នៅព្រឹកថ្ងៃច័ន្ទ ទី២៦ ខែវិច្ឆិកា ឆ្នាំ២០១២ នេះ ក្រុមអ្នកយកព័ត៌មាន និងអ្នកថតវីដេអូវិទ្យុអាស៊ីសេរី បានទៅដល់ការដ្ឋានកាប់រានព្រៃយកដី សង្កេតឃើញថា ក្រៅពីដើមឈើដែលគេឈូសរំលំ និងឈូសគរទុកជាគំនរនោះ មិនឃើញមានកម្មករ ឬគ្រឿងចក្រអ្វីបន្តឈូសឆាយនៅទីនោះទៀតទេ។
តាមការពិនិត្យទីតាំងនោះឃើញថា រោងស្នាក់នៅរបស់ក្រុមកម្មករនៅទីនោះ ត្រូវបានរុះរើចេញថ្មីកាលពីយប់ថ្ងៃ២៥ វិច្ឆិកា នេះ បន្សល់តែតួឆ្អឹងរោងស្នាក់នៅតែប៉ុណ្ណោះ។ ក៏ប៉ុន្តែបើតាមមន្ត្រីអ្នកសម្របសម្រួលសមាគមអាដហុក ខេត្តរតនគិរី លោក ឆាយ ធី ដែលលោកបានចុះទៅដល់ការដ្ឋាននេះ កាលពីថ្ងៃអាទិត្យ ទី២៦ វិច្ឆិកា បានឲ្យដឹងថា កាលពីថ្ងៃ២៥ វិច្ឆិកា មានរោងប្រក់សំពត់កៅស៊ូមួយខ្នង មានកម្មករស្នាក់នៅប្រមាណ ៧ ទៅ ១០នាក់ និងឃើញមានគ្រឿងចក្រប្រភេទប៊ុលឌុលហ្សែ កំពុងឈូសឆាយរំលំដើមឈើនៅទីនោះមែន។
តាមមន្ត្រីមូលដ្ឋាន និងក្រុមសហគមន៍អ្នកការពារព្រៃនោះឲ្យដឹងថា ព្រៃនោះនៅចំណុចអូរចង្វា ភ្នំទ្រូ គឺជាព្រៃដែលមានលិខិតទទួលស្គាល់ដោយក្រសួងមន្ទីរជំនាញ និងមន្ត្រីមូលដ្ឋានបានដាក់ជាតំបន់ព្រៃការពាររបស់សហគមន៍ភូមិឡែ ឃុំលំជ័រ ស្រុកអូរយ៉ាដាវ ខេត្តរតនគិរី។
មេឃុំលំជ័រ គឺលោក សេវ ថ្វាន បានបញ្ជាក់ថា ក្រុមហ៊ុនសម្បទានសេដ្ឋកិច្ចឈ្មោះ ជា ច័ន្ទរិទ្ធ អភិវឌ្ឍន៍ បានចូលមកឈូសឆាយដីព្រៃនោះតាំងពីសប្ដាហ៍មុន ដោយសំអាងថា ដីតំបន់នោះក្រុមហ៊ុនបានការអនុញ្ញាតពីក្រសួងកសិកម្មឲ្យឈូសឆាយដីព្រៃជាង ៦០០ហិកតារ។
នាយខណ្ឌរដ្ឋបាលព្រៃឈើខេត្ត គឺលោក វង់ សុខសេរី នៅថ្ងៃទី២៦ វិច្ឆិកា បានបញ្ជាក់ថា ក្រុមហ៊ុនមានលិខិតអនុញ្ញាតឲ្យឈូសឆាយ ក៏ប៉ុន្តែលោកមិនអធិប្បាយអ្វីច្រើនទេ ដោយលោកបញ្ជាក់ថា មន្ត្រីជំនាញចុះទៅកាន់ទីនោះ និងកំពុងផ្ទៀងផ្ទាត់មើល។
រហូតមកទល់ពេលនេះ គេមិនទាន់រកឃើញថា តើអ្នកណាជាប្រធានក្រុមហ៊ុន ជា ច័ន្ទរិទ្ធ នោះទេ ក៏ប៉ុន្តែអ្នកមកប្រែសំរាប់ក្រុមហ៊ុន ដែលគេហៅឈ្មោះថា លោក ម៉ាប់ បានបញ្ជាក់ថា ការឈូសឆាយនេះ គឺមន្ត្រីជំនាញព្រៃឈើបានពិនិត្យរួចហើយ។ លោកបានបដិសេធថា លោកពុំដឹងជុំវិញការចោទប្រកាន់របស់ក្រុមសហគមន៍ ថាដីព្រៃនោះជាដីព្រៃការពារ និងការដកគ្រឿងចក្រ និងក្រុមកម្មករចេញភ្លាមៗពីការដ្ឋានឈូសឆាយ បន្ទាប់ពីបែករឿងឈូសឆាយដីព្រៃនោះទេ។
ទោះជាយ៉ាងណា លោកមេឃុំ និងតំណាងសហគមន៍ លោក សេវ យួន បានបញ្ជាក់ច្បាស់ថា ព្រៃដែលក្រុមហ៊ុនបានឈូសឆាយពិតជាព្រៃសហគមន៍ការពារមានលិខិតបញ្ជាក់ពីអាជ្ញាធរពាក់ព័ន្ធត្រឹមត្រូវ ហេតុនេះពួកគាត់គ្រោងនឹងធ្វើពាក្យប្ដឹងករណីនេះតាមផ្លូវច្បាប់ ដើម្បីទាមទារឲ្យក្រុមហ៊ុន និងមន្ត្រីពាក់ព័ន្ធទទួលខុសត្រូវលើការបំផ្លាញព្រៃឈើនេះ ពីព្រោះឯកសារលិខិតអនុញ្ញាតឲ្យឈូសឆាយរបស់ក្រសួងកសិកម្ម ដែលពួកគាត់ទទួលបានពីក្រុមហ៊ុន បានចែងថា មុនឈូសឆាយក្រុមហ៊ុនត្រូវសហការជាមួយមន្ត្រីជំនាញ កាត់ចេញដីតំបន់ប៉ះពាល់ព្រៃការពារ ដីព្រៃស្រោង និងដីប្រជាពលរដ្ឋជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។