កងការពារព្រំដែនខ្មែរបានឲ្យដឹងថា ទាហានការពារព្រំដែនខ្មែរនៃតំបន់ប្រតិបត្តិការសឹករង ស្រុកត្រពាំងប្រាសាទ ខេត្តឧត្តរមានជ័យ បានប៉ះទង្គិចគ្នាដោយអាវុធមួយប្រាវជាមួយទាហានថៃមួយក្រុម ដែលបានដើរល្បាតចូលមកលើបន្ទាត់ព្រំដែនខ្មែរ ត្រង់ចំណុចឃុំអូរស្វាយនៃស្រុកត្រពាំងប្រាសាទនោះ កាលពីព្រឹកថ្ងៃទី៨ មិថុនានេះ។
លោកវរសេនីយ៍ទោ សឿន គឹមសន នាយរងការិយាល័យទី៣ របស់កងយោធពលខេមរភូមិន្ទនៃយោធភូមិភាគទី៤ ប្រចាំទិសស្រុកអន្លង់វែង និងស្រុកត្រពាំងប្រាសាទ បានមានប្រសាសន៍កាលពីរសៀលថ្ងៃអង្គារ ថា ការប៉ះទង្គិចគ្នាដោយអាវុធនោះបានកើតឡើងកាលពីវេលាម៉ោងជាង ៩ព្រឹក ស្របពេលដែលទាហានខ្មែរ និងថៃ បានដើរល្បាតប៉ះគ្នានៅលើបន្ទាត់ព្រំដែន ត្រង់ចំណុចឃុំអូរស្វាយ ស្រុកត្រពាំងប្រាសាទ ប៉ុន្តែមិនមានកងកម្លាំងទាំងសងខាងណាមួយរងរបួសទេ។
លោកវរសេនីយ៍ទោ សឿន គឹមសន បានបញ្ជាក់ថា ៖ «ម៉ោង៩:៥០ ជិតម៉ោង១០ហើយ។ ដើរល្បាតរៀងខ្លួន យើងក៏ល្បាត គេក៏ល្បាត ដល់ពេលវាក់គ្នាទៅ គេចរៀងខ្លួនទៅណា៎! ថៃវាផ្លោងមកយើងមុន! វាទៅឆ្ងាយហើយ វាផ្លោងអឹមមួយគ្រាប់មក ហើយវាបាញ់អឹមសីមក យើងបាញ់បួនដប់ម្ភៃគ្រាប់ទៅវិញទៅ ក៏វាស្ងាត់ទៅ វាដក! ប៉ុន្តែវាអត់មានអីផង បាញ់ពីចម្ងាយរៀងខ្លួន!»។
លោកវរសេនីយ៍ទោ តូច រ៉ា អនុប្រធានក្រុមការងារទំនាក់ទំនងព្រំដែនកម្ពុជា-ថៃ ប្រចាំច្រកជាំសាង៉ាំ នៃស្រុកអន្លង់វែង បានមានប្រសាសន៍ថា ការប៉ះប្រយុទ្ធគ្នានោះ គឺរវាងកងទាហានការពារព្រំដែនខ្មែរជាមួយកម្លាំងចម្រុះរបស់ថៃ មានទាហាន ប៉ូលិស និងមេព្រៃ ដែលដើរល្បាតមើលព្រៃដោយប្រើផែនទីឯកតោភាគី ហើយបានជ្រុលចូលមកក្នុងទឹកដីខ្មែរ។
លោក តូច រ៉ា បានមានប្រសាសន៍ថា ទោះយ៉ាងណាការប៉ះទង្គិចដោយអាវុធនោះមានរយៈពេលខ្លី ដោយកម្លាំងទាំងសងខាងមិនមានរងរបួសទេ។
កងយោធាខ្មែរបានឲ្យដឹងថា បន្ទាប់ពីប៉ះទង្គិចគ្នាមក កងទាហានថៃបានដកថយចម្ងាយប្រមាណ ៣០០ម៉ែត្រចូលក្នុងព្រំដែនរបស់គេ ដោយមិនទាន់ដកថយឲ្យឆ្ងាយពីកន្លែងប៉ះទង្គិចគ្នានោះនៅឡើយទេ។
មន្ត្រីក្រុមការងារព្រំដែនខ្មែរបានឲ្យដឹងថា មន្ត្រីយោធាយោធភូមិភាគទី៤ របស់ខ្មែរ និងមន្ត្រីយោធាយោធភូមិភាគទី២ របស់ថៃ បានណាត់គ្នាជួបប្រជុំនៅល្ងាចថ្ងៃអង្គារ ទី៨ មិថុនានេះ ដើម្បីស្វែងរកការបន្ទូរបន្ថយភាពតានតឹង បន្ទាប់ពីមានការប៉ះទង្គិចគ្នាមកនោះ៕