លោក ជាម យៀប សមាជិកសភានៃគណបក្សប្រជាជនកម្ពុជានិងជាប្រធានគណៈកម្មាការអចិន្រ្តៃយ៍នៃរដ្ឋសភាផងនោះ មានប្រសាសន៍ថា ប្រទេសកម្ពុជាមិនអាចធ្វើឲ្យលទ្ធិប្រជាធិបតេយ្យថយចុះបានទេ ពីព្រោះរដ្ឋាភិបាលកំពុងខិតខំពង្រឹងលទ្ធិប្រជាធិបតេយ្យ ហើយថារបាយការណ៍នេះរដ្ឋាភិបាលមិនអាចទទួលយកបានទេ ព្រោះថាប្រជាពលរដ្ឋកម្ពុជាគ្រប់រូបមានសិទ្ធិក្នុងការប្តឹងផ្តល់។
លោក ជាម យៀប បានមានប្រសាសន៍ថា ៖ «តំណាងអង្គការសហប្រជាជាតិនៅកម្ពុជាហ្នឹងចាំបាច់ត្រូវ Check balance (ពិនិត្យតុល្យភាព) ឲ្យបានច្បាស់លាស់ផងដែរ មិនគួរទៅយកបំរាមបន្តិចបន្តួច ត្រង់ណាក៏មានខុសដែរ»។
សូមជម្រាបថា យោងតាមរបាយការណ៍របស់ការិយាល័យនៃឧត្តមស្នងការទទួលបន្ទុកសិទ្ធិមនុស្សដែលបានចេញផ្សាយកាលពីថ្ងៃ១៥ មិថុនានោះ ថា ពាក្យបណ្តឹងជាច្រើនរបស់អាជ្ញាធរជាន់ខ្ពស់នៃកម្ពុជាដែលបានប្តឹងប្រឆាំងអ្នករិះគន់រដ្ឋាភិបាលក្នុងរយៈពេលថ្មីៗនេះ ដូចជាអ្នកនយោបាយ អ្នកកាសែតនិងមន្រ្តីនៃអង្គការសង្គមស៊ីវិលនោះ គឺហួសហេតុនិងមិនសមហេតុផល ហើយនោះជាការគំរាមកំហែងធ្ងន់ធ្ងរមួយដល់ការអភិវឌ្ឍនៃលទ្ធិប្រជាធិបតេយ្យ។
ប្រធាននៃមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា មជ្ឈមណ្ឌលរបស់លោកនិងអង្គការក្រៅរដ្ឋាភិបាលមួយចំនួនទៀត បានចេញរបាយការណ៍រួមគ្នាមួយកាលពីពេលថ្មីៗនេះដែរដូចនឹងរបាយការណ៍របស់ការិយាល័យនៃឧត្តមស្នងការទទួលបន្ទុកសិទ្ធិមនុស្សដែរអំពីការថយក្រោយនៃដំណើរការលទ្ធិប្រជាធិបតេយ្យនៅកម្ពុជា។ លោកថា លោកមានការសោកស្តាយដែលខាងរដ្ឋាភិបាលមិនទទួលស្គាល់ការពិត។
លោក អ៊ូ វីរៈ បានបញ្ជាក់ថា ៖ «នេះគឺជាការអនុវត្តច្បាប់ដែលខុសផ្ទុយពីគោលការណ៍ប្រជាធិបតេយ្យនិងសិទ្ធិមនុស្ស ហើយនិងខុសពីច្បាប់អន្តរជាតិហើយនិងរដ្ឋធម្មនុញ្ញនៃប្រទេសកម្ពុជាដែលជាច្បាប់របស់ប្រទេសយើងដែរ»។
នាយកប្រតិបត្តិនៃអង្គការខុមហ្វ្រែល លោក គល់ បញ្ញា មានប្រសាសន៍ថា ថ្វីត្បិតនៅក្នុងស្ថានភាពបច្ចុប្បន្ននៅកម្ពុជាមានការភ័យខ្លាចនៃសេរីភាពក្នុងការបញ្ចេញមតិបន្តិចមែនក្ដី ប៉ុន្តែលោកសង្ឃឹមថា រដ្ឋាភិបាលនឹងធ្វើការកែប្រែវិញនូវចំណុចទាំងនេះ។
រហូតមកទល់ពេលនេះអ្នកនយោបាយ រួមទាំងមន្រ្តីអង្គការក្រៅរដ្ឋាភិបាលនិងអ្នកកាសែតដែលត្រូវបានរដ្ឋាភិបាលប្តឹងនោះមានប្រមាណ៨នាក់ហើយ ក្នុងនោះក៏មានមួយចំនួនគេចខ្លួនទៅបរទេសផងដែរ។
ជាមួយគ្នានេះកាលពីល្ងាចថ្ងៃទី១៥ មិថុនា គណៈកម្មការអចិន្រ្តៃយ៍នៃរដ្ឋសភា បានសម្រេចដោយដាក់ក្នុងរបៀបវារៈនូវករណីព្យួរអភ័យឯកសិទ្ធិសភារបស់លោកស្រី មូរ សុខហួរ ដើម្បីសុំឲ្យសភាដកអភ័យឯកសិទ្ធិនៅដើមសប្តាហ៍ក្រោយ។
យ៉ាងនេះក្តីនៅក្នុងរបាយការណ៍ខាងលើបានឲ្យដឹងទៀតថា ការដកអភ័យឯកសិទ្ធិសភាឬការគំរាមកំហែងដកអភ័យឯកសិទ្ធិនោះក្នុងគោលបំណងបំភិតបំភ័យធ្វើឲ្យខូចតម្លៃដ៏សំខាន់នៃអភ័យឯកសិទ្ធិរបស់អ្នកតំណាងរាស្ត្រ៕