លោកស្រី សៅ រៀម ម្តាយកុមារីរងគ្រោះរស់នៅក្នុងភូមិស្លាកែត ឃុំស្លាកែត ស្រុកបាត់ដំបង ខេត្តបាត់ដំបង បានមានប្រសាសន៍នាថ្ងៃចន្ទថា នគរបាលការិយាល័យជួញដូរមនុស្សនិងការពារអនីតិជនបានបង្ខំឲ្យលោកស្រីផ្តិតមេដៃទទួលយកសំណងចំនួន ២.០០០ដុល្លារជាថ្នូរនឹងជំងឺចិត្ត បញ្ឈប់ការប្តឹងផ្តល់ទៅតុលាការចំពោះការដែលជនល្មើសប្រព្រឹត្តអំពើអនាចារយ៉ាងឃោរឃៅទៅលើកូនរបស់លោកស្រី ៖ «តែគេដកហ្នឹងអស់៤០០[ដុល្លារ]»។
លោកស្រីបានបន្តថា កូនស្រីរបស់លោកស្រី អាយុ ១៦ឆ្នាំ កាលពីថ្ងៃទី២៥ ត្រូវបានឈ្មោះ ធំ ភេទស្រី មានទីលំនៅនៅភូមិវត្តលាប ឃុំចំការសំរោង ស្រុកបាត់ដំបង លួងបោកបញ្ឆោតយកទៅលក់ឲ្យបុរសពីរនាក់ឈ្មោះ ប៊ុន លី និង យិន ហ៊ត រស់នៅឃុំអូរចា ស្រុកបាត់ដំបង យកចូលក្នុងហាងខារ៉ាអូខេ ប៉ាស៊ីហ្វិកណាយ ក្នុងខេត្តបាត់ដំបង ដាក់ថ្នាំសម្រើបនិងថ្នាំងងុយដេកក្នុងទឹកដូងនិងទឹកស្រាបៀរចាប់បង្ខំឲ្យផឹករហូតទន់ខ្លួនលែងដឹងអី ទើបផ្តើមប្រព្រឹត្តអំពើអនាចារយ៉ាងព្រៃផ្សៃទៅលើរូបនាង។
កុមារី អាយុ១៦ឆ្នាំដែលរងការរំលោភបំពានដោយជនល្មើសចំនួនពីរនាក់ ឈ្មោះ ប៊ុន លី និង យិន ហ៊ត បានរៀបរាប់ថា ៖ «គេយកខ្ញុំទៅលូកលាន់លិចកើត គេច្របាច់ដោះហើយគេលូកក្នុងប្រដាប់ភេទ គេលាត់ដោះ»។
លោក គុយ ហ៊ាង ប្រធានការិយាល័យប្រឆាំងការជួញដូរមនុស្សនិងការពារអនីតិជននៃស្នងការខេត្តបាត់ដំបង អះអាងថា លោកមិនបានដឹងច្បាស់លាស់ជុំវិញករណីខាងលើនេះទេ ហើយបានជំរុញឲ្យទៅសួរមន្ត្រីផ្សេង។
លោក អ៊ុយ សំភា ព្រះរាជអាជ្ញាតុលាការខេត្តបាត់ដំបង បានមានប្រសាសន៍លោកទទួលរួចហើយនូវពាក្យបណ្តឹងរបស់ភាគីជនរងគ្រោះនៅព្រឹកថ្ងៃចន្ទនេះ ប៉ុន្តែមិនមានចំណាត់ការបែបណានោះទេ។
លោក យិន ម៉េងលី មន្ត្រីស៊ើបអង្កេតរបស់អង្គការការពារសិទ្ធិមនុស្សអាដហុក បានសម្តែងការសោកស្តាយចំពោះមន្ត្រីនគរបាលយុត្តិធម៌ដែលអនុវត្តផ្ទុយពីច្បាប់និងតួនាទី ៖ «បែរជានាំគ្នានិយាយ ពីការចរចាបទឧក្រិដ្ឋ ព្រោះនេះជាបទឧក្រិដ្ឋ ដែលទណ្ឌកម្ម[ត្រូវជាប់គុក]ពី ១០ទៅ១៥ឆ្នាំ»។
ទោះជាយ៉ាងណា លោក យិន ម៉េងលី បានថ្លែងថា ករណីនេះ លោកសង្ឃឹមថា ព្រះរាជអាជ្ញានៃតុលាការខេត្តបាត់ដំបង នឹងជំរុញឲ្យមានបណ្តឹងអាជ្ញាដើម្បីរក្សាកិត្យានុភាពនៃច្បាប់ ហើយថា សមាគមអាដហុកនឹងធ្វើលិខិតអន្តរាគមន៍ទៅលោកព្រះរាជអាជ្ញាដើម្បីចាប់ជនល្មើសដាក់គុក៕