ជាមួយគ្នានេះតុលាការកំពូលដដែលបានណែនាំឲ្យប្រជាពលរដ្ឋចំនួន ៣៥គ្រួសារនោះប្តឹងទៅតុលាការសាលាដំបូងខេត្តកោះកុងវិញ ឲ្យជម្រះក្តីនេះជាថ្មីលើសំណុំរឿងនោះ។
ក្រុមហ៊ុនចំនួនពីរនោះមានឈ្មោះ ក្រុមហ៊ុន ហេង ហ៊ុយ និងក្រុមហ៊ុន សុខ ហុង បានរងការចោទថា គឺជាអ្នកប្តឹងផ្តល់គ្នាដណ្តើមនិងរឹបអូសដីធ្លីចំនួនជាច្រើនរយហិកតាកន្លងមក។
ប្រជាពលរដ្ឋឈ្មោះ ផាវ ញឿង នៅក្នុងភូមិព្រែកជីក ឃុំជីខក្រោម ស្រុកស្រែអំបិល ខេត្តកោះកុង ដែលបានទទួលលិខិតកាលពីថៃ្ងព្រហស្បតិ៍ថ្មីៗនេះ និងជាតំណាងឲ្យប្រជាពលរដ្ឋ ៣៥គ្រួសារនោះ បានថែ្លងថា គ្រួសារទាំងនោះកំពុងតែស្វែងរកមេធាវីពីអង្គការក្រៅរដ្ឋាភិបាលឲ្យជួយការពារក្តីនេះ។
អ្នកស្រី ផាវ ញឿង បានឲ្យដឹងថា ៖ «យើងមកពឹងពាក់មេធាវីខាងអង្គការអីដែរ ប៉ុន្តែខ្ញុំចង់អស់ខ្យល់ហើយ... គាត់បានត្រឹមតែពិគ្រោះយោបល់ និងរៀបចំឯកសារឲ្យយើងបានខ្លះអ៊ីចឹងណា៎! តែបើឲ្យកាន់រឿងក្ដីគឺគាត់អត់បានកាន់ទេ គាត់ជាប់រវល់»។
លិខិតរបស់តុលាការកំពូលបានចុះហត្ថលេខាដោយលោក ឌិត មន្ទី ជាប្រធាន កាលពីថៃ្ងព្រហស្បតិ៍ថ្មីៗនេះ បាននិយាយថា ការស្នើសុំឲ្យតុលាការកំពូលបើកការជម្រះជាថ្មីនៅក្នុងលិខិតថៃ្ងទី២ ខែកុម្ភៈថ្មីៗនេះ គឺពុំស្របតាមមាត្រា៣០៧ នៃក្រមនីតិវិធីរដ្ឋប្បវេណីនោះទេ ដោយបានហៅប្រជាពលរដ្ឋ ៣៥គ្រួសារនោះមិនមែនជាភាគីក្នុងសំណុំរឿងក្តីកន្លងមកនេះទេ។
ប៉ុន្តែលិខិតនោះបានណែនាំថា ប្រជាពលរដ្ឋចំនួន ៣៥គ្រួសារនោះអាចប្តឹងតវ៉ាទៅតុលាការសាលាដំបូងខេត្តកោះកុងបានតាមមាត្រា៣៦៥ នៃច្បាប់ក្រមនីតិវិធីរដ្ឋប្បវេណីដោយបង្កសំណុំរឿងថ្មី។
ប្រជាពលរដ្ឋមួយចំនួននៅក្នុងចំណោម ៣៥គ្រួសារនោះបានវិលត្រទ្បប់ទៅកាន់ភូមិស្រុកវិញនៅថ្ងៃនេះ នៅគ្រាដែលមានការបដិសេធដូច្នេះ។
ប្រធានក្រុមស៊ើបអង្កេតនៃអង្គការការពារសិទ្ធិមនុស្ស លីកាដូ លោក អំ សំអាត ដែលកំពុងតែតាមដានសំណុំរឿងនេះ បានមានប្រសាសន៍ថា ៖ «តុលាការកំពូលដែលបានចេញលិខិតឲ្យប្រជាពលរដ្ឋនេះ ខ្ញុំគិតថា វាមិនមែនជាលទ្ធផលល្អសម្រាប់ប្រជាពលរដ្ឋទេ ពីព្រោះយើងដឹងហើយថា គូទំនាស់រវាងលោក សុខ ហុង និងលោក ហេង ហ៊ុយ មែន ក៏ប៉ុន្តែដីដែលពីរនាក់ហ្នឹងកំពុងតែក្ដីក្ដាំ ហើយសាលាកំពូលបានសម្រេចសាលដីកាប្រគល់ទៅឲ្យអ្នកទាំងពីរនោះ ដីនេះគឺប្រជាពលរដ្ឋកំពុងតែរស់នៅ អ៊ីចឹងលោកជាសក្ខីជននៅក្នុងរឿងនេះ»។
កាលពីឆ្នាំ២០០៩កន្លងទៅ តុលាការកំពូលបានចេញសាលដីកាបង្គាប់ឲ្យអាជ្ញាធរមូលដ្ឋាន និងតុលាការសាលាដំបូងខេត្តកោះកុង អនុវត្តរឹបអូសដីធ្លីពីប្រជាពលរដ្ឋចំនួន ៣៥គ្រួសារនោះ ដែលមានចំនួនច្រើនរយហិកតាជាដីកសិកម្មដាំដើមឈើហូបផ្លែ នៅគ្រាដែលក្រុមហ៊ុន ហេង ហ៊ុយ និងក្រុមហ៊ុន សុខ ហុង បានប្តឹងផ្ដល់គ្នា ដណ្តើមយកដីធ្លីនោះ។ ក្រោយមកកាលពីថៃ្ងទី២៤ ខែតុលា ឆ្នាំ២០០៩កន្លងទៅ ព្រះមហាក្សត្រខែ្មរ ព្រះបរមនាថ នរោត្តម សីហមុនី បានចេញព្រះរាជសារលិខិតមួយជូនរដ្ឋមន្រ្តីក្រសួងយុត្តិធម៌ លោក អង្គវង្ស វឌ្ឍានា ឲ្យជួយពិនិត្យមើលសំណុំរឿងនេះដែលមានការតវ៉ារបស់គ្រួសារទាំងនោះ។ នៅពេលនេះពួកគាត់បានត្អូញត្អែរថា គ្មានដីធ្លីកសិកម្មទៀតទេដើម្បីបង្កបង្កើនផល៕