លោក ញឹម ចាន់ អាយុ៤៦ឆ្នាំ ពិការជើងឆ្វេង បានមានប្រសាសន៍នៅព្រឹកថ្ងៃទី៤ ខែមីនា ថា នៅព្រឹកថ្ងៃទី៣ ខែមីនា លោកបានដឹកអីវ៉ាន់ឲ្យគេមានស្បែកជើង ១កេស សាប៊ូ ១កេស និងខោអាវ ៤ដុំ ពីផ្សាររុងក្លឿថៃ បង់លុយឲ្យគយខ្មែរនៅមាត់ច្រក ១២ម៉ឺនរៀល ថ្លៃខោអាវ ៤ដុំ រួចក៏ដឹកបន្តមកដល់ផ្សាររ៉ា គយចល័ត៥នាក់បានចាប់ឃាត់ឲ្យបង់លុយទៀត។
លោក ញឹម ចាន់ បានឲ្យដឹងថា ៖ «ខ្ញុំបង់ពីក្នុងមកហើយ បង់គយប្រាសាទ។ គយប្រាសាទវាគិត ១ដុំ ៣ម៉ឺន បួនបីដង វា១២។ ខ្ញុំបង់ពីខាងប្រាសាទហើយមកចាប់ខ្ញុំទៀត វាមិនដែលមានអ៊ីចឹង! ហើយខ្ញុំថា អាប៉ិកខុមហ្នឹង (រងទីស្នាក់ការគយ) វាបញ្ជាកូនចៅវាឲ្យយកទៅតែម្ដង!»។
លោកបន្តថា ក្រុមគយបានចាប់ខោអាវ ៤ដុំ ទម្ងន់ ៣១០គីឡូក្រាម យកទៅទុកនៅទីស្នាក់ការ ហើយថ្លឹងគីឡូបង្ខំឲ្យលោកបង់លុយក្នុង ១គីឡូក្រាម ថ្លៃ៣,៦ដុល្លារ សរុបជាទឹកប្រាក់ប្រមាណ ១ពាន់ដុល្លារ តែលោកមិនមានលុយបង់ គ្រាន់តែជាអ្នកស៊ីឈ្នួលដឹកឲ្យគេ។
មន្ត្រីគយចល័តទាំង ៥នាក់ដែលរងការចោទនោះមានឈ្មោះ នង សុខុម, ឆាយ យ៉ាត, អ៊ាង ញ៉ឹម, អ៉ាវ គឹម ផា និង នួន ប៊ុនលី។
លោក ឆាយ យ៉ាត ជាមន្ត្រីម្នាក់ក្នុងចំណោមមន្ត្រីខាងលើបានបដិសេធមិនធ្វើអត្ថាធិប្បាយពិស្តារជុំវិញករណីខាងលើនេះទេ តែបញ្ជាក់ថា ការចាប់ខោអាវ៤ដុំខាងលើគឺមានបទបញ្ជាពីលោក ជួប អេន ប្រធានទីស្នាក់ការគយច្រកទ្វារប៉ោយប៉ែត ៖ «មេស្នាក់ការ មេគាត់បញ្ជាមកពីលើទៀត។ ខ្ញុំកូនចៅអត់ដឹងផែនការ!»។
លោក ជួប អេន ប្រធានទីស្នាក់ការគយច្រកទ្វារប៉ោយប៉ែត មិនអាចទាក់ទងសុំការបញ្ជាក់បានទេ ដោយទូរស័ព្ទលោករោទ៍ពុំមានអ្នកទទួល។
លោក ស៊ុម ចាន់គា មន្ត្រីសមាគមការពារសិទ្ធិមនុស្ស អាដហុក បានមានប្រសាសន៍រិះគន់ថា ករណីខាងនេះគឺជាការចាប់ជំរិត ពីព្រោះថា ខោអាវដែលជនពិការរូបនោះដឹកចូលមកដីខ្មែរត្រូវបានបង់លុយឲ្យគយខ្មែរនៅមាត់ច្រករួចហើយ។
លោក ស៊ុម ចាន់គា បានបញ្ជាក់ថា ៖ «យើងឃើញថា គាត់ជាជនពិការផង ហើយគាត់បានប្រើប្រាស់នូវកម្លាំងរបស់គាត់ដែលមានបន្តិចបន្តួចសម្រាប់ដោះដូរយកលុយកាក់សម្រាប់ចិញ្ចឹមជីវិត។ យើងឃើញថា អំពីបទល្មើសដែលទាក់ទងទៅគាត់ល្មើសច្បាប់ គឺមិនមានទេ ដោយសារតែគាត់បានបង់ត្រឹមត្រូវទៅដល់គយច្រករួចអស់ហើយ»។
សមាគមអាដហុកបានរិះគន់ថា ក្រុមគយចល័តនៅក្រុងប៉ោយប៉ែតបានប្រព្រឹត្តអំពើមិនប្រក្រតីជាច្រើនករណីក្នុងការចាប់ប្រជាពលរដ្ឋដឹកទំនិញលក់ដូរបន្តិចបន្តួចជំរិតយកលុយជាបន្តបន្ទាប់ ដែលករណីនេះលោកទាមទារឲ្យអគ្គនាយកដ្ឋានគយនិងរដ្ឋាករត្រូវពិនិត្យ និងចាត់វិធានការទប់ស្កាត់ឲ្យមានប្រសិទ្ធភាព៕