នាយកប្រតិបត្តិអង្គការខុមហ្វ្រែល លោក គល់ បញ្ញា បានមានប្រសាសន៍ថាការឃោសនារបស់គណបក្សនីមួយៗ បានប្រព្រឹត្តទៅដូចតាមការគ្រោងទុក ហើយថាមិនទាន់មានការប៉ះទង្គិចគ្នាណាមួយដែលអាចប៉ះពាល់ដល់ដំណើរការនៃការឃោសនាបោះឆ្នោតនោះឡើយ ។
លោក គល់ បញ្ញា បានឲ្យដឹងថា ៖ «យើងអត់ទាន់បានទទួលរបាយការណ៍ណាដែលទាក់ទិននឹងភាពមិនប្រក្រតីធ្ងន់ធ្ងរពីការឃោសនាបោះឆ្នោតនេះ ។ យើងឃើញដំណើរការការឃោសនាហ្នឹងបានប្រព្រឹត្តទៅតាមអ្វីដែលគេបានគ្រោងទុក ទោះបីមុនការឃោសនាហ្នឹងមានខាងសាលាក្រុងចេញគោលការណ៍ណែនាំហាមផ្លូវមួយចំនួន ។ ដោយឡែកនៅទីក្រុងភ្នំពេញយើងឃើញគណបក្សនយោបាយគេធ្វើការឃោសនាទៅតាមដងផ្លូវធំៗបាន» ។
លោក គល់ បញ្ញា បានបន្ថែមទៀតថាអ្នកសង្កេតការណ៍ទាំង២១០នាក់របស់អង្គការលោកទូទាំងប្រទេសនឹងបន្តការងារសង្កេតការណ៍របស់ខ្លួនដោយយកចិត្តទុកដាក់ ដោយសារតែនៅប៉ុន្មានខែមុនការធ្វើយុទ្ធនាការឃោសនារកសំឡេងឆ្នោត ការគំរាមកំហែងខាងផ្នែកនយោបាយទៅលើសកម្មជនគណបក្សនានាមានការកើនឡើង ។
ចំណែកឯនាយកប្រតិបត្តិអង្គការនិចហ្វិក លោកបណ្ឌិត ហង្ស ពុទ្ធា ក៏បានមានប្រសាសន៍ប្រហាក់ប្រហែលនឹងលោក គល់ បញ្ញា ដែរថាសភាពការណ៍នៃយុទ្ធនាការឃោសនាបោះឆ្នោតនៅថ្ងៃដំបូងនេះ មានលក្ខណៈល្អប្រសើរ ហើយថាបើទោះបីជាក្បួនដង្ហែរបស់គណបក្សនយោបាយបានជួបគ្នាក៏ដោយ ក៏មិនមានការប្រើពាក្យសម្ដីវាយប្រហារគ្នាធ្ងន់ធ្ងរដែលអាចបង្កឲ្យមានអំពើហិង្សានោះឡើយ ។
លោកបណ្ឌិត ហង្ស ពុទ្ធា បានមានប្រសាសន៍ថា ៖ «បន្ទាប់ពីនេះខ្ញុំអត់ទាន់បានទទួលរបាយការណ៍ថាមានការប៉ះទង្គិច ។ ឃើញមានការជួបគ្នារវាងក្បួននិងក្បួន ប៉ុន្តែអត់មានការប៉ះទង្គិចគ្នាទេ គ្រាន់តែថាមានបញ្ហាស្ទះចរាចរណ៍ប៉ុណ្ណឹង» ។
ទោះជាយ៉ាងណាលោកបណ្ឌិត ហង្ស ពុទ្ធា បានស្នើសុំឲ្យអាជ្ញាធរមានសមត្ថកិច្ចជួយសម្រួលដល់ការឃោសនាដោយការនាំមុខក្បួនដង្ហែ ។ លោកបានមានប្រសាសន៍ថា តាមការសង្កេតឃើញរបស់អង្គការលោក មានយានយន្តរបស់សមត្ថកិច្ចដែលនាំមុខក្បួនដង្ហែខ្លះ បែរជាស្ថិតនៅចំកណ្ដាលនៃក្បួនដង្ហែតែម្ដង ដែលមើលទៅហាក់បីដូចជា កំពុងតែចូលរួមក្នុងក្បួនឃោសនានោះតែម្ដង ។
លោកបណ្ឌិត ហង្ស ពុទ្ធា បានមានប្រសាសន៍ថាអង្គការនិចហ្វិករបស់លោកបានដាក់ពង្រាយអ្នកសង្កេតការណ៍ចំនួនប្រមាណ៧.០០០នាក់ទូទាំងប្រទេស ។
គួរជម្រាបថាគណបក្សនយោបាយទាំង១១ដែលត្រូវចូលរួមក្នុងការបោះឆ្នោតសភាអាណត្តិទី៤ ឆ្នាំ២០០៨នេះ បានចាប់ផ្ដើមយុទ្ធនាការរកសំឡេងឆ្នោតខ្លួន នៅថ្ងៃ២៦ មិថុនានេះ ហើយការឃោសនានឹងប្រព្រឹត្តទៅរហូតដល់ថ្ងៃទី២៥ កក្កដា ឆ្នាំ២០០៨ ៕