ជាមួយគ្នានេះ គណបក្សប្រជាជនកម្ពុជាដដែល បានប្រកាសផងដែរ បន្តគាំទ្របេក្ខភាពរបស់លោកនាយករដ្ឋមន្ត្រី ហ៊ុន សែន ធ្វើជានាយករដ្ឋមន្ត្រី នៅក្នុងអាណត្តិខាងមុខទៀត។
ការប្រកាសនេះ បានធ្វើឡើងនៅក្នុងឱកាស ដែលគណបក្សនេះកំពុងតែប្រារព្ធខួបលើកទី៥៩ ថ្ងៃកំណើតគណបក្សប្រជាជនកម្ពុជា ឆ្នាំ១៩៥១-២០១០ ក្រោមអធិបតីភាពរបស់លោក ជា ស៊ីម ប្រធានគណបក្ស និងលោក ហេង សំរិន ប្រធានកិត្តិយសគណបក្ស បានចូលរួម ប៉ុន្តែគេមិនបានឃើញលោក ហ៊ុន សែន អនុប្រធានគណបក្សនេះបានមកចូលរួមទេ។ ប្រភពនានាបានឲ្យដឹងថា លោកមានធុរៈ។
សមាជិក និងអ្នកគាំទ្រជាច្រើនពាន់នាក់ មកចូលរួមនៅក្នុងទីស្នាក់ការកណ្ដាលគណបក្សនេះ នៅក្នុងទីក្រុងភ្នំពេញ។ មន្ត្រីការទូតបរទេស ដែលបានចូលរួម មានដូចជា តំណាងទូតប្រទេសគុយបា កូរ៉េខាងជើង សិង្ហបុរី ប្រ៊ុយណេ ភូមា ជប៉ុន ចិន ឥណ្ឌូណេស៊ី ថៃ និងវៀតណាម។
ប្រធានគណបក្សប្រជាជនកម្ពុជា និងជាប្រធានព្រឹទ្ធសភា លោក ជា ស៊ីម បានអានសុន្ទរកថាថា គណបក្សប្រជាជនកម្ពុជា បន្តគាំទ្ររដ្ឋាភិបាលកម្ពុជា ក្នុងការបោះបង្គោលព្រំដែនជាមួយប្រទេសវៀតណាម និងលាវ ដល់ទីបញ្ចប់។
គណបក្សប្រជាជនកម្ពុជា បានថ្កោលទោសយុទ្ធនាការនានារបស់ក្រុមអគតិមួលបង្កាច់ការពិត ប្រឆាំងកិច្ចប្រឹងប្រែងរបស់រដ្ឋាភិបាលកម្ពុជា។ លោក ជា ស៊ីម បន្តថា ៖ «ម្យ៉ាងទៀត ទន្ទឹមនិងការខិតខំប្រឹងប្រែងរបស់យើង មជ្ឈដ្ឋានអគតិមួយចំនួន តែងតែរិះរកគ្រប់វិធីដើម្បីកម្ចាត់គណបក្សប្រជាជនកម្ពុជា»។
បញ្ហាព្រំដែនរវាងប្រទេសកម្ពុជា និងប្រទេសថៃ ប្រទេសលាវ និងជាពិសេសជាមួយប្រទេសវៀតណាម គេមើលឃើញថា កំពុងតែរងការរិះគន់យ៉ាងធ្ងន់ធ្ងរ ដោយគណបក្សប្រឆាំងសមរង្ស៊ី ដែលបានចោទប្រកាន់ថា ដំណើការបោះតម្រុយបង្គោលព្រំដែន មិនមានតម្លាភាព និងនាំឲ្យកម្ពុជាបាត់បង់ទឹកដីច្រើនរយម៉ែត្រ នៅក្នុងខេត្តស្វាយរៀង ខេត្តតាកែវ ដែលមានព្រំប្រទល់ជាប់ជាមួយប្រទេសវៀតណាម។
តំណាងរាស្ត្រគណបក្សប្រឆាំងសមរង្ស៊ី លោក គឹម សួភិរិទ្ធិ និងជាមន្ត្រីអ្នកនាំពាក្យ បានមានប្រសាសន៍ប្រតិកម្មទៅនឹងការប្រកាសរបស់គណបក្សប្រជាជនកម្ពុជា នៅថ្ងៃច័ន្ទ ទី២៨ ខែមិថុនានេះថា ៖ «ដោយសារតែគណបក្សប្រជាជនជំពាក់គុណពីប្រទេសជិតខាង ដែលធ្លាប់ជួយខ្លួននៅក្នុងទសវត្សឆ្នាំ១៩៨០ កន្លងមកហ្នឹង។ អ៊ីចឹងត្រូវតែទទួលយកដំណោះស្រាយហ្នឹង ទោះបីជាចង់មិនចង់ក៏ដោយ គឺត្រូវតែឆ្លើយតប ជាសំណងអ្វី ជាមួយនិងប្រទេសជិតខាងហ្នឹង»។
ប្រធានគណៈកម្មការទទួលបន្ទុកកិច្ចការព្រំដែនកម្ពុជា លោក វ៉ា កឹមហុង បានមានប្រសាសន៍សាទរចំពោះការប្រកាសរបស់គណបក្សប្រជាជនកម្ពុជានោះ ៖ «គឺថា លោកបានគាំទ្រអ្វីដែលរាជរដ្ឋាភិបាល ក្នុងការបោះបង្គោលខណ្ឌព្រំសីមារវាងកម្ពុជា ជាមួយប្រទេសវៀតណាម។ កម្ពុជា ជាមួយលាវ ហើយនិងបន្តការខិតខំ ការដោះស្រាយបញ្ហាកម្ពុជាជាមួយប្រទេសថៃទៀត»។
ឯកសារនានា និងប្រភពពីមន្ត្រីជំនាញកិច្ចការងារព្រំដែនកម្ពុជា បានឲ្យដឹងថា ប្រទេសកម្ពុជា មានព្រំដែនជាប់ជាមួយប្រទេសវៀតណាម ប្រវែង ១២២៨គ.ម.។ កម្ពុជា និងវៀតណាម មានផែនការបញ្ចប់ការបោះបង្គោលព្រំដែននៅចុងឆ្នាំ២០១២។ ភាគីទាំងពីរបានបោះបង្គោលព្រំដែនបានជាង ១៩០បង្គោលមកហើយ នៅក្នុងបង្គោលព្រំដែនសរុប ៣៧៥បង្គោល។
កម្ពុជាមានព្រំដែនជាប់ជាមួយប្រទេសថៃ ប្រវែង ៨០០គ.ម. គឺមានបង្គោលព្រំដែនសរុបចំនួន ៧៣បង្គោល សេសសល់តាំងពីសម័យអាណានិគមនិយមបារាំង ឆ្នាំ១៩០៨ និងឆ្នាំ១៩០៩។ អ្នកជំនាញការព្រំដែន បានរកឃើញបង្គោលព្រំដែនចំនួន៣៣ហើយ។ គេកំពុងតែបន្តរាវរកបន្ថែមទៀត។
នៅចុងក្រោយនេះ កម្ពុជាមានព្រំដែនជាប់ជាមួយប្រទេសលាវ ប្រវែង ៥៤១គ.ម.។ ភាគីកម្ពុជា និងលាវ បានបោះចំនួន ១២៤បង្គោលមកហើយ នៅក្នុងចំណោមបង្គោលសរុបចំនួន ១៤៥បង្គោល៕