អ្នកសម្របសម្រួលសមាគមអាដហុក ខេត្តរតនគិរី លោក ប៉ែន ប៊ុណ្ណារ៍ បញ្ជាក់ថា ជាបទល្មើសព្រៃឈើ ដូច្នេះការដកហូតដីមិនមែនជាវិធានការគ្រប់គ្រាន់ទេ ៖ «អាជ្ញាធរដឹងថា ដីហ្នឹងជាដីព្រៃ ទ្រព្យសម្បត្តិទ្រព្យសម្បត្តិរបស់រដ្ឋហើយ ដូច្នេះត្រូវតែកសាងសំណុំរឿងបញ្ជូនទៅតុលាការ»។
វិទ្យុអាស៊ីសេរី ថ្ងៃអង្គារ មិនអាចសុំការអធិប្បាយពីអភិបាលរងខេត្ត លោក ជ័យ សាយឿន បានទេ ពីព្រោះលោកមិនទទួលទូរស័ព្ទដែលបានហៅចូលជាច្រើនលើក ហើយអភិបាលរងលោក ថង សាវុន ទូរស័ព្ទមិនអាចភ្ជាប់បាន ចំណែកអភិបាលខេត្ត លោក មួង ប៉យ និងនាយខណ្ឌរដ្ឋបាលព្រៃឈើស្តីទី លោក យ៊ូកាន វិមាន ទទួលទូរស័ព្ទហើយ ប៉ុន្តែឆ្លើយថាស្តាប់មិនបាន បន្ទាប់មកការហៅចូលលើកទី២ ទី៣ មិនមានអ្នកទទួល ហើយនៅថ្ងៃពុធ ទី១៧ កញ្ញា ឆ្នាំ២០០៨ ការទាក់ទងក៏មិនអាចភ្ជាប់បានដូចគ្នា។
យ៉ាងនេះក្តី តាមដីកាលេខ១២៧៤ ចុះថ្ងៃទី៥ កញ្ញា ឆ្នាំ២០០៨ របស់សាលាខេត្តរតនគិរី អភិបាលរងលោក ជ័យ សាយឿន បានចុះហត្ថលេខាដកហូតដីព្រៃ ៣១២ហិកតារនៅឃុំកិចុង ស្រុកបរកែវ ដែលមានជនពាក់ព័ន្ធចំនួន៣នាក់ មានវរសេនីយ៍ ឡេង ហុង អង្គភាព ង-៧០ ឈ្មោះ សេង ពិសិដ្ឋ និង ធឿ ញឹង ក៏ប៉ុន្តែទុករយៈពេល ៣០ថ្ងៃសម្រាប់ប្តឹងតវ៉ា។
វិទ្យុអាស៊ីសេរី ក៏មិនអាចសុំការបញ្ជាក់ពីវរសេនីយ៍ ឡេង ហុង បានទេ ដោយអ្នកទទួលទូរស័ព្ទលោកបដិសេធថា លោកមិននៅ។
ក៏ប៉ុន្តែលោក សេង ពិសិដ្ឋ បញ្ជាក់ថា គឺឈ្មោះភរិយារបស់លោកដែលមានភាគហ៊ុនក្នុងការទិញដីខាងលើចំនួន ៥០ហិកតារ រួមជាមួយលោក ឡេង ហុង ហើយទាំងអស់គ្នា បានលក់ដីទាំងអស់នោះ ទៅឲ្យឈ្មោះចេន យន់អន ម្ចាស់សណ្ឋាគារសុខសាន្ត ខេត្តស្ទឹងត្រែង ដែលបច្ចុប្បន្នជាប់ចោទក្នុងអំពើជួញដូរគ្រឿងញៀនរាប់ម៉ឺនដុល្លារ។
លោក សេង ពិសិដ្ឋ មានប្រសាសន៍ដូច្នេះថា ៖ «ចំណុចដែលយើងបានឆ្លងជំនាញឲ្យគេមើលអត់មានព្រៃទេ ដល់ចំណុចក្រោយដែលមានការភ្ញាក់ផ្អើលប៉ុន្មានសា គឺទាក់ទងនឹងម្ចាស់ក្រោយ»។
អ្នកសម្រួបសម្រួលនៃអង្គការគាំទ្រសម្ព័ន្ធភាពសហគមន៍ជនជាតិដើមខេត្តរតនគិរី លោក ឯក យោធិន មានប្រសាសន៍ថា លោកគាំទ្រសុំឲ្យមានចំណាត់ការចំពោះជនពាក់ព័ន្ធដូចគ្នា ៖ «មិនមែនតែត្រឹមដកហូតហើយ ចាត់ទុកថា ជាគុណសម្បត្តិនៃការចាត់វិធានការរបស់អាជ្ញាធរខេត្តនៅឡើយទេ»។
អ្នកភូមិជនជាតិដើមឃុំកិចុង ធ្លាប់បានដាក់ពាក្យបណ្តឹងតាំងពីឆ្នាំ២០០៧មក បន្ទាប់ពីមានការឈូសឆាយទៅលើតំបន់ព្រៃឈើនៅទីនោះ ហើយអាជ្ញាធរឃុំនិងស្រុកគឺជាអ្នកចុះហត្ថលេខាលើឯកសារលក់ដូរដីនៅតំបន់នោះ។
គួរបញ្ជាក់ដែរថា រឿងក្តីកាប់ព្រៃឈើយកដីរដ្ឋដូចគ្នានេះ តុលាការសាលាដំបូងក្រុងភ្នំពេញ សម្រេចផ្តន្ទាទោសអតីតអភិបាលរងខេត្តព្រះវិហារ លោក មាស សាវឿន ដាក់ពន្ធនាគារ ៩ឆ្នាំ និងពិន័យប្រាក់១០០លានរៀល និងផ្តន្ទាទោសមនុស្សពាក់ព័ន្ធ ១៤នាក់ផ្សេងទៀតដោយសារបានកាប់រានព្រៃឈើ ៤៧០ហិកតារដើម្បីយកដី៕