រដ្ឋមន្ត្រីការពារជាតិកម្ពុជានឹងទៅទស្សនកិច្ចនៅសហរដ្ឋអាមេរិក
ដោយ សុខ សេរី
2009-09-16
មន្ត្រីជាន់ខ្ពស់នៃក្រសួងការពារជាតិកម្ពុជានឹងទៅបំពេញទស្សនកិច្ចនៅសហរដ្ឋអាមេរិកពីថ្ងៃទី១៨ ដល់ថ្ងៃទី២២ កញ្ញា ២០០៩។
លោក ទៀ បាញ់ ជាឧបនាយករដ្ឋមន្រ្តីនិងជារដ្ឋមន្រ្តីក្រសួងការពារជាតិនៃប្រទេសកម្ពុជា គ្រោងដឹកនាំគណៈប្រតិភូមន្រ្តីយោធាជាន់ខ្ពស់ចំនួន៥រូបទៅបំពេញទស្សនកិច្ចជាផ្លូវការជិត១សប្តាហ៍ ចាប់ពីថៃ្ងទី១៨ រហូតដល់ថៃ្ងទី២២ ខែកញ្ញាខាងមុខនេះ ដើម្បីទៅបើកការចរចាទ្វេភាគីរឹតចំណងទាក់ទងរវាងប្រទេសកម្ពុជានិងសហរដ្ឋអាមេរិកឲ្យកាន់តែរឹងមាំថែមទៀត ផ្តោតលើការធ្វើកិច្ចអន្តរាគមន៍ផែ្នកយោធាមនុស្សធម៌ក្នុងការសង្រ្គោះនៅគ្រាដែលមានគ្រោះមហន្តរាយនិងការប្រឆាំងអំពើភេរវកម្មនៅក្នុងតំបន់និងនៅក្នុងលំហសមុទ្រ។
លោកឧត្តមសេនីយ៍ឯក ឈុំ សុជាតិ ជាមន្រ្តីអ្នកនាំពាក្យរបស់ក្រសួងការពារជាតិនិងជាអនុរដ្ឋលេខាធិការនៃក្រសួងការពារជាតិប្រទេសកម្ពុជា បានមានប្រសាសន៍ប្រាប់វិទ្យុអាស៊ីសេរីថា ៖ «សំខាន់គឺបញ្ហាពិនិត្យលើលទ្ធភាពនៃការជួយសង្រ្គោះ គ្រោះមហន្តរាយ ដោះមីន បញ្ហាសង្រ្គោះមនុស្សធម៌ ពិនិត្យលើបញ្ហាសន្តិសុខតំបន់ សន្តិសុខដែនសមុទ្រ ប្រឆាំងភេរវកម្ម»។
លោកបានមានប្រសាសន៍បញ្ជាក់ថា គណៈប្រតិភូជាន់ខ្ពស់មានចំនួន៥រូបនោះ គឺមានមន្រ្តីយោធាជាន់ខ្ពស់ចំនួន៣រូប និង ២រូបទៀត គឺលោក ទៀ បាញ់ ជាឧបនាយករដ្ឋមន្រ្តីនិងជារដ្ឋមន្រ្តីក្រសួងការពារជាតិកម្ពុជា និងលោក ហ៊ុន ម៉ាណែត ជាកូនប្រុសរបស់លោកនាយករដ្ឋមន្រ្តី ហ៊ុន សែន និងជាមន្រ្តីជាន់ខ្ពស់ផងដែរនៃកងយោធពលខេមរភូមិន្ទកម្ពុជា។
ប្រភពដដែលបានឲ្យដឹងថា ការទៅបំពេញទស្សនកិច្ចនេះ គឺតាមការអញ្ជើញរបស់លោក Robert Gate ជារដ្ឋមន្រ្តីក្រសួងការពារជាតិ សហរដ្ឋអាមេរិក ហើយជាការបំពេញទស្សនកិច្ចនេះគឺជាលើកទី២ហើយ ចាប់តាំងពីឆ្នាំ១៩៩៥មក ក្នុងការទាក់ទងខាងវិស័យយោធារវាងកម្ពុជានិងអាមេរិកនោះ។
មិនអាចទាក់ទងបានទេនៅថៃ្ងពុធ ទី១៦ ខែកញ្ញា ដើម្បីសុំសេចក្តីអត្ថាធិប្បាយពីមន្រ្តីការទូតអាមេរិកប្រចាំកម្ពុជាជុំវិញដំណើរទស្សនកិច្ចខាងមុខនេះ។ ប៉ុន្តែលោកស្រី Carol Rodley ឯកអគ្គរដ្ឋទូតសហរដ្ឋអាមេរិកនៅក្នុងប្រទេសកម្ពុជា បានមានប្រសាសន៍កាលពីថៃ្ងទី៨ ខែកញ្ញាថ្មីៗនេះ នៅឯក្រសួងការបរទេសកម្ពុជាថា ទំនាក់ទំនងរវាងកម្ពុជានិងសហរដ្ឋអាមេរិក កាន់តែល្អប្រសើរទ្បើងថែមទៀត។
ដំណើរទស្សនកិច្ចជិតមួយសប្តាហ៍របស់គណៈប្រតិភូជាន់ខ្ពស់យោធាកម្ពុជាខាងមុខឆាប់ៗនេះ នឹងធ្វើទ្បើងនៅស្របពេលដែលប្រទេសកម្ពុជាមានគម្រោងបញ្ជូនលោក ហោ ណាំហុង ផងដែរ ជាឧបនាយករដ្ឋមន្រ្តីនិងរដ្ឋមន្រ្តីក្រសួងការបរទេសកម្ពុជាទៅទីក្រុងញូវយ៉ក សហរដ្ឋអាមេរិក ជាងមួយសប្តាហ៍ នៅថៃ្ងទី២២ ខែកញ្ញា ដើម្បីបើកការចរចាទេ្វភាគីជាមួយនឹងលោកស្រី Hillary Clinton ជារដ្ឋមន្រ្តីក្រសួងការបរទេសសហរដ្ឋអាមេរិក ផ្តោតលើការរឹតចំណងទាក់ទងរវាងកម្ពុជា និងសហរដ្ឋអាមេរិក ឲ្យកាន់តែរឹងមាំថែមទៀត។
សូមជម្រាបថា កាលពីថៃ្ងទី៤ ខែកញ្ញា កន្លងទៅថ្មីៗនេះ ស្ថានទូតសហរដ្ឋអាមេរិកនៅក្នុងប្រទេសកម្ពុជា បានចេញសេចក្តីប្រកាសមួយឲ្យដឹងថា សហរដ្ឋអាមេរិកបានប្រគល់ ឬផ្តល់សម្ភារៈយោធាជាច្រើនដែលមានតម្លៃជាទឹកប្រាក់ប្រមាណ ៦លាន៥សែនដុល្លារសហរដ្ឋអាមេរិក ក្នុងនោះ មានដូចជាមួកទាហានចំនួន១៦.០០០ ថង់ស្ពាយឬសាក់កាដូចំនួន៤.០០០ និងឯកសណ្ឋានការពារ ចំនួន៦.០០០ និងសម្ភារៈផ្សេងៗទៀត ដល់កងយោធពលខេមរភូមិន្ទកម្ពុជា៕
អត្ថបទដែលទាក់ទង
អតីតប្រធានាធិបតីអាមេរិកសម្ពោធផ្ទះសម្រាប់ជនក្រីក្រនៅខែត្រកណ្ដាល
ទីភ្នាក់ងារព័ត៌មានកម្ពុជានិងវៀតណាមបង្កើនកិច្ចសហប្រតិបត្តិការ
នាយករដ្ឋមន្ត្រីខ្មែរទៅចូលរួមកិច្ចប្រជុំអាស៊ាន-អាមេរិកនៅសិង្ហបុរី
ហោ ណាំហុង នឹងទៅចូលរួមកិច្ចប្រជុំកំពូលនៅអ៊ីតាលី
រដ្ឋាភិបាលកម្ពុជាគ្រោងចរចាជាមួយរុស្ស៊ីស្ដីពីបញ្ហាបំណុល
នាយករដ្ឋមន្ត្រីជប៉ុនប្រកាសជាថ្មីទៀតក្នុងការផ្តល់ជំនួយដល់កម្ពុជា
នាយករដ្ឋមន្ត្រីជប៉ុនបារម្ភពីបញ្ហាទំនាស់រវាងកម្ពុជានិងថៃ
នាយករដ្ឋមន្ត្រីខ្មែរគ្រោងទៅចូលរួមកិច្ចប្រជុំនៅជប៉ុន
កម្ពុជាត្រៀមធ្វើម្ចាស់ផ្ទះសមយុទ្ធយោធាទ្រង់ទ្រាយធំលើកដំបូង
កូរ៉េខាងត្បូងនឹងទទួលយកពលករខ្មែរ៣.៥០០នាក់បន្ថែមទៀត
