អាជ្ញាធរស្រុកប្រាសាទបល្ល័ង្ក រងការចោទថាមានអំពើពុករលួយ
អគ្គនាយកអង្គការ អភិរក្សជលផល បរិស្ថាន សត្វព្រៃ និងព្រៃឈើ ខេត្តកំពង់ធំ លោក ស៊ុន សាមេឃ ចោទថា ការដែលអាជ្ញាធរស្រុកប្រាសាទបល្ល័ង្ក មិនអនុញ្ញាតច្បាប់អោយអង្គការរបស់លោកលើទីស្នាក់ការ គឺដោយសារមន្ត្រីទាំងនោះមានការឃុបឃិតគ្នា និងប្រើប្រាស់អំពើពុករលួយជាលក្ខណៈប្រព័ន្ធ។
លោក ស៊ុន សាមេឃ មានប្រសាសន៍បន្តទៀតថា លោកបានដាក់ពាក្យសុំជាលាយលក្ខណ៍អក្សរទៅអាជ្ញាធរដែនដីនៅភូមិថ្នល់ ឃុំសាគ្រាម រួចរាល់ហើយ បន្ទាប់មកក៏បានដាក់សំណើសុំមកសាលាស្រុកប្រាសាទបល្ល័ង្កបន្ត ដើម្បីទទួលបានការអនុញ្ញាតបន្ថែម។ ប៉ុន្តែ ផ្ទុយទៅវិញ លោក ទូច សុខា អភិបាលស្រុកប្រាសាទបល្ល័ង្ក និងលោក គង់ សំអាត អភិបាលស្រុកប្រាសាទបល្ល័ង្ក បានហៅ លោកទៅសួរនាំ ជជីកសួររកប្រភពចំណូលក្នុងអង្គការ និងសួររកអ្នកឧបត្ថម្ភ និងអោយដាក់លេខទូរស័ព្ទផង។ លោកថា បើតាមអង្គការរបស់លោកឃ្លាំមើលឃើញថា ចំណុចដែលលោកសុំដាក់ទីស្នាក់ការនោះ គឺជាចំណុចឆ្នាំងបាយរបស់ពួកគាត់ ហើយក៏ជាកន្លែងមួយអាជ្ញាធរទាំងនោះដាក់ម៉ាស៊ីនសម្រាប់អារឈើ នៅក្នុងដែនជម្រកសត្វជារៀងរាល់ថ្ងៃ និងឈ្មួញទាំងអស់បានបង់លុយទៅអោយប្រធានដែនជម្រកសត្វចំនួន ១លានរៀលក្នុង ១ខែៗ។
លោក ស៊ុន សាមេឃ៖ «ខ្ញុំអត់ដាក់ស្នាក់ការទេ ព្រោះនៅកន្លែងហ្នឹងមានបទល្មើសព្រៃឈើក្នុងមួយថ្ងៃៗ ចេញ ៦០ឡានដាក់ម៉ាស៊ីនអារនៅក្នុងជម្រកសត្វ គ្រប់គ្រងដោយលោក អាត ប៊ុនអឿន ប្រធានដែនជម្រកសត្វអូសខ្ចង់ ចំណុចអូសខ្ចង់ស្ថិតនៅក្នុងឃុំសាគ្រាម។ ចំណុចមួយ ដែលធ្វើអោយអង្គការរបស់ខ្ញុំមិនអាចបោះទីតាំងបាន គឺជាការបិទបាំងអំពើពុករលួយមួយ ដែលប្រព្រឹត្តជារៀងរាល់ថ្ងៃនោះ»។
ដោយឡែកលោក ទូច សុខា អភិបាលស្រុកប្រាសាទបល្ល័ង្ក មានប្រសាសន៍ថា មូលហេតុ ដែលលោកមិនអនុញ្ញាតអោយដាក់ទីស្នាក់ការនោះ គឺដោយសារតែលក្ខខណ្ឌមួយចំនួន ដែលអង្គការនោះ មិនទាន់បានបំពេញគ្រប់គ្រាន់។ លោកបន្តទៀតថា លោកចង់ដឹងថា តើសកម្មភាពអ្វីខ្លះ ដែលអង្គការនោះបានធ្វើក្នុងរយៈពេលមួយឆ្នាំៗ នោះ។
លោក ទូច សុខា៖ «អត់មានទេគ្រាន់អោយគាត់បំពេញតាម ហើយគ្រាន់តែអោយបំពេញផែនការសកម្មភាពភ្ជាប់ជាមួយនឹងពាក្យសុំរបស់គាត់ជាការស្រេចហើយ»។
លោក ស៊ុន សាមេឃ បានបញ្ជាក់បន្ថែមទៀតថា អង្គការរបស់លោកធ្វើការទៅលើការផ្សព្វផ្សាយច្បាប់ស្ដីពីព្រៃឈើ សត្វ ច្បាប់ជលផល ច្បាប់បរិស្ថាន និងច្បាប់ផ្សេងៗ ទៀត ជាពិសេស ជួយបង្រៀនពីវិធីបណ្ដុះផ្សិត បណ្ដុះកូនឈើ ចិញ្ចឹមត្រី ហើយមិនទាន់ទទួលជំនួយ ឬប្រាក់ឧបត្ថម្ភពីសប្បុរសជន ឬប្រទេសណាមួយនៅឡើយទេ។ សព្វថ្ងៃមានការចូលរួមបរិច្ចាគពីសមាជិកក្នុងអង្គការតែប៉ុណ្ណោះ។ លោកថា ធ្វើសកម្មភាពការងារក្នុងក្របខណ្ឌជាអង្គការអព្យាក្រឹត្យ មិនប្រកាន់និន្នាការនយោបាយ មិនប្រកាន់ពូជសាសន៍ មិនប្រកាន់សាសនា មិនធ្វើសកម្មភាពបម្រើអោយគណបក្សនយោបាយ និងមិនធ្វើជាឧបករណ៍គណបក្សនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
Actually the government and authority have committed corruption all along. The authority at Balang in this case just got the corruption virus from the government.
Jun 18, 2012 09:37 AM
អ្នកតាមដាន
ពី សន្ទុក ខេត្ត កំពង់ធំតាមពិតទៅ លោកអភិបាលស្រុកប្រាសាទបាលង្ល័ និង បក្សពួក របស់គាត់តែងតែសួរដេញដោលទៅអង្គការសង្គមស៊ីវិល ជានិច្ច ទង្វើនេះគាត់ធ្វើជាយូរមកហើយ ។ ដោយសារតែខ្លាចក្រែងបាត់សំលែងឆ្នោតនៅឆ្នាំ ២០១៣ និងមួយទៀត ប្រហែលជាគិតកន្លែងនោះ មានតែអភិបាលស្រុក និង បក្សពួកប៉ណ្ណោះដែលអាចធ្វើបាន ស្រែកតែចិត្តនោះ ។ ខ្ញុំសូមឱ្យអភិបាលខេត្ត លោក ឈន់ ឈុន ត្រូវពិចារណា និង ចាត់វិធានការទៅមន្រ្តីអស់នេះ ។ ដើម្បីបើកផ្លូវឱ្យអង្គការ សង្គមស៊ីវិលមានឪកាសអភិវឌ្ឍន៍សង្គម ក្នុងខេត្ត កំពង់ធំ ។
Jun 17, 2012 10:15 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
