ក៏ប៉ុន្តែ ផ្ទុយពីនេះនៅខេត្តរតនគិរី មន្ត្រីតំណាងគណបក្សប្រជាជន បានចោទប្រកាន់ជាលើកដំបូងថា មន្ត្រីតំណាងគណបក្ស សម រង្ស៊ី រំលោភនីតិវិធីឃោសនាបោះឆ្នោតវិញម្តង។
តំណាងគណបក្សប្រជាជននៅថ្ងៃចន្ទ ទី២៨ ខែឧសភា ឆ្នាំ២០១២ ឲ្យដឹងថា សកម្មជនគណបក្សប្រឆាំង សម រង្ស៊ី បានបិតខិត្តប័ណ្ណរូបសញ្ញាឃោសនាគណបក្សនេះ នៅសាលាប្រជុំភូមិ របស់ប្រជាពលរដ្ឋជនជាតិដើមភាគតិច នៅឃុំភ្នំកុក ស្រុកវ៉ឺនសៃ ដែលជាកម្មសិទ្ធិសមូហភាពរបស់ប្រជាពលរដ្ឋក្នុងភូមិ ហេតុនេះប្រជាពលរដ្ឋដែលមាននិន្នាការគាំទ្រគណបក្សប្រជាជន ចាត់ទុកថាការបិតខិត្តប័ណ្ណនេះ ជាការរំលោភគោលការណ៍ឃោសនាបោះឆ្នោត។
អ្នកតំណាងរាស្ត្រខេត្តរតនគិរី និងជាមន្ត្រីជាន់ខ្ពស់គណបក្សប្រជាជនខេត្ត លោក ប៊ូ ឡាំ មានប្រសាសន៍បញ្ជាក់ថា លោកបានផ្តល់ព័ត៌មាននេះជូនមន្ត្រីរៀបចំការបោះឆ្នោតឃុំភ្នំកុករួចហើយ ដើម្បីបញ្ឈប់កុំឲ្យមានសកម្មភាពរំលោភច្បាប់បោះឆ្នោតនេះ កើតមានតទៅទៀត។ លោកបន្តថា ប្រជាពលរដ្ឋជាសមាជិកគណបក្សប្រជាជននៅតាមភូមិនានាក្នុងឃុំនេះ មិនយល់ស្របឲ្យយកសាលាប្រជុំរួមរបស់ប្រជាពលរដ្ឋជាកន្លែងបិតខិត្តប័ណ្ណឃោសនារបស់គណបក្សតែមួយនោះឡើយ។
លោក ប៊ូ ឡាំ៖ «គណបក្សប្រជាជនធ្វើសាលាឆទាន ហើយគណបក្ស សម រង្ស៊ី យកមកដាក់ផ្លាកម៉េច។ បងប្អូនជនជាតិយើង គេមានរោងកណ្ដាលភូមិណា សម្បត្តិរបស់រួមយើងដាក់ម៉េចនឹងកើត»។
ឆ្លើយតបចំពោះការលើកឡើងនេះ តំណាងគណបក្ស សម រង្ស៊ី ខេត្តរតនគិរី លោក រិន កញ្ញា បានទទួលស្គាល់ថា សកម្មជនអ្នកគាំទ្រគណបក្ស សម រង្ស៊ី ពិតជាបានយកផ្លាកសញ្ញាគណបក្សទៅបិតនៅសាលាប្រជុំរួមរបស់អ្នកភូមិមែន ក៏ប៉ុន្តែដោយសារមានការភ័ន្តច្រឡំថាសាលាប្រជុំភូមិជាកន្លែងសាធារណៈរបស់ប្រជាពលរដ្ឋទូទៅប្រើប្រាស់បាន។ លោកបន្តថា លោកបានសម្របសម្រួលឲ្យមន្ត្រីគណបក្សលោកនៅមូលដ្ឋាន ដករូបសញ្ញាឃោសនានោះចេញ ក៏ប៉ុន្តែប្រធានភូមិ នៃគណបក្សប្រជាជន បានប្រើអំណាចហែកយកខិត្តប័ណ្ណនោះទៅដុតចោលដោយអត្តនោម័តិ។
លោក រិន កញ្ញា៖ «ខាងខ្ញុំក៏បានផ្តល់ព័ត៌មានដែរ ខ្ញុំប្រាប់ថាបើនៅសាលាឃុំ សាលាភូមិ យើងមិនអាចបិតបានទេ អញ្ចឹងឲ្យគាត់ទៅបក ប៉ុន្តែគេបកហើយ បាត់អស់ហើយ។ នេះអត់មានការណែនាំអ្វីផង បើតាមបញ្ជាដូចរបស់ ប៊ូ ឡាំ ឲ្យបកណា»។
ប្រធានគណៈកម្មការឃុំរៀបចំការបោះឆ្នោតឃុំភ្នំកុក គឺលោក ហម ប៊ុណ្ណា បានអះអាងថា លោកគ្រោងសម្របសម្រួលជាមួយមន្ត្រីគណបក្ស សម រង្ស៊ី ឲ្យបកខិត្តប័ណ្ណនោះចេញពីសាលាប្រជុំភូមិ ដើម្បីបញ្ចប់បញ្ហា ក៏ប៉ុន្តែករណីប្រធានភូមិហែកខិត្តប័ណ្ណនោះទៅដុតចោល លោកមិនបានដឹងទេ។
លោក ហម ប៊ុណ្ណា៖ «ខ្ញុំហ្នឹងចង់សម្របសម្រួលជាមួយគណបក្ស សម រង្ស៊ី ថាធ្វើអញ្ចឹងវាខុសនឹងនីតិវិធីរបស់គណបក្សនយោបាយ អញ្ចឹងគាត់ដកចេញក៏ល្អម្យ៉ាងដែរ»។
លេខាគណៈកម្មការសង្កេតការណ៍ ដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល) ខេត្តរតនគិរី លោក ជួន ភីនណារ៉ា មានប្រសាសន៍បញ្ជាក់ថា ជំលោះ ឬបញ្ហាទាក់ទិនបញ្ហាបោះឆ្នោតដែលកើតមានក្នុងអំឡុងពេលឃោសនាបោះឆ្នោត គឺជាសមត្ថកិច្ចរបស់គណៈកម្មការរៀបចំការបោះឆ្នោត។ លោកបន្តថា ប្រធានភូមិដែលហែកខិត្តប័ណ្ណគណបក្សនយោបាយមួយ ដោយអត្តនោម័តិ គឺជាអំពើរំលោភច្បាប់បោះឆ្នោត។
លោក ជួន ភីនណារ៉ា៖ «វិធីគួរតែលោកមេភូមិដែលគាត់មាននិន្នាការក្នុងខ្លួនហើយ គាត់អាចជំរាបទៅគណៈកម្មការឃុំ-សង្កាត់រៀបចំការបោះឆ្នោត ហើយឲ្យគណៈកម្មការឃុំ-សង្កាត់ ជំរាបទៅគណបក្សនយោបាយទៅបើសិនណាយើងទៅហែករបស់គេវាចោលមានន័យថា រំលោភ សំខាន់ការសម្របសម្រួលគ្នា»។
ទាក់ទិនករណីនេះដែរ ប្រធានគណៈកម្មការខេត្តរៀបចំការបោះឆ្នោត (គ.ខ.ប) លោក ប៉ែន ឈុនឌី បញ្ជាក់ថា សាលាប្រជុំភូមិ គឺជាកម្មសិទ្ធិរួមរបស់ប្រជាពលរដ្ឋ ដូច្នេះការបិតខិត្តប័ណ្ណឃោសនានៅទីនោះ លុះត្រាមានការឯកភាពគ្នាពីប្រជាពលរដ្ឋគ្រប់និន្នាការនយោបាយ គណបក្សដែលបានចុះឈ្មោះប្រកួតប្រជែងនៅមូលដ្ឋាននោះ។ លោកបន្តថា ប្រធានភូមិមិនត្រូវហែកខិត្តប័ណ្ណរបស់គណបក្សនយោបាយ ដោយមិនមានការឯកភាពពីមន្ត្រីរៀបចំការបោះឆ្នោតនោះទេ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែ ប៉ុណ្ណោះ។