ក្រុមអាជីវករមួយចំនួនដែលមានតូបលក់ដូរនៅក្នុងមជ្ឈមណ្ឌលកម្សាន្តកោះពេជ្រ បានឲ្យដឹងនៅថ្ងៃទី១ ធ្នូថា ពួកគេគ្រោងនឹងដាក់លិខិតស្នើសុំពន្យារពេលការលក់ដូររយៈពេលបីខែ ទៅអ្នកគ្រប់គ្រងមជ្ឈមណ្ឌលកម្សាន្តកោះពេជ្រ ក្នុងពេលឆាប់ៗនេះ ពីព្រោះគ្មានអតិថិជនទៅទិញសម្ភារៈនៅទីនោះដូចកាលពីមុនទៀតទេ។
ការគ្រោងស្នើសុំពន្យារពេលលក់ដូរនេះ នៅក្រោយពីមានឧបទ្ទវហេតុមនុស្សផ្អើលរត់ជាន់គ្នានៅលើស្ពានពេជ្រ កាលពីថ្ងៃទី២២ ខែវិច្ឆិកា កន្លងទៅ ដែលធ្វើឲ្យមានមនុស្សស្លាប់ និងរបួសជិត ១ពាន់នាក់។
អាជីវករមួយរូបឈ្មោះ លីន លី បាននិយាយថា លោកបានជួលតូបលក់សម្លៀកបំពាក់នៅឯមជ្ឈមណ្ឌលកម្សាន្តកោះពេជ្រ ក្នុងមួយខែចំនួន ៥០០ដុល្លារ ប៉ុន្តែបន្ទាប់ពីមានឧបទ្ទវហេតុនេះកើតឡើង លោកក៏ដូចជាអាជីវករផ្សេងទៀត បានផ្អាកលក់ដូរជាបណ្ដោះអាសន្ន ដោយសារតែគ្មានភ្ញៀវទៅទិញ ៖ «និយាយទៅលក់មុនគេ Free ឲ្យមួយខែមកហ្នឹង គេចាប់ផ្ដើមគិតតាំងពីខែ១០ មកហ្នឹង ហើយលក់ខោអាវដូចខ្ញុំហ្នឹង។ និយាយទៅរកបានមកសម្រាប់តែមួយគ្រប់ៗ វាអត់សល់»។
ប្រភពពីអាជីវករបានលើកឡើងថា អាជីវករលក់ដូរនៅក្នុងមជ្ឈមណ្ឌលកម្សាន្តកោះពេជ្រនេះ មានពីរប្រភេទ ទី១ គឺអ្នកជួលស្តង់លក់ជាប្រចាំដោយបង់ជាខែ និងទី២ អ្នកលក់តាមថ្ងៃពិធីបុណ្យទាន ឬពេលមានក្រុមហ៊ុនតាំងពិព័រណ៍លក់ផលិតផលជាដើម។
អាជីវករលក់ចំណីអាហារឈ្មោះ ណេន ហ៊ុន បានបញ្ជាក់ថា ពួកគាត់ប្រមាណ ២០០នាក់ បានជួលស្តង់លក់ចំណីអាហារនៅមជ្ឈមណ្ឌលកោះពេជ្រ រយៈពេលបីថ្ងៃ ប៉ុន្តែពួកគាត់លក់មិនបានគ្រប់បីថ្ងៃទេ ដោយសារតែមានឧបទ្ទវហេតុលើស្ពានកោះពេជ្រ ក៏នាំគ្នាផ្អាកលក់ ព្រោះគ្មានមនុស្សទៅលេងទីនោះនៅថ្ងៃបន្ទាប់។
អ្នកស្រី ណេន ហ៊ុន បានឲ្យដឹងថា អ្នកស្រីលក់ផលិតផលខ្មែរនៅក្នុងព្រះរាជពិធីបុណ្យអុំទូកនោះ ប្រសិនបើគ្មានឧបទ្ទវហេតុកើតឡើងទេ អ្នកស្រីសង្ឃឹមថា នឹងមានប្រាក់ចំណេញប្រមាណ ៣០០ដុល្លារ ប៉ុន្តែដោយសារតែមានព្រឹត្តិការណ៍នេះកើតឡើង អ្នកស្រីខាតអស់ជាង ១ពាន់ដុល្លារ ៖ «ប្រសិនបើពន្យារបានពីរ ឬបីខែទៀតក៏ល្អដែរ ដើម្បីឲ្យមានប្រជាពលរដ្ឋយើងចូលចិត្តទៅលេងហ្នឹងវិញ ដូចជាភ្លាមៗអ៊ីចឹង ម្នាក់ៗដូចថា ត្រៀមលុយខាត»។
វិទ្យុអាស៊ីសេរីមិនអាចទាក់ទងសុំការបំភ្លឺពីលោក ពុង ខៀវសែ អគ្គនាយកក្រុមហ៊ុន Oversea Cambodian Investment Cooperation បានទេ នៅថ្ងៃទី១ ខែធ្នូ ឆ្នាំ២០១០ ដើម្បីសុំឲ្យមានការបំភ្លឺលើការតវ៉ានោះ។ រីឯអ្នកនាំពាក្យនៃក្រុមហ៊ុននេះ លោក ឆែ លីវណ្ណ មិនធ្វើអធិប្បាយអំពីករណីនេះទេ។
ទោះជាយ៉ាងណា រដ្ឋមន្ត្រីក្រសួងទេសចរណ៍ លោក ថោង ខុន បានមានប្រសាសន៍កាលពីថ្ងៃទី៣០ ខែវិច្ឆិកាថា ឧបទ្ទវហេតុលើស្ពានកោះពេជ្រ មិនប៉ះពាល់ដល់ភ្ញៀវទេសចរណ៍អន្តរជាតិ ក្នុងការចូលមកទស្សនកិច្ចកម្ពុជានោះទេ ផ្ទុយទៅវិញ លោកគិតថា ភ្ញៀវទេសចរណ៍នៅតែចូលមកទស្សនាប្រទេសកម្ពុជាដដែល ព្រោះថា នេះជាឧបទ្ទវហេតុចៃដន្យតែប៉ុណ្ណោះ ហើយមជ្ឈមណ្ឌលកម្សាន្តកោះពេជ្រ នៅតែជាទីកន្លែងទាក់ទាញភ្ញៀវទេសចរណ៍ជាតិ និងអន្តរជាតិដដែល៕