កងកម្លាំងវិស្វកម្មម្នាក់សុំមិនបញ្ចេញឈ្មោះ បានថ្លែងប្រាប់វិទ្យុអាស៊ីសេរី នៅព្រឹកថ្ងៃច័ន្ទ ទី១១ សីហានេះថា កងកម្លាំងវិស្វកម្មលេខ៧-១៨ ចំនួន៤៧នាក់មិនបានទទួលប្រាក់់ឧបត្ថម្ភដែលក្នុងមួយខែ៣២ម៉ឺនរៀលនោះទេ ក្នុងរយៈពេលបីខែចុងក្រោយនេះ។
កងកម្លាំងវិស្វកម្មម្នាក់ទៀតសុំមិនបញ្ចេញឈ្មោះដែរនោះ បានមានប្រសាសន៍និងចោទប្រកាន់មេកងកម្លាំង ៧-១៨ ឈ្មោះ គុយ សុផល ថា បានកិបកេងថវិកាឧបត្ថម្ភរបស់ពួកគេ។
លោកបានបន្តទៀតថា មេរបស់លោកបានប្រព្រឹត្តអំពើពុករលួយច្រើនលើកមកហើយ កុំថាឡើយប្រាក់ឧបត្ថម្ភ សូម្បីតែប្រាក់ខែដែលទទួលបានម្នាក់ៗ ១៣ម៉ឺនរៀលក្នុងមួយខែ នៅពេលដែលចប់បេសកកម្មមកប្រចាំការនៅស្នាក់ការរបស់ខ្លួននៅស្រុកបាធាយនោះ ក៏ត្រូវបានគេកាត់ប្រាក់បាយចំនួន ៤៥.០០០រៀលវិញដែរ។
កងកម្លាំងវិស្វកម្មទាំងនោះបានត្អូញត្អែរថា ពួកគេមានការលំបាកខាងជីវភាពដោយប្រាក់ខែតិច ពួកគេបានសំណូមពរដល់រដ្ឋាភិបាលថ្មីអាណត្តិទី៤នេះ មេត្តាដំឡើងបា្រក់បៀវត្សរ៍ដល់ពួកគេផង និងកាត់បន្ថយនូវមន្រ្តីដែលបានប្រព្រឹត្តអំពើពុករលួយទាំងឡាយ។
មេកងកម្លាំង ៧-១៨ ឈ្មោះ គុយ សុផល បានច្រានចោលនូវការចោទប្រកាន់ខាងលើ ដោយមានប្រសាសន៍ថា លោកបានបើកប្រាក់ខែនិងប្រាក់ឧបត្ថម្ភឲ្យគ្រប់ៗគ្នាអស់ហើយ ប៉ុន្តែចំពោះអ្នកមួយចំនួនដែលមិនទទួលបានប្រាក់ឧបត្ថម្ភនោះ ដោយសារពួកគេមិនបានបំពេញការងារដល់ចប់នៃកាលកំណត់។
លោក គុយ សុផល មានប្រសាសន៍ដូច្នេះថា ៖ «ខ្លះបន់ឲ្យចប់ការងារទៅផ្ទះ អត់ទាន់បានបើកលុយ។ ហើយឈ្មោះដូចថា ៤០នាក់ចុងក្រោយហ្នឹង ត្រូវបានប្រាក់ខែឌុប ២ខែហ្នឹង ខ្ញុំបានស៊ីញ៉េហើយ ចំនួនប្រាក់ទៅតាមតារាងបើកចែកហ្នឹង»។
ទោះជាយ៉ាងណា សមាជិកកងកម្លាំងវិស្វកម្មខាងលើបានឆ្លើយតបវិញ ដោយមានប្រសាសន៍ថា ពួកគេបានធ្វើការមិនដែលឈប់នោះទេលើកលែងតែឈឺ។
លោកបានឲ្យដឹងទៀតថា ប្រាក់ឧបត្ថម្ភដែលលោក គុយ សុផល មិនបានបើកជូននោះមិនមែនការបំពេញបេសកកម្មតែមួយកន្លែងនោះទេ ដូចជាការសាងសង់ផ្លូវនៅឧដុង្គ ផ្លូវលេខ៥២ ក្នុងខេត្តកំពង់ស្ពឺ និងការជួសជុលផ្លូវ នៅស្រុកកំចាយមា ខេត្តព្រៃវែង ជាដើម។
លើសពីនេះទៀតក្នុងចំណោមពួកគេចំនួន ៤៧នាក់ បានចេញដំណើរជាបណ្តើរៗហើយ ទៅខេត្តឧត្តរមានជ័យដើម្បីចាប់ផ្តើមធ្វើការជួសជុលផ្លូវឡើងទៅប្រាសាទព្រះវិហារ។
ជាមួយគ្នានោះដែរ កងកម្លាំងវិស្វកម្មខាងលើដដែលនោះ បានបញ្ជាក់ទៀតថា ចំពោះកងកម្លាំងដទៃទៀត មិនមានបញ្ហាអ្វីនោះទេផ្នែកថវិកា មេរបស់គេបានបើកជូនរៀងរាល់ខែ ដូចជាកងកំម្លាំង លេខ ៧-១៦ និង ៧-១៧ ជាដើម៕