អ្នកជំនាញថា សន្ធិសញ្ញាបំពេញបន្ថែមឆ្នាំ២០០៥ ធ្វើឲ្យកម្ពុជាបាត់ភូមិច្រើន

ទោះបីមានភស្តុតាង និងការចោទប្រកាន់ជាច្រើនពីមហាជនថា ប្រមុខរដ្ឋាភិបាលកម្ពុជាកំពុងជួយសម្រួល ឬបានកាត់ទឹកដីរបស់ខ្លួនទៅឲ្យប្រទេសវៀតណាម នោះក៏ដោយ ក៏មន្ត្រីជាន់ខ្ពស់ទទួលបន្ទុកកិច្ចការព្រំដែនខ្មែរ នៅតែមានគំនិតសុទ្ធិនិយម។

ដោយ តាំង សារ៉ាដា
2012-07-20

h071912rd.mp3

នាយករដ្ឋមន្ត្រីប្រទេសវៀតណាម លោក ង្វ្រៀន តាន់យ៉ុង (Nguyen Tan Dung) [ឆ្វេង] ចាប់ដៃជាមួយនាយករដ្ឋមន្ត្រីកម្ពុជា លោក ហ៊ុន សែន ក្នុងឱកាសសម្ពោធបង្គោលព្រំដែនគោកលេខ ៣១៤ នៅរវាងខេត្តកំពត ប្រទេសកម្ពុជា និងខេត្តគៀងយ៉ាង ប្រទេសវៀតណាម កាលពីថ្ងៃ២៤ មិថុនា ឆ្នាំ២០១២។

RFA/Uon Chhin

ហើយមន្ត្រីទាំងនោះថ្លែងការពារថា កម្ពុជាកំពុងបោះជំហានដ៏ត្រឹមត្រូវ និងធ្វើកិច្ចការដោយស្របច្បាប់ក្នុងការដោះស្រាយបញ្ហាព្រំដែនជាមួយញាតិជិតខាងរបស់ខ្លួន។

មន្ត្រីជាន់ខ្ពស់ទទួលបន្ទុកកិច្ចការព្រំដែនកម្ពុជានៃរដ្ឋាភិបាល នៅតែប្រកាន់ជំហរប្រកបដោយមោទនភាពក្នុងការដោះស្រាយបញ្ហាព្រំដែននៅភាគខាងកើតថា កំពុងធ្វើឡើងស្របទៅតាមនីតិវិធីច្បាប់ និងឆន្ទជាតិពិតប្រាកដ។

ទេសរដ្ឋមន្ត្រី និងជាប្រធានគណៈកម្មាធិការព្រំដែនកម្ពុជា លោក វ៉ា គឹមហុង មានប្រសាសន៍ថា រដ្ឋាភិបាលខ្មែរសឹងគ្រប់ជំនាន់តែងប្រកាន់ខ្ជាប់នូវផែនទីខ្នាត ១លើ១រយពាន់ ដែលដាក់តម្កល់ក្នុងអង្គការសហប្រជាជាតិ យកមកដោះស្រាយជាមួយប្រទេសជិតខាងជានិច្ច។

ផ្ទុយទៅវិញ ក្រុមអ្នកឃ្លាំមើលនិយាយថា កាលពីខែតុលា ឆ្នាំ២០០៥ លោកនាយករដ្ឋមន្ត្រី ហ៊ុន សែន បានចុះហត្ថលេខាជាមួយលោក ផាំ វ៉ាន់ខៃ នាយករដ្ឋមន្ត្រីវៀតណាមក្នុងទីក្រុងហាណូយ ជាសន្ធិសញ្ញាបំពេញបន្ថែមលើសន្ធិសញ្ញាឆ្នាំ១៩៨៥ ស្ដីពីការកំណត់ព្រំដែនជាតិរវាងប្រទេសទាំងពីរនោះ ឲ្យមានភាពស្របច្បាប់។ សន្ធិសញ្ញាឆ្នាំ១៩៨៥ នេះ ធ្វើឡើងដោយលោក ហ៊ុន សែន រដ្ឋមន្ត្រីការបរទេសខ្មែរ ជាមួយលោក ង្វៀង កូថាច់ រដ្ឋមន្ត្រីការបរទេសវៀតណាម ខណៈកម្ពុជាស្ថិតក្រោមការត្រួតត្រារបស់កងទ័ពវៀតណាម។

សន្ធិសញ្ញាឆ្នាំ១៩៨៥ នេះ បានភ្ជាប់នូវផែនទីចំនួន ៤០ផ្ទាំង ជាផែនទីប្រភេទ UTM ខ្នាត ១លើ៥០ពាន់ គូសដោយរដ្ឋាភិបាលវៀតណាម និងសហរដ្ឋអាមេរិក។

ប្រធានគណៈកម្មាធិការព្រំដែនកម្ពុជា ដែលមានមូលដ្ឋានក្នុងប្រទេសបារាំង លោក ស៊ាន ប៉េងសែ មានប្រសាសន៍ថា ផែនទីរបស់អាមេរិកាំង និងផែនទីដែលគូសដោយរដ្ឋាភិបាលវៀតណាមនេះ គឺផែនទីខុស ពីព្រោះផែនទីទាំងនេះ បានធ្វើឲ្យបាត់ព្រំដែនខ្មែរយ៉ាងច្រើនចូលក្នុងទឹកដីវៀតណាម។

ផែនទីដែលសម្ដេចព្រះបាទ នរោត្តម ស៊ីហនុ ដាក់តម្កល់នៅអង្គការសហប្រជាជាតិ ជាផែនទីគូសដោយបារាំង ខ្នាត ១លើ១រយពាន់ បានន័យថា មួយសង់ទីម៉ែត្រនៅលើក្រដាស ស្មើនឹង ១គីឡូម៉ែត្រនៅលើដី។ ចំណែកផែនទីដែលគូសដោយវៀតណាម និងសហរដ្ឋអាមេរិក មានខ្នាត ១លើ៥០ពាន់វិញ បានន័យថា ១សង់ទីម៉ែត្រនៅលើក្រដាស ស្មើនឹង២គីឡូម៉ែត្រនៅលើដី។

ក្រុមអ្នកជំនាញខាងកិច្ចការព្រំដែនខ្លះនិយាយថា តាមរយៈផែនទីខ្នាត ១លើ៥០ពាន់នេះ អាចឲ្យកម្ពុជាបាត់ភូមិរបស់ខ្លួនមួយចំនួននៅតាមតំបន់ព្រំដែនចូលក្នុងទឹកដីវៀតណាម។

ក្នុងរយៈពេលចុងក្រោយនេះ រដ្ឋាភិបាលវៀតណាម ប្រកាសទាមទារយកភូមិរបស់ខ្មែរចំនួនពីរ គឺភូមិអន្លង់ជ្រៃ និងភូមិផ្លុកត្រាច ស្ថិតក្នុងខេត្តកំពង់ចាម ថា ភូមិទាំងពីរនេះស្ថិតក្នុងបន្ទាត់ព្រំដែនរបស់វៀតណាម។

ប៉ុន្តែលោក វ៉ា គឹមហុង មានប្រសាសន៍ថា ភូមិអន្លង់ជ្រៃ និងភូមិផ្លុកត្រាច នេះ ស្ថិតក្នុងទឹកដីវៀតណាម តាមរយៈផែនទីខ្នាត ១លើ១រយពាន់ ដែលគូសដោយបារាំង។

លោកបន្តថា ក្រៅពីភូមិទាំងពីរនេះ ក៏នៅមានភូមិជាច្រើនទៀតក្នុងទឹកដីខ្មែរ ជារបស់វៀតណាម ហើយក៏មានភូមិជាច្រើនទៀតជារបស់ខ្មែរក្នុងទឹកដីវៀតណាម។ លោកថា ហេតុដូច្នេះ កម្ពុជា និងវៀតណាម នឹងត្រូវធ្វើការដោះដូរភូមិគ្នាទៅវិញទៅមក ហើយបន្តកិច្ចសហប្រតិបត្តិការបោះបង្គោលព្រំដែនរវាងប្រទេសទាំងពីរឲ្យបានច្បាស់ថែមទៀត។

ទោះបីជាយ៉ាងណាក៏ដោយ លោក ស៊ាន ប៉េងសែ អះអាងថា ភូមិអង្លង់ជ្រៃ ដែលជាភូមិកំណើតរបស់លោក ហេង សំរិន ប្រធានរដ្ឋសភាជាតិកម្ពុជា នោះ ស្ថិតក្នុងទឹកដីខ្មែរ ផ្អែកតាមផែនទីដែលបារាំងបានគូសនៅឆ្នាំ១៨៧៣។

លោកបញ្ជាក់ថា ប្រសិនបើភូមិទាំងនោះជារបស់វៀតណាម មែន វៀតណាម ប្រាកដជាមិនបានទុកឲ្យពលរដ្ឋខ្មែររស់នៅរហូតមកទល់សព្វថ្ងៃនេះឡើយ។

ក្រុមអ្នកឃ្លាំមើលនិយាយថា ដោយសារតែសន្ធិសញ្ញាបំពេញបន្ថែមឆ្នាំ២០០៥ ដែលធ្វើឲ្យសន្ធិសញ្ញាឆ្នាំ១៩៨៥ មានភាពស្របច្បាប់ ផ្អែកលើផែនទីដែលគូសជាឯកតោភាគីដោយវៀតណាម នោះហើយ ទើបវៀតណាម អាចឆ្លៀតឱកាសទាមទារយកភូមិរបស់ខ្មែរបន្ថែម។

ព្រឹត្តិបត្រឯកសារប្រចាំខែឈ្មោះ BMD របស់សម្ដេចព្រះបាទ នរោត្តម ស៊ីហនុ កាលពីថ្ងៃទី១៨ ខែធ្នូ ឆ្នាំ២០០៤ បានសរសេរថា លោក វ៉ា គឹមហុង ហ៊ានយកផែនទីក្លែងក្លាយនៃប្រទេសកម្ពុជា មកទូលភូតកុហកព្រះអង្គថា ជាផែនទីភូមិសាស្ត្រនៃសង្គមរាស្ត្រនិយម។

ទាក់ទិននឹងបញ្ហានេះ លោក ប៉ាង សុខឿន ដែលជាអតីតប្រធានចលនានិស្សិត ដើម្បីលទ្ធិប្រជាធិបតេយ្យ និងជាអ្នកចុះត្រួតពិនិត្យផ្ទាល់អំពីស្ថានភាពព្រំដែនកម្ពុជា-វៀតណាម មានប្រសាសន៍ពីប្រទេស Finland មកថា ផែនការបោះបង្គោលព្រំដែនថ្មី ដែលកម្ពុជាបានព្រមព្រៀងធ្វើឡើងជាមួយវៀតណាម ស្របតាមសន្ធិសញ្ញាបំពេញបន្ថែមឆ្នាំ២០០៥ នោះ កំពុងធ្វើឡើងផ្ទុយពីកិច្ចព្រមព្រៀងទីក្រុងប៉ារីស។

លោកបន្តថា កិច្ចការដោះដូរភូមិរបស់ខ្មែរជាមួយវៀតណាម ឬផែនការបោះបង្គោលព្រំដែនថ្មី ជារឿងសំខាន់សម្រាប់ប្រទេសជាតិទាំងមូល ប៉ុន្តែរដ្ឋាភិបាលកម្ពុជាមិនបានដាក់រឿងនេះ ឲ្យជជែកសួរដេញដោលក្នុងសភាជាតិ ឬមានការព្រមព្រៀងពីព្រះមហាក្សត្រនោះឡើយ។

គណៈកម្មាធិការព្រំដែនដែលមានមូលដ្ឋានក្នុងប្រទេសបារាំង ឲ្យដឹងថា សន្ធិសញ្ញាឆ្នាំ១៩៨៥ និង២០០៥ ជាសន្ធិសញ្ញាខុសច្បាប់ ដែលធ្វើឲ្យបាត់ព្រំដែនគោករបស់កម្ពុជាប្រមាណពី ៤ពាន់ទៅ៦ពាន់គីឡូម៉ែត្រក្រឡា ហើយថា សន្ធិសញ្ញាទាំងពីរនេះប្រាសចាកពីផែនទីរបស់ខ្មែរ ដែលកំពុងតម្កល់ក្នុងអង្គការសហប្រជាជាតិឆ្នាំ១៩៦៤ ខ្នាត ១លើ១រយពាន់ ដែលទទួលស្គាល់ជាអន្តរជាតិ។

ក្រុមអ្នកវិភាគខ្លះនិយាយថា សន្ធិសញ្ញាដែលធ្វើឡើងរវាងកម្ពុជា និងវៀតណាម ក្នុងឆ្នាំ១៩៨៥ នោះ គឺជាការឆ្លៀតឱកាសរបស់វៀតណាម នៅគ្រាដែលខ្លួនកំពុងត្រួតត្រាកម្ពុជា ហើយនៅខណៈដែលកម្ពុជាខ្លួនឯង មិនមានអ្នកជំនាញខាងកិច្ចការព្រំដែននាសម័យនោះ ដោយសារអ្នកចេះដឹងភាគច្រើន ត្រូវបានសម្លាប់ក្នុងរបបខ្មែរក្រហមអស់ស្ទើរគ្មានសល់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

ថាច់ ជឿង

ពី កម្ពុជាក្រោម

ពាក្យសំដីរបស់លោកហោ ណាំហុងកំពុងបន្ទរតាមអង្គការអាមេរិចមួយឈ្មោះ International Republican Institute (IRI) ថា កម្ពុជាកំពុងធ្វើដំណើរលើផ្លូវត្រូវ ។ យកល្អអង្គការអាយអាអាយ គួរបិទមាត់ទៅល្អជាង ឬមួយបិទទ្វារតែម្តង គឺបិទទាំងពីរ ទាំង NDI និង IRI ព្រោះអង្គការទាំងពីរនេះ មិនមានអ្វីចំណេញដល់ ស្រុកខ្មែរទេ ។

Jul 22, 2012 09:54 AM

phalla

ពី Phnom Penh

បើតាមយោបល់របស់ នេះមិនមែនជាការងារការទូតទេ បើប្រើពាក្យថាការថ្វាយជូនមហាមិត្ត ប្រហែលជាត្រូវជាង! ចងមិត្តជាមួយប្រទេសជិតខាង ជាទួនាទីរបស់ថ្នាក់ដឺកនាំដែលជាតំណាងប្រជាជន ដូចនេះមុននឹងថ្វើអ្វីគួរតែគិតដល់ចិត្តប្រជាជនជាមុន មិនមែនដើម្បីតែប្រយោជន៏មនុស្សមួយក្រុម នាំឧ្យខាតប្រយោជន៏ជាតិទាំងមូលនោះទេ....!!!

Jul 21, 2012 10:07 PM

Castro De La Monreo

ពី Paris, France

I am tired to hear all those craps. Everybody is acting like they are know everything, but b.s. participating comments from around the world relient to those foreign countries drew or mapped Khmer teritory. Now can you ask those countries to give you a hint to solve that problem, would they come to help you for free? or waiting for UN, or UNESCO to come and help you? No way my friends nothing for free or should I wait until you guys from oversea to become a head of state or prime minister and solve that problem? I just want to see the real teritory of Cambodia in this generation and made a history for our homeland then nobody can blame anyone those problems will solved. I do supported on this policy that the government being implemented , and I am not pro-government and not a vietnamese or thai and I am proud of myself as a Khmer and can handle of any situation.

Jul 21, 2012 01:06 PM

I love khmer

ខ្ញុំមិនអាចទទួលយកបានទេ តើថ្ងៃក្រោយៗទៅនៅមានស្រុកខ្មែរនេះទៀតដែរទេ?

Jul 21, 2012 12:58 AM

kon khmer

ពី Phnome Penh

ក្នុងនាមយើងជាខ្មែរទាំងអស់គ្នាគួរតែខិតខំរិះរកមធ្យោយដើម្បីជួយជាតិមាតុភូមិឲរួចផុតពីការជិះជាន់របស់យួន ក្នុងនាមខ្ញុំជាកូនខ្មែរម្នាក់ខ្ញុំពិតជាសោកស្តាយណាស់ដែលប្រជាពលរដ្ឋខ្មែរមួយភាគធំពុំមានការយល់ដឹងជ្រៅជ្រោះអំពីបញ្ហាអ្នកដឹកនាំ ក៍ដូចជាបក្សពួករបស់គេសព្វថ្ងៃនេះដែលកំពុងតែស្ថិតនៅក្រោមអំនាចគេ។ខ្ញុំសួមអំពាវនាវឲអ្នកស្នេហាជាតិទាំងអស់ទាំងក្នុងនឹងក្រៅប្រទេសជួយគ្នារកមធ្យោបាយដើម្បីជួយជាតិឲរួចផុតពីអំនាចគេ ហើយនាំគ្នាអភិវឌ្ឍន៍ជាតិឲរីកចំរើនដោយក្តីស្នេហាស្រលាញ់ជាតិពិតៗ។

Jul 21, 2012 12:56 AM

មើលមតិទាំងអស់.