លោកមេធាវីតំណាងឲ្យប្រជាពលរដ្ឋ លោក ជូង ជូងី បានមានប្រសាសន៍ថា ការដាក់ពាក្យបណ្ដឹងរបស់លោកត្រូវរាំងស្ទះ បន្ទាប់ពីមានការតម្រូវផ្នែកច្បាប់ឲ្យប្រជាពលរដ្ឋជាដើមបណ្ដឹងបង់ពន្ធចំពោះទឹកប្រាក់ ៥០% នៃទឹកប្រាក់ដែលក្រុមហ៊ុន ស៊ូកាគូ អ៊ីន បានជួលបឹងកក់ដើម្បីអភិវឌ្ឍ។
លោក ជូង ជូងី បានឲ្យដឹងថាតាមការគណនាក្រៅផ្លូវការរបស់លោក ប្រជាពលរដ្ឋត្រូវបង់ពន្ធជាទឹកប្រាក់ចំនួន១៦០លានរៀល ឬប្រមាណជា៤ម៉ឺនដុល្លារសហរដ្ឋអាមេរិក ទៅលើពាក្យបណ្ដឹងរបស់ខ្លួន។ លោកបានបន្តថា ប្រជាពលរដ្ឋដែលតវ៉ានោះមិនមានលទ្ធភាពក្នុងការបង់ពន្ធតាមច្បាប់កំណត់នេះឡើយ។
លោក ជូង ជូងី បានមានប្រសាសន៍ថា ៖ «យើងត្រូវបង់ពន្ធទៅលើប្រាក់៥០%នៃប្រាក់ដែលមានក្នុងកម្មវត្ថុនៃកិច្ចសន្យាហ្នឹង។ តាមការគិតត្រួសក្រៅផ្លូវការរបស់ខ្ញុំ ប្រហែលជា១៦០លានរៀលដែលត្រូវបង់។ ប្រជាពលរដ្ឋគាត់អត់មានលទ្ធភាពបង់ទេ»។
លោក ជូង ជូងី បានឲ្យដឹងផងដែរថា លោកនឹងបន្តស្វែងរកវិធីដើម្បីដាក់ពាក្យបណ្ដឹងនោះឲ្យបាន ៖ «វិធីហ្នឹងគឺខ្ញុំអត់ទាន់អាចជម្រាបបានទេ ពីព្រោះខ្ញុំត្រូវពិភាក្សាជាមួយប្រជាពលរដ្ឋ ពិភាក្សាជាមួយអង្គការក្រៅរដ្ឋាភិបាលថែមទៀត ដើម្បីរកវិធីដែលអាចទៅរួច»។
ប្រជាពលរដ្ឋរស់នៅតំបន់បឹងកក់បាននាំគ្នាតវ៉ាទាមទារឲ្យក្រុមហ៊ុន ស៊ូកាគូ អ៊ីន ដែលកំពុងអភិវឌ្ឍតំបន់បឹងកក់សងថ្លៃខូចខាតចំពោះពួកគាត់ឲ្យបានសមរម្យតាមតម្លៃទីផ្សារ។
គួរជម្រាបថា រដ្ឋាភិបាលបានអនុញ្ញាតឲ្យក្រុមហ៊ុន ស៊ូកាគូ អ៊ីន ធ្វើការអភិវឌ្ឍបឹងកក់សម្រាប់រយៈពេល៩៩ឆ្នាំ លើផ្ទៃដីចំនួនជិត១៣៣ហិកតារ ក្នុងទឹកប្រាក់ប្រមាណ៧៩លានដុល្លារសហរដ្ឋអាមេរិក ដែលការអនុញ្ញាតនេះត្រូវបានក្រុមសិទ្ធិមនុស្សរិះគន់ថា បានរំលោភលើច្បាប់ភូមិបាលឆ្នាំ ២០០១ ដែលថាការផ្ទេរបឹងដែលជាកម្មសិទ្ធិរដ្ឋទៅឲ្យឯកជន គឺមិនត្រូវហួសពី១៥ឆ្នាំឡើយ។
ក្រុមសិទ្ធិមនុស្សបានឲ្យដឹងថា ការអភិវឌ្ឍនេះនឹងប៉ះពាល់យ៉ាងធ្ងន់ធ្ងរចំពោះបរិស្ថាន និងប្រជាពលរដ្ឋប្រមាណពី ៣០០០ ទៅ ៤២០០គ្រួសារដែលរស់នៅជុំវិញបឹងកក់នោះ៕