នេះជាលើកទី១ហើយដែលស្ថានទូតជប៉ុន បានឧបត្ថម្ភដល់មន្ត្រីបម្រើការងារនៅអង្គភាពប្រឆាំងអំពើពុករលួយឲ្យទទួលបាននូវបទពិសោធន៍ថ្មីៗបន្ថែមទៀតពីប្រទេសជប៉ុន ដើម្បីប្រយុទ្ធប្រឆាំងអំពើពុករលួយនៅប្រទេសកម្ពុជា។
នៅក្នុងពិធីជូនដំណើរមន្ត្រីអង្គភាពប្រឆាំងអំពើពុករលួយទៅទស្សនកិច្ចប្រទេសជប៉ុន នៅថ្ងៃទី១៧ ឧសភា ឆ្នាំ២០១១ អនុប្រធានអង្គភាពប្រឆាំងអំពើពុករលួយ លោក ឃៀង សេង មានប្រសាសន៍ថា មន្ត្រីរបស់អង្គភាពចំនួន ២០រូប ដែលក្នុងនោះមានស្ត្រីចំនួន ៣រូប និងបុរសចំនួន ១៧រូប នឹងចេញទៅប្រទេសជប៉ុនរយៈពេល ៨ថ្ងៃ គឺចាប់ពីថ្ងៃអង្គារ ទី១៧ ឧសភា រហូតដល់ថ្ងៃទី២៤ ឧសភា ទើបត្រឡប់មកកម្ពុជាវិញ។
លោក ឃៀង សេង មានប្រសាសន៍បន្តថា ៖ «មន្ត្រីវ័យក្មេងរបស់យើងនឹងសិក្សាត្រងត្រាប់នូវអ្វីដែលសំខាន់ ជាពិសេសច្បាប់ជប៉ុន អ្វីដែលមេរៀនដ៏ល្អពីប្រទេសជប៉ុន សម្រាប់កម្ពុជាយើង អ្វីដែលសំខាន់គឺបទពិសោធន៍ និងជំនាញពិតប្រាកដ ដែលយើងបានទៅសិក្សានៅប្រទេសគេ ហើយកន្លងមកក៏យើងបានសិក្សានៅប្រទេសគេច្រើនដែរ ជប៉ុនក៏ចាត់ទុកថា ជាលើកទី១ សម្រាប់អង្គភាពដែលបានសហការជាមួយអង្គភាពក្នុងការបញ្ជូនមន្ត្រីរបស់យើងដ៏ច្រើននេះ»។
មន្ត្រីអង្គភាពប្រឆាំងអំពើពុករលួយដែលបានចេញទៅទស្សនកិច្ចនេះ គឺបានទទួលការឧបត្ថម្ភគាំទ្រពីគម្រោងឈ្មោះថា ទំនាក់ទំនងផ្លាស់ប្ដូរបទពិសោធន៍សម្រាប់សិស្ស និងយុវជនរវាងប្រទេសជប៉ុន និងបណ្ដាប្រទេសអាស៊ីបូព៌ារបស់ស្ថានទូតជប៉ុន ប្រចាំនៅកម្ពុជា ដែលហៅកាត់ជាភាសាអង់គ្លេសថា JENESYS Programme។
លេខាធិការទី១ នៃស្ថានទូតជប៉ុនប្រចាំនៅកម្ពុជា លោក កាវ៉ាងុជិ ម៉ាសាគិ (Masaki KAWAGUCHI) បានថ្លែងប្រាប់អ្នកកាសែតជាភាសាខ្មែរថា វិធានការ ឬនយោបាយប្រឆាំងអំពើពុករលួយជាវិស័យមួយដ៏សំខាន់ ហើយរដ្ឋាភិបាលប្រទេសជប៉ុន បានគាំទ្ររដ្ឋាភិបាលកម្ពុជា ក្នុងការប្រឆាំងអំពើពុករលួយដើម្បីអភិវឌ្ឍសេដ្ឋកិច្ចសង្គមជាការទាក់ទាញអ្នកវិនិយោគទុនមកកាន់កម្ពុជា។
លោកបន្ថែមថា ៖ "ប្រទេសជប៉ុនក៏ដូចជាប្រទេសដទៃទៀតដែរ គឺថា មានអំពើពុករលួយមែន ប៉ុន្តែដោយសាររដ្ឋាភិបាលជប៉ុន យកចិត្តទុកដាក់ក្នុងការបង្ក្រាបបទល្មើសពុករលួយ ដូច្នេះខ្ញុំសង្ឃឹមថា មន្ត្រីវ័យក្មេងអង្គភាពប្រឆាំងអំពើពុករលួយក៏អាចយកមេរៀនបទពិសោធន៍ពីប្រទេសជប៉ុន"។
មន្ត្រីជាន់ខ្ពស់នៃអង្គភាពប្រឆាំងអំពើពុករលួយបានឲ្យដឹងថា កន្លងមកអង្គភាពនេះបានបញ្ជូនមន្ត្រីរបស់ខ្លួនទៅហ្វឹកហ្វឺនយកបទពិសោធន៍ និងរបៀបស៊ើបអង្កេតបទល្មើសអំពើពុករលួយនៅប្រទេសមួយចំនួន ដូចជាប្រទេសម៉ាឡេស៊ី ប្រ៊ុយណេ សិង្ហបុរី និងប្រទេសឥណ្ឌូណេស៊ីជាដើម។
នៅក្នុងដំណើរទស្សនកិច្ចប្រទេសជប៉ុននេះដែរ មន្ត្រីអង្គភាពប្រឆាំងអំពើពុករលួយ នឹងបានរៀនអំពីវិធានការប្រឆាំងអំពើពុករលួយ អំពីក្រមសីលធម៌សម្រាប់សាធារណៈ ស្ថានភាពបង្ក្រាបថ្មីៗលើករណីអំពើពុករលួយនៅជប៉ុន ហើយមានប្រធានបទផ្សេងៗទៀត ដែលទាក់ទងទៅនឹងនីតិវិធីប្រយុទ្ធប្រឆាំងអំពើពុករលួយជាដើម។
មន្ត្រីទាំងនោះក៏មានឱកាសធ្វើទស្សនកិច្ចនៅសម្ពន្ធភាពជប៉ុន-កម្ពុជា និងការិយាល័យព្រះរាជអាជ្ញាសាធារណៈនៅទីក្រុងយ៉ូកាហាម៉ា (YOKAHAMA) និងទីក្រុងណាហ្កាណូ (NAGANO) ដើម្បីឲ្យបានយល់ដឹងកាន់តែប្រសើរពីវប្បធម៌ និងផ្នែកឧស្សាហកម្មប្រចាំតំបន់របស់ជប៉ុនផងដែរ៕