រាក់ខែទីប្រឹក្សាក្រសួងម្នាក់ ៤ម៉ឺនរៀលនេះ ដើម្បីយកលុយជួយគណបក្សចុះមូលដ្ឋាន៖ «វាប៉ះពាល់ដល់មន្ត្រីរាជការតូចតាចដែលគ្នាមានប្រាក់ខែតិចហើយបើកយឺតទៀត។ ខ្ញុំចង់ថា ទោះបីប្រាក់ខែតិចក៏ដោយ ប៉ុន្តែសុំឲ្យបើកទៀងពេល»។
អគ្គនាយិកាទទួលបន្ទុករដ្ឋបាល និងហិរញ្ញវត្ថុនៃក្រសួងធម្មការនិងកិច្ចការសាសនា អ្នកស្រី កែវ សុធារី បានបំភ្លឺថា បញ្ហាបើកប្រាក់ខែយឺតនេះ ដោយសារតែបញ្ហាបច្ចេកទេស ប៉ុន្តែអ្នកស្រីមិនបានបញ្ជាក់លំអិតទេអំពីបញ្ហាបច្ចេកទេសនោះ។
អ្នកស្រីឲ្យដឹងទៀតថា គាត់នឹងបើកប្រាក់ខែជូនមន្រ្តីទាំងអស់នៅថ្ងៃច័ន្ទ ទី៦ កក្កដា៖ «ដល់ពេលខែ៨នេះបានប្រាក់ខែមុនគេហើយ។ វាទាក់ទងនឹងរឿងបច្ចេកទេសបន្តិច។ ថ្ងៃច័ន្ទ (៥ សីហា) នេះ នឹងបើកឲ្យខែ៦ ហើយពីរបីថ្ងៃទៀតយ៉ាងយូរ នឹងបើកឲ្យខែ ៧ទៀត»។
ប្រាក់បៀវត្សរបស់មន្ត្រីនៅក្រសួងធម្មការ និងកិច្ចការសាសនា ចំពោះរដ្ឋលេខាធិការមានប្រាក់ខែជាង ១លានរៀល មន្ត្រីថ្នាក់កណ្ដាលមាន ៩០ម៉ឺនរៀល និងមន្ត្រីមានឋានៈទាបជាងមានប្រាក់ខែជាង ២០ម៉ឺនរៀលក្នុងមួយខែ។
អគ្គនាយិកាទទួលបន្ទុករដ្ឋបាល និងហិរញ្ញវត្ថុនៃក្រសួងធម្មការដដែល បានអះអាងថា ការបើកប្រាក់ខែយឺតនេះ សម្រាប់តែនៅក្រសួងទេ ប៉ុន្តែចំពោះមន្ត្រីបំរើការងារនៅតាមមន្ទីរធម្មការនៅតាមបណ្ដាខែត្រនានាទូទាំងប្រទេស ពួកគាត់បើកបានធម្មតាជារៀងរាល់ខែ មិនមានបញ្ហាអ្វីទេ។
ទោះបីជាយ៉ាងនេះក្ដី មន្ត្រីនៃក្រសួងធម្មការបានលើកឡើងថា ការបើកប្រាក់ខែយឺតយ៉ាវជូនពួកគាត់នេះ ធ្វើឲ្យប៉ះពាល់ដល់ជីវភាពពួកគាត់ ពិសេសមន្ត្រីថ្នាក់មធ្យម និងថ្នាក់ក្រោមមួយចំនួន ដែលពួកគាត់មានជីវភាពខ្វះខាត។ ពេលខ្លះពួកគាត់ត្រូវទៅខ្ចីលុយគេ ដើម្បីយកមកដោះស្រាយជីវភាពប្រចាំថ្ងៃ និងឲ្យលុយកូនទៅរៀន រង់ចាំបើកប្រាក់ខែទើបយកលុយទៅសងគេវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
មេតា
រឿងកាត់លុយជួយបក្ស (CPP)នោះជារឿងប្រពៃណីទៅហើយសម្រាប់អ្នករងគ្រោះជាមន្ដ្រីរាជការខ្មែរ ។ គ្មាននរណាចង់បំផ្លាញលុយជាញើសឈាមខ្លួនសម្រាប់រឿងបក្សនេះទេ តែទាល់លើទាល់ ព្រោះនៅក្រោមគេហើយនោះ ។
Aug 14, 2012 09:43 PM
អ្នកអានអនាមិក
whoever in charge of the money must have used the money for their own benefits such as paying their debts, gamblings or business ventures. This kind of things happen all the time in hun sen government. People must be vocal about this or the situation will continue in every ministry.
Aug 05, 2012 02:43 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
