មន្ត្រីក្រសួងការបរទេសខ្មែរបានថ្លែងឲ្យដឹងនៅថ្ងៃពុធ ទី១៥ ធ្នូ ថា រដ្ឋាភិបាលកំពុងតែពិចារណាលើការស្នើសុំពន្យារពេលបិទជំរំជនភៀសខ្លួនជនជាតិភាគតិចម៉ុងតាញ៉ា របស់ឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ក្នុងរយៈពេលបីខែខាងមុខទៀត បន្ទាប់ពីមានការស្នើសុំពីអង្គការនេះ។
លោក កុយ គួង មន្ត្រីនាំពាក្យក្រសួងការបរទេស និងសហប្រតិបត្តិការអន្តរជាតិ បានមានប្រសាសន៍ថា អង្គការ UNHCR បានស្នើសុំពន្យារពេលបីខែ ក្នុងការបិទជំរំជនភៀសខ្លួនរបស់គេ ដើម្បីទុកពេលឲ្យគេបំពេញការងារបញ្ជូនជនភៀសខ្លួនម៉ុងតាញ៉ាចំនួន ៦២នាក់ ទៅប្រទេសទីបី ដែលពួកគេបានទទួលសិទ្ធិជ្រកកោននៅប្រទេសទីបីហើយនោះ ប៉ុន្តែការសម្រេចលើកិច្ចការផ្សេងៗ ទៀតយ៉ាងណានោះ លោកមិនទាន់ដឹងនៅឡើយទេ ៖ "ជំរំហ្នឹងកើតយួរហើយ រហូតមកទល់ពេលនេះ មិនទាន់ដោះស្រាយបញ្ចប់ទៀត ដូច្នេះហើយ ស្នើឲ្យUNHCR ហ្នឹងដោះស្រាយឲ្យបានលឿនជាទីបំផុត"។
សេចក្ដីជួនដំណឹងរបស់ក្រសួងការបរទេសចុះថ្ងៃទី២៩ វិច្ឆិកា បានកំណត់បិទជំរំជនភៀសខ្លួនសម្រាប់ឲ្យជនជាតិភាគតិចម៉ុងតាញ៉ាស្នាក់នៅជាបណ្ដោះអាសន្នរបស់ UNHCR នៅថ្ងៃទី១ ខែមករា ឆ្នាំ២០១១ ខាងមុខ។
វិទ្យុអាស៊ីសេរីបានព្យាយាមសុំការបំភ្លឺពីនាយកការិយាល័យឧត្ដមស្នងការអង្គការសហប្រជាជាតិ ទទួលបន្ទុកជនភៀសខ្លួនប្រចាំកម្ពុជា ជាច្រើនលើក នៅថ្ងៃទី១៥ ធ្នូ ប៉ុន្តែមិនអាចទាក់ទងបាន។
មន្ត្រីនាំពាក្យក្រសួងមហាផ្ទៃលោក ខៀវ សុភ័គ បានលើកហេតុផលនៃការបិទជំរំជនភៀសខ្លួននេះថា ដោយសារតែប្រទេសវៀតណាមក៏ជាសមាជិកអង្គការសហប្រជាជាតិដែរ ហើយពុំមានសង្គ្រាមដូចមុនទៀតទេ និងហេតុផលផ្សេងៗមួយចំនួនទៀត។ លោក ខៀវ សុភ័គ បានបញ្ជាក់ថា ចំពោះជនភៀសខ្លួនម៉ុងតាញ៉ា ជាង ១០នាក់ផ្សេងទៀត ដែលមិនទាន់ទទួលបានសិទ្ធិជ្រកកោនពី UNHCR នៅឡើយ ដែលកំពុងស្នាក់នៅក្នុងជំរំនេះ គេនឹងចាត់ការតាមច្បាប់អន្តោប្រវេសន៍ ៖ "គាត់មិនមែនធ្វើដល់ ឫសគល់ឯណា ម៉េចគាត់មិនទៅធ្វើ (ជំរំ) ដល់ប្រទេសវៀតណាមតែម្ដងទៅ គាត់ចាំតែនៅក្នុងប្រទេសយើងធ្វើអី"។
បុរសម្នាក់ឈ្មោះ Ksor Luan ជនជាតិម៉ុងតាញ៉ា ដែលកំពុងស្នាក់នៅក្នុងជំរំភៀសខ្លួនក្នុងរាជធានីភ្នំពេញ ដែលរដ្ឋាភិបាលគ្រោងបិទនោះ បាននិយាយថា ពួកគេត្រូវបានរដ្ឋាភិបាលវៀតណាមតាមចាប់ខ្លួន ដោយសារតែពួកគេបានទាមទារយកដីស្រែ និងដីចម្ការដែលរដ្ឋាភិបាលរឹបអូសយក និងរឿងជំនឿលើសាសនាគ្រឹះ។
លោកបញ្ជាក់ទៀតថា បើសិនជាគេបញ្ជូនអ្នកដែលមិនទាន់ទទួលសិទ្ធិជ្រកកោននៅប្រទេសទីបី ឲ្យត្រឡប់ទៅប្រទេសវៀតណាមវិញនោះ ពួកគេនឹងប្រឈមនិងបញ្ហាចាប់ខ្លួន និងធ្វើបាបពីរដ្ឋាភិបាលវៀតណាមជាមិនខាន ៖ "គេដាក់ចាប់ដាក់គុកហើយ ខ្លះពីរឆ្នាំ ឬបីឆ្នាំ ឬមួយឆ្នាំ ពេលត្រឡប់មកវិញ ឡេឡឺៗ ដូចឆ្កួតអ៊ីចឹង"។
មន្ត្រីស៊ើបអង្កេតនៃសមាគមអាដហុកប្រចាំខែត្ររតនគិរី លោក ប៉ែន ប៊ុណ្ណារ៍ បានមានប្រសាសន៍ថា រដ្ឋាភិបាលគួរតែផ្ដល់ពេលវេលាជួន UNHCR តាមការស្នើសុំនោះ។ លោកបញ្ជាក់ថា ជនភៀសខ្លួនម៉ុងតាញ៉ា បានចូលក្នុងកម្ពុជាតាមច្រកព្រំដែនក្នុងខែត្ររតនគិរី តាំងពីឆ្នាំ២០០១មក រហូតដល់ឆ្នាំ២០០៨។
លោក ប៉ែន ប៊ុណ្ណារ៍ បានបញ្ជាក់ថា ជំរំជនភៀសខ្លួនរបស់ UNHCR គេបានធ្វើនៅខែត្ររតនគិរី នៅក្នុងឆ្នាំ២០០១ ដល់ឆ្នាំ២០០៤ ហើយតាំងពីឆ្នាំ២០០៤ មក គេបានធ្វើនៅរាជធានីភ្នំពេញ។
ជនជាតិភាគតិចម៉ុងតាញ៉ាវៀតណាម ដែលភៀសខ្លួនមកស្នាក់នៅក្នុងជំរំជនភៀសខ្លួន UNHCR ពួកគេមកពីតំបន់ខ្ពង់រាបប៉ែកខាងលិច នៅក្នុងខែត្រមួយចំនួននៃប្រទេសវៀតណាម ដូចជាខែត្រយ៉ាឡៃ ដាក់ឡាក់ ដាក់នុង កនទុម និងឡាំដុង ជាដើម ដែលមានព្រំប្រទល់ជាប់នឹងប៉ែកឦសាននៃប្រទេសកម្ពុជា គឺខែត្ររតនគិរី និងមណ្ឌលគិរី៕