ប៉ុន្តែ ប្រភពពីអង្គការសង្រ្គោះកុមារ Save the children បាននិយាយពីប្រទេសថៃមកថា ចំនួនតួលេខមនុស្សស្លាប់នឹងមានទៅដល់ ៥ម៉ឺននាក់ ។
នៅជាមួយគ្នានោះដែរ មន្ត្រីក្រុងរ៉ង់ហ្គូនបានរាយការណ៍មកថា ចំនួនអ្នកបាត់ខ្លួនក៏បានកើនដល់ប្រមាណ ៤ម៉ឺន ១ពាន់នាក់នោះថែមទៀត ។
គេជឿថា ចំនួនមនុស្សស្លាប់ និងមានច្រើនជាងនេះទៅទៀតដោយសារតែខ្យល់ព្យុះ បាននាំទឹកជំនន់ប្រមាណជាង ៣ម៉ែត្រកន្លះ លិចលង់ភូមិអ្នកស្រុក ហើយនៅជាមួយគ្នានោះដែរ ចំនួនអ្នកស្រុកដែលបានស្លាប់ដោយសារតែសត្វពស់ចឹក ក៏ត្រូវគេរាយការណ៍មកថែមទៀត ។
ប្រភពពីវិទ្យុអាស៊ីសេរីភាសាភូមា បានរាយការណ៍មកថា នៅឯក្នុងកន្លែងឃុំឃាំងមួយក្នុងក្រុងរ៉ង់ហ្គូន ឆ្មាំល្បាតគុក បានបាញ់សម្លាប់អ្នកទោសចំនួន ៣៦នាក់ កាលពីថ្ងៃសៅរ៍ គ្រាដែលខ្យល់ព្យុះកំពុងបោកបក់ ដែលបណ្តាលឲ្យរបើកដំបូលគុកនិងធ្វើឲ្យអ្នកទោសជាច្រើនរងារ មិនអាចទ្រាំបាន ។ អ្នកទោសបាននាំគ្នាបង្កាត់ភ្លើងអាំងកំដៅ ប៉ុន្តែភ្លើងបានឆាបឆេះពន្ធនាគារដែលមានការចាក់សោរពីខាងក្រៅ ។
អ្នកទោសជាច្រើន យ៉ាងហោចណាស់ក៏ចំនួន ៣៦នាក់ដែរ ដែលបានព្យាយាមរត់ឡើងលើដំបូល ដើម្បីរត់ពីការឆាបឆេះ ត្រូវក្រុមឆ្មាំគុកបាញ់សម្លាប់ចោលនៅពេលនោះ ។
រហូតមកទល់ល្ងាចថ្ងៃអង្គារម្សិលមិញ សេចក្តីរាយការណ៍បានឲ្យដឹងថា មានមនុស្សជាច្រើន ដែលខ្វះទឹកនិងស្បៀងកំពុងតែចលាចលរកការជួយសង្គ្រោះ នៅគ្រាដែលរដ្ឋាភិបាលភូមានៅមិនទាន់អនុញ្ញាតឲ្យមានក្រុមជនបរទេសណាមួយ ចូលទៅជួយពីខាងក្រៅនោះឡើយ ។
ក្រុមមន្ត្រីភូមាបាននិយាយថា រាល់ជំនួយពីបរទេសត្រូវតែមានការចរចាជាមួយពួកគេនោះសិន ទើបនឹងមានការអនុញ្ញាតឲ្យពួកគេពីក្រៅបានចូលទៅជួយប្រជាជន ខ្លួនឯងនោះ ។
ក្រុមអ្នកត្រៀមជួយសង្គ្រោះពីក្រៅប្រទេសបានឲ្យដឹងថា ពួកគេបានត្រៀមខ្លួនរួចហើយ នៅពេលណាដែលមន្ត្រីក្រុងរ៉ង់ហ្គូន អនុញ្ញាតឲ្យពួកគេចូលទៅភ្លាមនោះ ។
រហូតមកទល់នឹងល្ងាចថ្ងៃអង្គារ រដ្ឋាភិបាលប្រទេសភូមា គ្រាន់តែបង្ហាញការចង់ទទួលពួកក្រុមអ្នកជួយសង្គ្រោះ ប៉ុន្តែនៅមិនទាន់និយាយដាច់ស្រេចអំពីបញ្ហាទិដ្ឋាការអនុញ្ញាត ចូលប្រទេសនោះឡើយ ។
មន្ត្រីនាំពាក្យអង្គការសុខភាពពិភពលោក លោកស្រី Vismita Grupta Smith បានប្រាប់វិទ្យុអាស៊ីសេរី យ៉ាងនេះថា ៖ «កាលណា ខ្ញុំបានទទួលការសម្រេចចិត្តពីរដ្ឋាភិបាលភ្លាមយើងក៏នឹងចាត់តាំងមន្រ្តីមួយរូប ពីអង្គការសុខភាពពិភពលោក WHO ឲ្យដឹកនាំកិច្ចការជួយសង្រ្គោះទាំងអស់ហ្នឹង ។ ដោយពិតទៅយើងមានការិយាល័យ WHO នៅក្នុងប្រទេសភូមាហើយ ហើយយើងក៏មានការិយាល័យនៅនឹងកន្លែងកើតហេតុនោះផងដែរ ក៏ប៉ុន្តែទំនាក់ទំនងត្រូវផ្ដាច់ ហើយជាការលំបាកក្នុងការទាក់ទង» ។
សំឡេងនៅឯខាងក្នុងប្រទេសនោះវិញ បុរសម្នាក់ក្នុងក្រុងរ៉ង់ហ្គូនបានរៀបរាប់អំពីស្ថានភាពក្នុងក្រុងរ៉ង់ហ្គូនយ៉ាងនេះថា ៖ «ដំបូលផ្ទះ បានប៉ើងដាច់ខ្តេចខ្ទីរ ។ សាលារៀនមួយនៅក្បែរនេះ បានក្លាយជាកន្លែងជម្រកមនុស្សដែលគ្មានផ្ទះសម្បែង ។ ផ្លូវថ្នល់ដាច់ខូចខាត ហើយរថយន្តពិបាកបើកចូលណាស់ ព្រោះត្រូវវាងនឹងគំនរបែកបាក់ ។ពួកយើងប្រមាណជាង ៦០០នាក់ មិនត្រូវបានអាជ្ញាធរជួយផ្តល់អាហារឲ្យនោះទេ មានតែអ្នកស្រុកជិតខាងតែប៉ុណ្ណោះ ដែលបានប្រមែប្រមូលអាហារ មកជួយគ្នាទៅវិញទៅមកនោះ» ។
រដ្ឋាភិបាលភូមាបានចេញសេចក្តីប្រកាសអាសន្នមួយ ឲ្យដឹងថា ក្រុងនិងរដ្ឋចំនួន ៥ រួមមាន ក្រុងរ៉ង់ហ្គូន អ៊ីរ៉ាវ៉ាឌី ប៉េហ្គូ រដ្ឋការ៉េន និងរដ្ឋមន គឺជាកន្លែងកំពុងតែរងគ្រោះនិងបានស្ថិតក្នុងសភាពអាសន្ន ។
សេចក្តីប្រកាសបានឲ្យដឹងផងដែរថា ការហោះហើរតាមជើងយន្តហោះទៅតំបន់ទាំង៥ ក៏ត្រូវលុបចោលផងដែរ ។
រូបភាពដែលបង្ហាញតាមទូរទស្សន៍នៅឯក្រៅប្រទេសបានបញ្ចាំងពីភាពមហន្តរាយដោយខ្យល់ព្យុះ ដែលបំផ្លាញបណ្តាញចរន្តអគ្គិសនី ផ្លូវថ្នល់ជាតិដាច់ខូចខាតខ្ទេចខ្ទីរ ផ្ទះជាច្រើនបានបាក់សង្កត់លើគ្នា ដើមឈើរាប់សិបម៉ឺនដើម ត្រូវខ្យល់គួចរំលើងដួលដេកសង្កត់រាយប៉ាយនៅតាមថ្នល់ កប៉ាល់និងទូកជាច្រើនគ្រឿង បានលិចលង់ ។
ក្រុមប្រទេសអាស៊ាន បានធ្វើសេចក្តីអំពាវនាវជាបន្ទាន់មួយ កាលពីថ្ងៃអង្គារ ដើម្បីរកការជួយពីសមាជិកនៃប្រទេសទាំង១០ ក្នុងតំបន់ ។
ប្រទេសកម្ពុជា ដែលជាសមាជិកមួយក្នុងតំបន់អាស៊ាន នៅមិនទាន់មានប្រតិកម្មតបសេចក្តីអំពាវនាវជាបន្ទាន់ចំពោះការជួយសង្គ្រោះនេះនៅឡើយទេ ប៉ុន្តែ មានសេចក្តីរាយការណ៍តាមកាសែតក្នុងស្រុកកាលពីម្សិលមិញថា នៅកម្ពុជា កម្មវិធីស្បៀងអាហារពិភពលោក ចាប់ពីថ្ងៃអង្គារ ទី៦ ឧសភា បានប្រមូលអំណោយសប្បុរសជនក្នុងប្រទេស រួមនឹងអាហារ ៥០០តោនផងដែរ ដើម្បីសម្រាប់ជួយប្រទេសភូមានោះ ។
កាលពីថ្ងៃអង្គារនោះទៀត ប្រទេសចិនបានសន្យាថា នឹងផ្តល់ប្រាក់ចំនួន ១លានដុល្លារចំពោះភូមាដែរ ក្នុងការជួយសង្គ្រោះ ។
ចំណែកស្ថានទូតសហរដ្ឋអាមេរិកប្រចាំភូមា ក៏បានផ្តល់ជំនួយ ២សែន៥ម៉ឺនដុល្លារក្នុងការជួយសង្គ្រោះជាបន្ទាន់ចំពោះមុខនេះផងទៀត ។ សហរដ្ឋអាមេរិកបានថ្លែងថា ជំនួយក្នុងការជួយជនរងគ្រោះភូមានឹងមានច្រើនជាងនេះទៅទៀត បើសិនជារដ្ឋាភិបាលភូមាអនុញ្ញាតឲ្យក្រុងវ៉ាស្ហ៊ីនតោន បានចូលទៅជួយផ្ទាល់ ។
ប្រធានាធិបតីសហរដ្ឋអាមេរិក ហ្សក ប៊ុស្ហ បានថ្លែងកាលពីថ្ងៃអង្គារ អំពាវនាវដល់មេដឹកនាំភូមា ដើម្បីរកការអនុញ្ញាតឲ្យសហរដ្ឋអាមេរិកបានចូលទៅជួយនោះ ។
នៅបន្ទាប់ពីប្រសាសន៍របស់លោកប្រធានាធិបតីអាមេរិកនោះមក មន្រ្តីក្រុងវ៉ាស្ហ៊ិនតោន បានសន្យាថា នឹងផ្តល់ជំនួយ ៣លានដុល្លារថែមទៀត ពីលើជំនួយ ២សែន៥ម៉ឺនដុល្លារមុននេះ ដែលសម្រាប់ការជួយដល់ប្រជាជនភូមា ។
នៅក្នុងការយកចិត្តទុកដាក់ពីសកលលោកនោះទៀតដែរ ពីអង្គការសហប្រជាជាតិ លោកអគ្គលេខាធិការ បាន គីមូន បានមានប្រសាសន៍ចូលរួមរំលែកទុក្ខយ៉ាងជ្រាលជ្រៅ ចំពោះព្រឹត្តិការណ៍សោកសៅ ដែលប្រជាជនភូមាបានជួបប្រទះ ។ អគ្គលេខាធិការអង្គការសហប្រជាជាតិបានសន្យានឹងជួយរកជំនួយអន្តរជាតិ ដើម្បីជួយប្រទេសភូមាតាមសេចក្តីចាំបាច់ ។
នៅជាមួយគ្នានេះដែរ សហព័ន្ធអន្តរជាតិនៃអង្គការកាកបាទក្រហម និងសមាគមអឌ្ឍច័ន្ទក្រហម បានឲ្យដឹងថា គេក៏បានផ្តល់ជំនួយ ២សែនហ្វ្រង់ ដែលស្មើនឹង ១សែន៩ម៉ឺនដុល្លារនៅក្នុងការជួយសង្គ្រោះប្រជាជនភូមាដែលរងគ្រោះនោះផងដែរ ។
ពីក្រុងវ៉ាទីកង់ ក្នុងប្រទេសអ៊ីតាលី នោះវិញ សម្តេចសង្ឃកាតូលិក Pope Benedict បានមានបន្ទូលក្នុងព្រះរាជសារសម្តែងការចូលរួមរំលែកទុក្ខជាមួយនឹងប្រជាជនភូមា ហើយក្នុងសារដដែល ព្រះអង្គបានសរសេរទៀតថា ព្រះអង្គមានជំនឿថា សហគមន៍អន្តរជាតិនឹងធ្វើការឆ្លើយតបដោយការបង្ហាញភាពសប្បុរសក្នុងការជួយជាជំនួយតាមសេចក្តីត្រូវការរបស់ភូមា ៕