ប្រជាពលរដ្ឋ៥នាក់រស់នៅក្នុងភូមិចំនួន២ផ្សេងគ្នា គឺភូមិពូទឺតនិងភូមិពូរ៉ាំង ត្រូវបានសាលាឃុំប៊ូស្រាកោះហៅឲ្យចូលខ្លួននៅព្រឹកថ្ងៃទី៤ កុម្ភៈ បន្ទាប់ពីពួកគាត់ទាំងនោះបានថ្លែងពីទុក្ខកង្វល់របស់សហគមន៍នៅក្នុងវេទិការបស់មជ្ឈមណ្ឌលសិទ្ធិមនុស្សកម្ពុជា កាលពីថ្ងៃទី២៥ កុម្ភៈកន្លងមក ប្រាប់ក្រុមអ្នកតំណាងរាស្រ្តមកពីរដ្ឋសភាតំណាងគណបក្សទាំង៥ អំពីដីចម្ការ ដីផ្នូរខ្មោច និងព្រៃគោរពបូជារបស់ពួកគាត់កំពុងត្រូវបានឈូសឆាយដណ្តើមកាន់កាប់ដោយក្រុមហ៊ុនឈ្មោះ Socfin KCD នោះ។
អ្នកភូមិ៥នាក់មានឈ្មោះ មី ដែង, កប់ ភាវ, កប់ ងឺវ, ឆូត ក្លើស និង ឆូត ណាន់ ត្រូវបានកត់សម្គាល់ថាជាអ្នកនាំមុខក្នុងការបង្ហាញកង្វល់ និងទាមទារមកវិញនូវដីធ្លីរបស់សហគមន៍នៅក្នុងវេទិកាជាមួយអ្នកតំណាងរាស្រ្តកាលពីពេលកន្លងមកនោះ ដែលធ្វើឡើងដោយមជ្ឈមណ្ឌលសិទ្ធិមនុស្សកម្ពុជានៅខេត្តមណ្ឌលគិរី។
សាលាឃុំប៊ូស្រាបានចេញលិខិតកោះហៅអ្នកទាំង៥នោះឲ្យចូលខ្លួនមកសាលាឃុំដើម្បីធ្វើការសាកសួរកាលពីថ្ងៃទី៣ កុម្ភៈ។
អ្នកស្រី កប់ លេត តំណាងសហគមន៍ភូមិពូទឺត មានប្រសាសន៍ថា អ្នកភូមិទាំងអស់គ្នាមានកង្វល់អំពីការកោះហៅនេះខ្លាចក្រែងមានការចាប់ខ្លួន។ ដូច្នេះពួកគាត់នឹងនាំគ្នាទៅការពារអ្នកទាំងនោះ។
អ្នកស្រី កប់ លេត បានបញ្ជាក់ថា ៖ «គ្រោងទៅទាំងអស់គ្នា អត់ឲ្យ៥នាក់ហ្នឹងទៅទេ។ មិនដឹងថា វាគាបយ៉ាងម៉េចយ៉ាងម៉ាអ៊ីចឹង! ហើយវាចាប់វាចង។ ប្រជាពលរដ្ឋឲ្យទៅទាំងអស់គ្នា ហើយបើម៉េចៗដឹងឮទាំងអស់គ្នាទៅ។ ព្រោះដីធ្លីហ្នឹងមិនមែនដីធ្លីតែពួកគាត់ ៥នាក់ហ្នឹងឯណា! ដីធ្លីយើងទាំងអស់គ្នាមួយឃុំប៊ូស្រា»។
អ្នកភូមិម្នាក់ផ្សេងទៀតបានរៀបរាប់ថា ៖ «ចង់ឲ្យគាត់ទទួលស្គាល់ថា គាត់បានឈូសឆាយហើយហ្នឹង វាត្រូវតែសែនព្រេនជូនគេអ៊ីចឹងណា៎! ព្រោះឆ្អឹងគេកប់នៅក្នុងដីសោះ កាយមកដាក់លើដីអីអ៊ីចឹងណា៎! ចង់ឲ្យគាត់លាលាងទោសកំហុសរបស់គាត់ ហើយដីហ្នឹងមិនចង់ឲ្យគាត់ប្រើប្រាស់ទេ ពីព្រោះកន្លងមកគាត់ឈូសឆាយ ហើយគាត់ដាក់ដាំកៅស៊ូនៅលើដីខ្មោចហ្នឹងទៀត។ អ៊ីចឹងគឺប្រគល់ឲ្យប្រជាពលរដ្ឋគាត់អ្នកកាន់កាប់ដីហ្នឹងដូចដើមវិញ»។
មេឃុំប៊ូស្រា លោក កេង ញ៉ក់ មានប្រសាសន៍ថា ការកោះហៅនោះត្រូវធ្វើឡើងដើម្បីស្វែងយល់ថា តើអ្នកទាំងនោះទាមទារអ្វីខ្លះ ហើយគាត់នឹងសម្របសម្រួលពាំនាំទៅវិញទៅមករវាងក្រុមហ៊ុននិងសហគមន៍ដើម្បីជំរុញឈានទៅរកការបញ្ឈប់ជម្លោះ។
លោក កេង ញ៉ក់ បានអះអាងថា ៖ «ពិភាក្សាឡើងវិញដើម្បីធ្វើការចរចាសម្របសម្រួលជាមួយក្រុមហ៊ុន ដើម្បីការងារដំណើរការអ៊ីចឹងទៅណា៎! ទាមទារដំរី ក្រុមហ៊ុនហ្នឹងគាត់អត់មានលទ្ធភាព បើថា ១លាន ២លានរៀលហ្នឹង គាត់ថាអាចបាន។ ធ្វើកុំឲ្យបាត់បង់ប្រពៃណីអ៊ីចឹងទៅណា៎! ...អ្នកតវ៉ាថ្ងៃមុនៗសុទ្ធតែយកលុយក្រុមហ៊ុនអស់ហើយ»។
លោក ឈឹម សាវុធ មន្រ្តីស៊ើបអង្កេតមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា ថ្មីៗនេះអាជ្ញាធរឃុំបានស្វែងរកឈ្មោះអ្នកផ្តល់ព័ត៌មានដល់វិទ្យុ និងផ្តល់របាយកាណ៍មកខាងសិទ្ធិមនុស្សជាដើម គឺជាការបំភិតបំភ័យ។
ដោយឡែកចំពោះចំណាត់ការរបស់សាលាឃុំប៊ូស្រាដែលកោះហៅអ្នកភូមិក្រោយពេលពួកគាត់មានការតវ៉ានេះ ក៏ជាការគាបសង្កត់ខាងស្មារតីក្នុងការបញ្ចេញមតិផងដែរ ហើយមជ្ឈមណ្ឌលសិទិ្ធមនុស្សកម្ពុជានឹងចេញសេចក្តីថ្លែងការណ៍មួយដើម្បីទាមទារឲ្យមានការគោរពសិទិ្ធនេះ៕