ប្រតិកម្មពីសមាគមមាតាបិតាសិស្សនិងពីតំណាងបុគ្គលិកសិក្សាបម្រើការនៅវិទ្យាល័យទ្រៀល បានធ្វើឡើងក្រោយសេចក្ដីរាយការណ៍មួយដកស្រង់ពីប្រភពគ្រូបង្រៀនក្នុងខែត្រ បានអះអាងថាដោយសារតែគណបក្សប្រជាជនកម្ពុជាបានចាញ់សន្លឹកឆ្នោតនៅទីនោះ។
នាយករងវិទ្យាល័យទ្រៀល លោក អ៊ូច ផល្លី បានប្រតិកម្មបំភ្លឺថាការសន្យាធ្វើអគារសាលាដោយលោកនាយករដ្ឋមន្ត្រី ហ៊ុន សែន បានប្រព្រឹត្តទៅតាមគម្រោង ប៉ុន្តែដោយសារតែការសង់នោះខុសនឹងបច្ចេកទេសទើបបណ្ដាលឲ្យមានការផ្អាកបណ្ដោះអាសន្ន ដើម្បីរកវិធីធ្វើតាមគម្រោងបច្ចេកទេសត្រឹមត្រូវនោះវិញ។
លោក អ៊ូច ផល្លី បានមានប្រសាសន៍ថា ៖ «ព្រោះនេះជាកំហុសបច្ចេកទេសរបស់ជាង ហេតុដូច្នេះត្រូវតែផ្អាកសិន មិនមែនឲ្យធ្វើអ៊ីចឹងទេ។ អាហ្នឹងគឺមិនពាក់ព័ន្ធទៅនឹងលទ្ធផលនៃការបោះឆ្នោតទេ។ ហើយលោកគ្រូ អ្នកគ្រូខ្ញុំ គាត់ខឹងសម្បាណាស់ដល់ពេលឮព័ត៌មាន»។
អគារដែលបានសន្យាសាងសង់ឲ្យទៅសាលា គឺជាការសន្យារបស់លោកនាយករដ្ឋមន្ត្រី ហ៊ុន សែន និងក្រោយមកមានការធានាសង់អគារមួយជាន់ពីលើទៀត ពីលោករដ្ឋមន្ត្រីក្រសួងទេសចរណ៍ ថោង ខុន ដើម្បីបង្គ្រប់តម្រូវការរបស់វិទ្យាល័យ។
គ្រូបង្រៀនឈ្មោះ លោក ស៊ុន ធន ដែលប្រភពព័ត៌មានបានដកស្រង់ការចោទប្រកាន់របស់លោកថា ការផ្អាកដំណើរការសាងសង់គឺដោយសារតែគណបក្សប្រជាជនកម្ពុជាចាញ់ឆ្នោត បានថ្លែងថាការដែលលោកហ៊ានចោទប្រកាន់យ៉ាងនោះ គឺដោយសារតែការយល់ឃើញយ៉ាងនេះ ៖ «ព្រោះលោក ថោង ខុន គាត់តែងនិយាយថាប្រជាពលរដ្ឋនៅឃុំទ្រៀលហ្នឹងចង់បានអី? សាលារៀនគាត់ធ្វើឲ្យហើយ ស្អីៗគាត់ឲ្យហើយ អ្វីៗគាត់ឲ្យហើយ ហើយរឿងអីត្រូវផ្អាកទៀត។ ដូច្នេះខ្ញុំថានេះវាទាក់ទងហើយ ទាក់ទងនឹងលទ្ធផលហើយ ព្រោះឃុំទ្រៀលគណបក្សសមរង្ស៊ីមានសំឡេងគាំទ្រលើសគណបក្សប្រជាជន។ ដូច្នេះខ្ញុំយល់ថា នេះជាការផ្អាកដោយសារគណបក្សសមរង្ស៊ីឈ្នះឆ្នោត»។
លោកនាយករងវិទ្យាល័យបានថ្លែងថា មិនមានការបោះបង់នូវគម្រោងសាងសង់នោះទេ ប៉ុន្តែគ្រូបង្រៀន លោក ស៊ុន ធន បានថ្លែងថាលោកនៅតែមិនទាន់ជឿជាក់ថា ជាចេតនាចង់ធ្វើសាសាមែនទែននោះឡើយ។
លោក ស៊ុន ធន បានមានប្រសាសន៍ថា ៖ «បើគេដឹកសម្ភារៈមក បើគេមកធ្វើមក អាហ្នឹងយើងទទួលស្គាល់ថាគេធ្វើបន្ត ប៉ុន្តែគ្រាន់តែគេថាគេមកធ្វើៗ គេគ្រាន់តែថាតែមាត់ ហើយរូបភាពវាអត់ឃើញ។ អាហ្នឹងយើងចាត់ថាជាការបោកប្រាស់»។
នាយករងវិទ្យាល័យទ្រៀល លោក អ៊ូច ផល្លី បានថ្លែងថាដំណើរការសាងសង់លោកជឿថា គង់តែនឹងប្រព្រឹត្ត ប៉ុន្តែនឹងតាមលំនាំភាពត្រឹមត្រូវនៃការសិក្សាផ្នែកបច្ចេកទេស មិនមែនចេះតែតាមចិត្តមនុស្សសាមញ្ញដែលមិនយល់អំពីបច្ចេកទេសនោះឡើយ។
លោក អ៊ូច ផល្លី បានបញ្ជាក់ថា ៖ «គេមកជីកដី ជីកអី ពិសោធ។ គេប្រុងតែធ្វើ ប៉ុន្តែដោយសារជីកឥឡូវហ្នឹងឃើញថា ទឹកច្រើនណាស់ សង់ទាំងទឹកអ៊ីចឹងក្រែងលោ ខ្ញុំមិនដឹងយ៉ាងម៉េចដែរ បើគេសង់កើតគេនឹងចាប់ផ្ដើមសង់ហើយ ព្រោះតម្រូវការខ្ញុំត្រូវការប្រញាប់»។
លោកនាយករងវិទ្យាល័យទ្រៀលដដែលបានថ្លែងអះអាងម្ដងទៀតថា សំណង់វិទ្យាល័យទ្រៀលគង់តែនឹងប្រព្រឹត្តទៅតាមគម្រោង ហើយលោកបដិសេធចុងក្រោយទៀតថា ការផ្អាកកន្លងមកគឺបណ្ដាលមកពីការសង់ខុសបច្ចេកទេស ហើយនោះមិនមែនជាប់ទាក់ទងទៅនឹងលទ្ធផលនៃការបោះឆ្នោតនោះឡើយ៕