លោក គល់ មីឌី បានបញ្ជាក់នៅថ្ងៃទី១២ ខែមិថុនា ថា ដីកាកោះហៅនោះចុះហត្ថលេខាដោយព្រះរាជអាជ្ញាឈ្មោះ អ៊ឹម សុផាន កាលពីថ្ងៃទី៩ ខែមិថុនា ឲ្យចូលទៅបំភ្លឺតុលាការក្នុងនាមជាសាក្សីអំពីបទបង្ករបួសស្នាម និងធ្វើទារុណកម្ម ប៉ុន្តែករណីនេះលោកមិនបានស្ថិតនៅក្នុងព្រឹត្តិការណ៍ជាក់ស្ដែងស្ដីពីការវាយដំនោះឡើយ។ ដូច្នេះករណីកោះហៅនេះធ្វើឲ្យលោកមានមន្ទិលសង្ស័យ ប៉ុន្តែទោះជាយ៉ាងណា លោកនឹងចូលតាមកាលកំណត់។
លោក គល់ មីឌី មានប្រសាសន៍ដូច្នេះ ៖ «អត់មានបញ្ហាអីដែលត្រូវព្រួយបារម្ភទេ។ យើងមិនបានឃើញបទល្មើសកើតជាក់ស្ដែងទេ អ្វីដែលយើងនិយាយ គឺនិយាយទៅតាមការដាក់ពាក្យបណ្ដឹងរបស់ដើមចោទ អ៊ីចឹងយើងធ្វើសាក្សីវាហាក់ដូចជាគ្មានន័យអីផង»។
កាលពីថ្ងៃទី១៦ ខែមេសា ប៉ូលិសបានចាប់ឃាត់ខ្លួនក្មេងប្រុស ៣នាក់ ពីបទសង្ស័យថា បានលួចប្រាក់ចំនួន ១.៥០០ដុល្លារ ដោយមិនមានបង្ហាញដីកាពីតុលាការ។
នៅថ្ងៃទី១៩ ខែមេសា ក្មេងប្រុសឈ្មោះ បឿន ចាវ ត្រូវបានប៉ូលិសដោះលែងមកវិញ។ បឿន ចាវ និងម្ដាយបានមកកាន់ការិយាល័យអង្គការសិទ្ធិមនុស្សអាដហុក ឲ្យជួយធ្វើពាក្យបណ្ដឹងក្នុងករណីប៉ូលិសវាយដំលើរាងកាយ បឿន ចាវ។ ដោយឡែកឪពុករបស់ក្មេងប្រុសឈ្មោះ ឡូត លី វិញ ក៏បានសុំឲ្យអង្គការអាដហុក ជួយធ្វើពាក្យបណ្ដឹងដូចគ្នាដែរ ចោទប្រកាន់ទៅលើមន្ត្រីប៉ូលិសថា បានវាយដំកូនប្រុសរបស់ខ្លួនដែរ។
ក្មេងប្រុសឈ្មោះ ឡូត លី និងឈ្មោះ ចុច ចាន ត្រូវតុលាការចេញដីកាឃុំខ្លួនរហូតមកទល់នឹងពេលនេះ។
អ្នកសម្របសម្រួលអង្គការសិទ្ធិមនុស្សអាដហុក ខេត្តមណ្ឌលគិរី លោក សម សារិន បានថ្លែងថា តាមលោកដឹង ការកោះហៅមន្ត្រីសិទ្ធិមនុស្សលោក គល់ មីឌី មាន២ចំណុច គឺការសំដៅទៅលើការរាយការណ៍ពីអាយុរបស់ឈ្មោះ បឿន ចាវ គេអះអាងថា មិនមែនមានអាយុ ១៣ឆ្នាំទេ គឺមានអាយុ ១៦ឆ្នាំ។ ចំណុចមួយទៀត គេបានសំដៅលើការជួយធ្វើពាក្យបណ្ដឹងនោះថា មានការបន្ថែមបន្ថយពាក្យនៅក្នុងខ្លឹមសារបណ្ដឹង។
លោក សម សារិន មានប្រសាសន៍ថា ៖ «ប្រយោគឃ្លាបន្ថែមបន្ថយ អាហ្នឹងវាជាល្បោយអ្នកសរសេរទេ។ យើងមិនខ្វល់អារឿងហ្នឹងទេ សំខាន់កម្មវត្ថុនៃបណ្ដឹងរបស់ជនរងគ្រោះឲ្យយើងសរសេរហ្នឹង ប្ដឹងពីប៉ូលិសវាយធ្វើទារុណកម្ម»។
ព្រះរាជអាជ្ញាតុលាការខេត្តមណ្ឌលគិរី លោក អ៊ឹម សុផាន មិនអាចសុំសេចក្ដីពន្យល់ក្នុងរឿងនេះបាននៅឡើយទេ កាលពីព្រឹកថ្ងៃទី១២ ខែមិថុនា ដោយសារតែទូរស័ព្ទមិនអាចសន្ទនាគ្នាបាន។
ទោះជាយ៉ាងនេះក្ដី លោក ចាន់ សុវ៉េត ប្រធានផ្នែកអង្កេតអង្គការសិទ្ធិមនុស្សអាដហុក ថ្លែងថា ការបំភ្លឺតុលាការគឺជារឿងត្រឹមត្រូវក្នុងការជួយបំពេញជូនតុលាការអំពីលទ្ធផលនៃការស៊ើបអង្កេតនានា ដែលមន្ត្រីអាដហុក បានរកឃើញ ប៉ុន្តែមិនមែនឲ្យមន្ត្រីអាដហុក ធ្វើជាសាក្សីបានទេ៕