ជម្លោះរវាងរដ្ឋបាលជលផលនិងមន្ទីរធនធានទឹកនៅបាត់ដំបង
mn.mp3
ករណីទំនាស់ស្ថាប័នជំនាញ រវាងខណ្ឌរដ្ឋបាលជលផល និងមន្ទីរធនធានទឹក ជារឿងចម្លែកមួយ ដែលធ្វើឲ្យមតិមហាមានការសង្ស័យច្រើនទៅលើការឃុបឃិតគ្នារបស់អាជ្ញាធរ និងក្រុមឈ្មួញនៅពីក្រោយខ្នង។ គម្រោងអភិវឌ្ឍន៍មិនចុះសម្រុងគ្នានេះ បានធ្វើឡើងផ្ទុយពីសេចក្ដីណែនាំរបស់លោក ហ៊ុន សែន ជានាយករដ្ឋមន្ត្រី ដែលបានកំណត់ឲ្យការអភិវឌ្ឍនៅក្នុងតំបន់ពីរ ឬតំបន់បី ក្នុងដែនទឹកបឹងទន្លេសាបនោះ ត្រូវធ្វើការសិក្សាឲ្យបានច្បាស់លាស់។
ក្រុមអ្នកភូមិមានចម្ងល់ជាច្រើនចោទសួរថា តើគម្រោងនេះបានថវិកាមកពីណា?
ជាធម្មតាថវិការបស់រដ្ឋមួយឆ្នាំឲ្យបានម្ដង មិនអាចសុំភ្លាម រដ្ឋាភិបាលទម្លាក់ឲ្យភ្លាមនោះទេ។ ការអភិវឌ្ឍនៅឃុំកំពង់ព្រៀង ធ្វើឡើងភ្លាមៗ ដែលគេអាចមើលឃើញថា មានភាពមិនប្រក្រតី។ ការងារក្រុមប្រឹក្សាឃុំត្រូវមានការកសាងផែនការប្រជុំឆ្លងយោបល់ឲ្យបានត្រឹមត្រូវ ប៉ុន្តែករណីនេះ ធ្វើឡើងដោយបុគ្គលម្នាក់ស្នើសុំ ពុំមែនជាគម្រោងអភិវឌ្ឍន៍របស់ឃុំនោះទេ។
នៅក្នុងឯកសារថតចម្លងពីរច្បាប់ដែលវិទ្យុអាស៊ីសេរីទទួលបាន នៅថ្ងៃអាទិត្យ ទី២៩ ខែកក្កដា បាន បង្ហាញថា លោក ង៉ែត សឿ មេឃុំកំពង់ព្រៀង លោក សួន សាវ៉េត អភិបាលស្រុកសង្កែ លោក អ៊ុយ រី អភិបាលរងខេត្ត និងលោក ឡុង ផលគុណ ប្រធានមន្ទីរធនធានទឹកខេត្តបាត់ដំបង កាលពីខែមីនា និងដើមខែកក្កដា ឆ្នាំ២០១២ បានចុះហត្ថលេខា និងបោះត្រាជាបន្តបន្ទាប់រួមគ្នាលើលិខិតលេខ ៥១០ ឃ.ក.ព.ព ជូនទៅក្រសួងធនធានទឹក និងអាជ្ញាធរបឹងទន្លេសាប ដើម្បីសុំស្ដារប្រឡាយចាស់សល់ពីសម័យ ប៉ុល ពត ១ខ្សែ ប្រវែង ៧គីឡូម៉ែត្រ ដើម្បីយកទឹកបង្កើនទិន្នផលស្រូវនៅក្នុងភូមិកាច់រទេះ ឃុំកំពង់ព្រៀង។
ក្រោយមកនៅថ្ងៃទី២ ខែកក្កដា ដដែលនោះ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរបឹងទន្លេសាប បានធ្វើលិខិតមួយជូនអភិបាលខេត្តបាត់ដំបង។លិខិតបញ្ជាក់ថា ក្រសួងធនធានទឹក និងអាជ្ញាធរបឹងទន្លេសាប ពុំមានការយល់ទាស់ទេ តែការអនុវត្តត្រូវធ្វើទៅតាមបទដ្ឋានបច្ចេកទេស ដែលកំណត់ដោយមន្ទីរធនធានទឹក និងឧតុនិយមខេត្តបាត់ដំបង និងហាមឃាត់ដាច់ខាតមិនឲ្យប៉ះពាល់ដីនៅតំបន់៣។
លោក កែវ ភីរុន ជំទប់ទី២ ឃុំកំពង់ព្រៀង បានអះអាងថា ទីតាំងនោះស្ថិតនៅក្នុងតំបន់បី ជាតំបន់ព្រៃរនាម។ ក្រុមអ្នកភូមិមានប្រតិកម្មយ៉ាងខ្លាំងក្លាទៅនឹងគម្រោងការអភិវឌ្ឍន៍ក្លែងក្លាយនេះ។
កាលពីថ្ងៃសៅរ៍ ទី២៨ ខែកក្កដា ឆ្នាំ២០១២ កន្លងទៅ ក្រុមអ្នកភូមិបានអំពាវនាវសុំទៅលោក ហ៊ុន សែន ប្រមុខដឹកនាំរដ្ឋាភិបាលកម្ពុជា ឲ្យបង្កើតគណៈកម្មការឯករាជ្យមួយចុះពិនិត្យជាបន្ទាន់ និងចាត់វិធានការទប់ស្កាត់ករណីរំលោភបំពានដីព្រៃលិចទឹកក្នុងដែនបឹងទន្លេសាប ស្ថិតក្នុងតំបន់បី ក្នុងភូមិសាស្ត្រខាងកើតភូមិកាច់រទេះ ឃុំកំពង់ព្រៀង ស្រុកសង្កែ ខេត្តបាត់ដំបង។
ការអំពាវនាវនេះបានធ្វើឡើងនៅគ្រាដែលពួកគេរកឃើញថា ក្រុមអាជ្ញាធរខេត្ត មន្ត្រីជំនាញពាក់ព័ន្ធ បានឃុបឃិតគ្នាជាមួយយោធា និងឈ្មួញ ដាក់គ្រឿងចក្រជាច្រើនគ្រឿងកំពុងជីកកាយដីនៅតំបន់បីបឹងទន្លេសាប។
កាលពីថ្ងៃទី២៦ ខែកក្កដា កន្លងទៅនេះ ក្រុមមន្ត្រីជលផលបានចុះទៅហាមឃាត់ការជីកប្រឡាយ នោះ ដោយចោទថា ក្រុមមន្ត្រីអាជ្ញាធរមូលដ្ឋាន និងមន្ត្រីនៃមន្ទីរធនធានទឹកពាក់ព័ន្ធកំពុងជីកទន្ទ្រាន នៅលើដីព្រៃលិចទឹក ក្នុងតំបន់បី ដែលរាជរដ្ឋាភិបាលបានចេញសារាចរហាមឃាត់។ ក្រុមមន្ត្រីជលផលបានចុះទៅហាមឃាត់ដោយសំអាងលើច្បាប់ជលផល។
មន្ទីរធនធានទឹកឆ្លើយតបក្នុងករណីនេះថា ការអភិវឌ្ឍធ្វើឡើងដើម្បីឆ្លើយតបតម្រូវការប្រជាពលរដ្ឋនៅឃុំកំពង់ព្រៀង។ មន្ទីរធនធានទឹកគ្រោងប្ដឹងបកក្រុមមន្ត្រីជលផលទៅតុលាការ ក្នុងករណីចុះទៅចាប់គ្រឿងចក្រ។
ក្រុមអ្នកភូមិយល់ឃើញថា ទាំងនេះបង្ហាញឲ្យឃើញថា ជាគំនិតក្រុមឈ្មួញនៅពីក្រោយខ្នង។ ម្យ៉ាងវិញទៀត តំបន់នោះជាតំបន់បីលិចទឹក ត្រូវការចំណាយថវិកាជីកបៀ និងប្រឡាយរាប់រយលានដុល្លារ។
ប្រជាពលរដ្ឋលើកឡើងថា បើសិនឃុំកំពង់ព្រៀង អាចធ្វើដូច្នេះបាន នៅឃុំផ្សេងៗទៀតក៏អាចធ្វើបានដូចគ្នា ចាប់ពីឃុំអន្លង់វិល រហូតទៅដល់ឃុំបឹងព្រីង និងឃុំជ្រោយស្ដៅ នៅតាមស្រុកមួយចំនួនដែលជាប់ទឹកបឹងទន្លេសាប។
អភិបាលខេត្តបាត់ដំបង លោក ប្រាជ្ញ ច័ន្ទ ពុំបានផ្ដល់អត្ថាធិប្បាយពិស្ដារទេ ដោយលោកបញ្ជាក់ថា ភាគីទាំងពីរកំពុងធ្វើការចរចាគ្នា។ ប៉ុន្តែប្រភពច្បាស់ការមួយបានបង្ហើបថា លោក ប្រាជ្ញ ច័ន្ទ បានស្ដីបន្ទោសលោក អ៊ុយ រី ជាអភិបាលរងខេត្តដែលបានចុះហត្ថលេខាមិនបានឆ្លងយោបល់។ លោក អ៊ុយ រី បានចុះហត្ថលេខាលើលិខិតសុំទៅក្រសួងធនធានទឹក។
ក្រុមអ្នកភូមិបានអះអាងថា ករណីនេះបើសិនជារដ្ឋាភិបាលបង្កើតគណៈកម្មការឯករាជ្យមួយ និង អាចរកឃើញកំហុសជាច្រើន ដូចជាទីតាំងដីព្រៃរនាមនោះក្នុងដែនទឹកបឹងទន្លេសាបនៅក្នុងតំបន់បី ថវិការបស់ក្រុមឈ្មួញដែលនៅពីក្រោយខ្នង និងផែនការអភិវឌ្ឍន៍ក្លែងក្លាយដែលពុំមានមូលដ្ឋានសិក្សាឲ្យបានច្បាស់លាស់ ហើយគេអាចផ្ដន្ទាទោសជនទាំងឡាយដែលបានធ្វើការក្លែងបន្លំក្រោមរូបភាពអភិវឌ្ឍន៍ ដើម្បីរកប្រយោជន៍ផ្ទាល់ខ្លួនបានទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
