ក្រុមជនប្រដាប់អាវុធដែលគេមិនទាន់ស្គាល់អត្តសញ្ញាណបានចាប់កូនស្រីរបស់ឧត្តមសេនីយ៍ត្រី ម៉ន សាម៉ុន ដែលជាមេបញ្ជាការកងរាជអាវុធហត្ថប្រចាំខេត្តសៀមរាប។
នៅថ្ងៃនេះក្រុមសមត្ថកិច្ចខេត្តបាននាំគ្នាចេញធ្វើប្រតិបត្តិការដើម្បីតាមរកនឹងរំដោះយកកូនស្រីលោកឧត្តមសេនីយ៍ត្រី ម៉ន សាម៉ុន នោះមកវិញ។
លោក សាវយុត ធ្វើសេចក្តីរាយការណ៍តាមរយៈការសាកសួរដែលមានខ្លឹមសារដូចតទៅនេះ៖
សាវយុត ៖ សូមជម្រាបថា កាលពីវេលាម៉ោងប្រមាណជា១:១០នាទីថ្ងៃត្រង់នេះមានការចាប់ជំរិតកូនស្រីរបស់មេបញ្ជាការប៉េអឹមប្រចាំខេត្តសៀមរាបមួយរូបដែលជនល្មើសមានគ្នាមួយក្រុមប្រមាណជា១០នាក់ ហើយបានចាប់កូនស្រីយកទៅខណៈពេលដែលកូនស្រីរបស់មេបញ្ជាការប៉េអឹមជាន់ខ្ពស់រូបនោះបានត្រឡប់មកពីសាលារៀនហើយបំណងបើករថយន្តចូលផ្ទះរបស់ខ្លួន។
ម៉ាយ៉ារិទ្ធិ ៖ តើសមត្ថកិច្ចមានបានចាត់កម្លាំងទៅការពារឬក៏ធ្វើវិធានការអ្វីដែរឬទេដើម្បីរំដោះយកកូនស្រីនោះមកវិញ?
សាវយុត ៖ ឥឡូវនេះខាងកងកម្លាំងប៉េអឹមនៅក្នុងខេត្តទាំងអស់បានចាប់ផ្ដើមធ្វើប្រតិបត្តិការតាមរកក្រុមជនសង្ស័យហើយក្នុងពេលបន្ទាប់ពីមានការចាប់ពង្រត់កូនស្រីយកទៅនោះគឺគេបានចាប់ខ្លួនជនសង្ស័យម្នាក់ដែលក្នុងចំណោមនោះបានបើករថយន្តរបស់ក្មេងស្រីរងគ្រោះហ្នឹងទៅកាន់ស្រុកពួកចម្ងាយប្រមាណជា២០គីឡូម៉ែត្រពីទីរួមខេត្តសៀមរាប ហើយបើតាមកងកម្លាំងបាននិយាយថា គេបានសាកសួរទៅលើជនសង្ស័យម្នាក់ដែលបានចាប់ខ្លួននោះ គឺពួកក្រុមចាប់ពង្រត់នោះមានគ្នាប្រមាណជា១០នាក់ហើយមានប្រដាប់អាវុធផង។
ម៉ាយ៉ារិទ្ធិ ៖ មានការសន្និដ្ឋានជំហានដំបូងចង់ដឹងថា តើមូលហេតុអ្វីបានជាមានការចាប់ជំរិតនោះ?
សាវយុត ៖ រហូតមកដល់ម៉ោង៥:៣០នាទីល្ងាចថ្ងៃទី៦ ខែមីនានេះហើយ យើងនៅមិនទាន់មានការដឹងច្បាស់អំពីមូលហេតុនៃការចាប់ពង្រត់នោះថាបណ្ដាលមកពីការជំរិតទារប្រាក់ឬក៏បណ្ដាលមកពីបញ្ហាអ្វីនៅឡើយទេ ព្រោះក្រុមកងកម្លាំងប៉េអឹមកំពុងតែប្រតិបត្តិការគ្រប់ទីកន្លែងទាំងអស់ បិទច្រកផ្លូវចេញចូលទៅរហូតដល់ខេត្តកំពង់ធំ ហើយរហូតទៅដល់ស្រុកក្រឡាញ់ ខេត្តសៀមរាប និងផ្លូវទឹក ផ្លូវគោកអីជាច្រើន ប៉ុន្តែមិនទាន់មានសញ្ញាអំពីមូលហេតុនៅឡើយ ទោះបីជាជនសង្ស័យដែលបានចាប់ខ្លួនម្នាក់នោះក៏មិនអាចឆ្លើយប្រាប់សមត្ថកិច្ចនៅឡើយដែរ។
សូមបញ្ជាក់ថា ក្មេងស្រីដែលជាកូនមេបញ្ជាការប៉េអឹមប្រចាំខេត្តសៀមរាបនោះ ឈ្មោះ ម៉ន ស្រីយ៉ា អាយុ១៦ឆ្នាំ ដែលកំពុងតែរៀននៅក្នុងវិទ្យាល័យអង្គរក្នុងទីរួមខេត្តសៀមរាប។ ការចាប់ខ្លួននេះគឺបើតាមសាក្សីបានប្រាប់ចុងក្រោយដែលនៅជិតកន្លែងកើតហេតុថា គេបានឃើញក្រុមជនចាប់ជំរិតនោះបានមកខ្វែលផ្ទះមេបញ្ជាការនោះប្រហែលជាពីរបីថ្ងៃមកហើយ គេឃើញមានជនខ្លះបានស្លៀកពាក់ជាឯកសណ្ឋានប៉ូលិស ហើយបានចាំឃ្លាំមើលនៅទីនោះ ប្លែកមុខប្រមាណជាបីថ្ងៃទើបមានព្រឹត្តិការណ៍ហ្នឹងកើតឡើង។
ម៉ាយ៉ារិទ្ធិ ៖ តើក្រុមជនទាំងដប់ហ្នឹងជាក្រុមនៅអង្គភាពណាមួយដែរឬទេ មានការសន្និដ្ឋានពីអាជ្ញាធរជំហានដំបូងនោះ?
សាវយុត ៖ រហូតមកដល់ពេលនេះព័ត៌មានដែលធ្លាយចេញពីកងសមត្ថកិច្ចមិនទាន់បានអ្នកណាបង្ហើបឲ្យច្បាស់នៅឡើយ។ គេគ្រាន់តែបានប្រាប់ថា ជននោះបានប្រើប្រាស់រថយន្តពីរគ្រឿង គឺម៉ាកកាមរីស៊េរី៩៥ ពណ៌ខ្មៅ ហើយនិងម៉ាកកាមរីឆ្លាមស៊េរីទំនើប ពណ៌ខ្មៅដែរ ធ្វើសកម្មភាពចាប់ពង្រត់កូនក្មេងនោះដាក់ឡានហ្នឹងចល័តយកទៅ ហើយទុកឡានជនរងគ្រោះហ្នឹងចោល ហើយឲ្យជនមួយទៀតបើកឡានជនរងគ្រោះ ប៉ុន្តែជនម្នាក់ដែលបានបើកឡានជនរងគ្រោះបានចាប់បាន ហើយមិនទាន់បានដឹងថាតើនៅក្នុងចំណោមជននោះមានការពាក់ព័ន្ធទៅនឹងតួនាទីអ្វីខ្លះ គឺមិនទាន់បានចម្លើយនៅឡើយ ហើយគ្រាន់តែសមត្ថកិច្ចខ្លះនិយាយថា ជនដែលចាប់ជំរិតនោះគឺមានយុទ្ធសាស្ត្រច្បាស់លាស់របស់គេដោយមានក្រុមអ្នកធ្វើសកម្មភាព មានក្រុមប្ដូរឡានសម្រាប់គេចពង្វៀងមនុស្សយកទៅ ហើយមួយក្រុមទៀតបានបើកឡានពង្វៀងដានទៅច្រកផ្សេង ព្រមទាំងទុកម៉ូតូម៉ាកវេវពណ៌ខ្មៅមួយគ្រឿង ផ្លាកលេខ ណ៣៨ ១៦ភព១ ចោលនៅកន្លែងកើតហេតុទៀត។ ដូច្នេះគេគិតថាក្រុមដែលធ្វើសកម្មភាពចាប់ជំរិតនេះគឺមានយុទ្ធសាស្ត្រហើយនិងមានការហ្វឹកហាត់ត្រឹមត្រូវតែប៉ុណ្ណោះ។
ម៉ាយ៉ារិទ្ធិ ៖ ដូច្នេះក្មេងស្រីដែលត្រូវបានចាប់ជំរិតនោះមិនទាន់បានរំដោះមកវិញទេ?
សាវយុត ៖ រហូតមកដល់ម៉ោង៥:៣០នាទីល្ងាចនេះ គឺមិនទាន់មានសញ្ញាថាតើក្មេងស្រីនោះទៅដល់កន្លែងណា ហើយសមត្ថកិច្ចកំពុងតែតាមរកមិនទាន់បានយកត្រឡប់មកវិញនៅឡើយទេ៕