ការប្រឡងមធ្យមសិក្សាបឋមភូមិ សម័យប្រឡងថ្ងៃទី១៦ និង១៧ កក្កដា ឆ្នាំ២០១២ នឹងត្រូវប្រកាសលទ្ធផលស្ថាពរ នៅទូទាំងប្រទេស ចុងខែនេះ។
នៅក្នុងពេលលទ្ធផលប្រឡងមិនទាន់ប្រកាស នៅខេត្តកំពង់ចាម ក្រុមគ្រួសារសិស្សវិទ្យាល័យ ហ៊ុន សែន ពាមជីលាំង ស្រុកត្បូងឃ្មុំ ឲ្យដឹងថា មាននាយិការងវិទ្យាល័យ ហ៊ុន សែន ពាមជីលាំង បានបង្ខំសិស្សឲ្យសូកលុយដើម្បីបានប្រឡងជាប់។
គ្រូបង្រៀនវិទ្យាល័យពាមជីលាំង អ្នកស្រី អេង ម៉ាឡៃ នៅថ្ងៃទី៣០ កក្កដា មានប្រសាសន៍ថា ក្មួយរបស់អ្នកគ្រូត្រូវបាននាយិការងវិទ្យាល័យពាមជីលាំង ឈ្មោះ ស៊ាន សំអាត និងសហការីឈ្មោះ ហៃ ម៉ារី នៅថ្ងៃទី២៦ កក្កដា បានល្បួងទារលុយជាថ្នូរនឹងការប្រឡងជាប់។
អ្នកស្រីបន្តថា សិស្សរបស់អ្នកស្រីពីរនាក់ បានឲ្យលុយទៅនាយករងនោះរួចហើយ។ អ្នកស្រីបញ្ជាក់ថា ឪពុកម្តាយសិស្សមួយចំនួន នៅឃុំពាមជីលាំង ក៏បានទៅទាក់ទងនាយករងសាលានេះ ឲ្យជួយរត់ការឲ្យកូនខ្លួនបានប្រឡងជាប់ដែរ៖ «គាត់មកសួរនាំក្មួយខ្ញុំដែរថា បើចង់ជាប់ ឲ្យតែ៥០ទៅបានហើយ។ ក្មួយខ្ញុំមកសួរខ្ញុំថា គួរទិញពិន្ទុអត់។ ខ្ញុំប្រាប់ថា មើលសមត្ថភាពខ្លួនឯង បើធ្វើបានច្រើន មិនបាច់ទិញពិន្ទុទេ»។
ទន្ទឹមនឹងនេះ ពលរដ្ឋម្នាក់នៅឃុំពាមជីលាំង ដែលសុំមិនបញ្ចេញឈ្មោះ មានប្រសាសន៍ថា អ្នកស្រីនាយិការងវិទ្យាល័យ ហ៊ុន សែន ពាមជីលាំង អ្នកស្រី ស៊ាន សំអាត មិនមែនជាអ្នកជួយសិស្សដោយផ្ទាល់នោះឡើយ ប៉ុន្តែគាត់ជាឈ្មួញកណ្ដាល ដែលជួយរកលុយឲ្យថ្នាក់លើប៉ុណ្ណោះ៖ «មិនមែនគាត់ធ្វើឲ្យជាប់ទេ តែគាត់ជាអ្នករត់ការជួយ ព្រោះគាត់ស្គាល់គេអីចឹង អ្នកដែលដឹងមុខមានម្នាក់ និងអ្នកមកទំនាក់ទំនងមានច្រើនគ្នា»។
យ៉ាងណាក៏ដោយ នាយិការងវិទ្យាល័យ ហ៊ុន សែន ពាមជីលាំង អ្នកស្រី ស៊ាន សំអាត មានប្រសាសន៍ថា អ្នកស្រីមិនបានធ្វើដូចការចោទប្រកាន់ឡើយ។ អ្នកស្រីបន្តថា ការចោទថាអ្នកស្រីបញ្ចុះបញ្ចូលសិស្សឲ្យសូកលុយ៥០ដុល្លារជាថ្នូរនឹងការប្រឡងជាប់ ជារឿងមិនពិត៖ «អ៊ីចឹង ពីណាអ្នករាយការណ៍ ខ្ញុំចង់ដឹង។ ខ្ញុំអត់ដឹងទេ ខ្ញុំអត់ផង ខ្ញុំនឹងធ្វើការតវ៉ា អត់ពិតទេការងារនេះ»។
វិទ្យុអាស៊ីសេរី មិនអាចទាក់ទងមន្ត្រីមន្ទីរអប់រំខេត្តកំពង់ចាម ដើម្បីសុំការអត្ថាធិប្បាយបានទេ នៅថ្ងៃទី៣០ កក្កដា ឆ្នាំ២០១២។
ការប្រឡងមធ្យមសិក្សាបឋមភូមិ ប្រព្រឹត្តិទៅរយៈពេលពីរថ្ងៃ នៅថ្ងៃទី១៦ និង១៧ កក្កដា ឆ្នាំ២០១២ ដោយប្រកាសលទ្ធផលជាផ្លូវការនៅភ្នំពេញ នាថ្ងៃទី៣០ ខែកក្កដា និងនៅតាមបណ្ដាខេត្ត ក្រោយការប្រកាសនៅភ្នំពេញមួយថ្ងៃ។
កន្លងទៅ សង្គមស៊ីវិលរកឃើញថា ការប្រឡងមធ្យមសិក្សាបឋមភូមិ និងទុតិយភូមិ នៅកម្ពុជា តែងតែកើតមានអំពើពុករលួយ តែមន្ត្រីរដ្ឋាភិបាលតែងបដិសេធរបាយការណ៍ទាំងនោះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែ ប៉ុណ្ណោះ។