សាលាឧទ្ធរណ៍គ្រោងសើរើសំណុំរឿងប្ដឹងទាស់របស់លោកស្រី ផេង គន្ធាបូរី នៅពេលឆាប់ៗនេះ ដើម្បីបើកសវនាការ ប៉ុន្តែមន្ត្រីសាលាឧទ្ធរណ៍មិនទាន់អាចកំណត់កាលបរិច្ឆេទភ្លាមៗទេ។
អនុប្រធានសាលាឧទ្ធរណ៍ និងជាចៅក្រមជម្រះក្តី លោក ជួ ស៊ុនឡេង បានមានប្រសាសន៍នៅថ្ងៃទី២៦ ខែមករា ថា សំណុំរឿងដែលចាំបាច់ គឺមិនអាចទុកយូរទេ៖ «ប្រហែល ១ខែអីទៅ។ ប៉ុន្តែរឿងហ្នឹង… បានច្រើនបន្តិច គាត់ (ចៅក្រម) ចែកមិនមែនម្ដងមួយៗទេ។ លើកលែងតែនៅឃុំ សុំនៅក្រៅឃុំ អាហ្នឹងច្បាប់ថា ឲ្យលើសពី ១៥ថ្ងៃ»។
មេធាវីការពារក្ដីឲ្យលោកស្រី ផេង គន្ធាបូរី គឺលោក ស៊ុយ ឈុនហាក់ បានមានប្រសាសន៍ថា លោកបានប្ដឹងទាស់កាលពីដើមខែមករា ឆ្នាំ២០១២ តាមសំណើរបស់កូនក្ដី ដោយសារតែកូនក្ដីមិនទទួលយកបាននូវសាលក្រមរបស់សាលាដំបូងរាជធានីភ្នំពេញ កន្លងមក៖ «ខ្ញុំសំណូមពរឲ្យតុលាការ (សាលាឧទ្ធរណណ៍) ជួយធ្វើចំណាត់ការ នីតិវិធីរបស់តុលាការឲ្យបានឆាប់រហ័សមក»។
ទាក់ទងសំណុំរឿងនេះ មេធាវីការពារក្ដីឲ្យលោក ជា ស៊ីម ប្រធានព្រឹទ្ធសភា គឺលោក ណាច ទ្រី ជាដើមបណ្ដឹងបានមានប្រសាសន៍ថា លោកបន្តការពារក្ដីនេះទៀត។
សាលាដំបូងរាជធានីភ្នំពេញ កាលពីថ្ងៃទី២៧ ខែធ្នូ ឆ្នាំ២០១១ កន្លងទៅនេះ បានប្រកាសសាលក្រមផ្ដន្ទាទោស លោកស្រី ផេង គន្ធាបុរី ជាអតីតទីប្រឹក្សាផ្ទាល់ និងជាប្រធានពិធីការរបស់លោក ជា ស៊ីម ឲ្យជាប់គុករយៈពេល ៤ឆ្នាំក្រោមបទឆបោក។
នៅពេលនោះដែរ សាលាដំបូងរាជធានីភ្នំពេញ ក៏បានផ្ដន្ទាទោសអតីតទីប្រឹក្សាចំនួន ៣នាក់ទៀត មានដូចជា លោក ខៀវ បូរ៉ា ឲ្យជាប់គុក ៣ឆ្នាំ។ លោក ចាន់ កុសល្យ ឲ្យជាប់គុក ៤ឆ្នាំ និងលោក ពន្លក ហូ ឲ្យជាប់គុក ៤ឆ្នាំ ក្រោមបទឆបោក។ ក្រៅពីនេះ តុលាការក៏បានផ្ដន្ទាទោសកំបាំងមុខពាណិជ្ជករជនជាតិម៉ាឡេស៊ី (Malaysia) ឈ្មោះ ឌីណូ (Dyno) ឲ្យជាប់គុក ៤ឆ្នាំ ក្រោមបទឆបោក។
នគរបាលបានចាប់ខ្លួនលោកស្រី ផេង គន្ធាបូរី នៅថ្ងៃទី២៨ ខែកញ្ញា ឆ្នាំ២០១១ កន្លងទៅនេះ នៅច្រកព្រំដែនកម្ពុជា-ថៃ ឈ្មោះ ចាំយាម នៅខេត្តកោះកុង។
ការចាប់ខ្លួននោះ គឺក្រោយពីនគរបាលបានរកឃើញថា អ្នកទាំង ៤នាក់នោះ បានជាប់ពាក់ព័ន្ធនឹងអំពើឆបោកនៅក្នុងគំរោងអភិវឌ្ឍន៍ ចំនួន៥ ដែលមានតំលៃជាទឹកប្រាក់ចំនួនជិត ៦០០លានដុល្លារអាមេរិក ដើម្បីទាក់ទាញអ្នកវិនិយោគទុនពីប្រទេសចិន និងប្រទេសម៉ាឡេស៊ី ដើម្បីសាងសង់សាលារៀនមន្ទីរពេទ្យ ផ្លូវលំ និងរោងចក្រគ្រឿងយន្ត។
គម្រោងអភិវឌ្ឍន៍ដែលបានបែកធ្លាយរឿងអាស្រូវឆបោកនោះ គឺមានតំលៃ ១២០លានដុល្លារអាមេរិក គឺបានរៀបចំដោយជនជាតិម៉ាឡេស៊ី ឈ្មោះ ឌីណូ ឈ្មោះ ម៉ី (Mi) និងឈ្មោះ សែម៉ា (Sema) បន្លំខ្លួនធ្វើជាសេដ្ឋីមកវិនិយោគទុននៅកម្ពុជា តាមរយៈក្រុមទីប្រឹក្សារបស់លោក ជា ស៊ីមនោះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។