លោក ហ៊ុល ផានី ប្រធាននាយកដ្ឋានសារព័ត៌មានក្រសួងការបរទេស បានឲ្យដឹងថា នៅថ្ងៃទី២៧ ឧសភានេះ មន្រ្តីក្រសួងការបរទេសកម្ពុជាបានទទួលជួបជាបន្តបន្ទាប់ជាមួយគណៈប្រតិភូបរទេសមួយចំនួន ហើយមានការចូលគាល់ព្រះមហាក្សត្រនិងមានការជប់លៀងស្វាគមន៍គណៈប្រតិភូផង។
លោក ហ៊ុល ផានី មានប្រសាសន៍ដូច្នេះថា ៖ «ក្នុងកម្មវិធីហ្នឹងវាមានអ៊ីចឹង គឺស្អែក សម្ដេចគាត់ចូលបើក ហើយបន្ទាប់មកគណៈប្រតិភូហ្នឹង គឺនៅមានការជួបគ្នាដើម្បីនិយាយពីកិច្ចសហប្រតិបត្តិការរវាងអាស៊ាន និង EU (សហភាពអឺរ៉ុប) ហ្នឹងទៅ ហើយដល់ពេលល្ងាច កិច្ចការហ្នឹងក៏បន្តទៀត។ ហ្នឹងគឺមានតែប៉ុណ្ណឹង។ ហើយថ្ងៃនេះ គឺចូលគាត់ព្រះករុណា ហើយល្ងាចនេះមានជប់លៀង»។
យោងតាមប្រភពមន្រ្តីក្រសួងការបរទេស កិច្ចប្រជុំអាស៊ាន-សហភាពអឺរ៉ុបនៅកម្ពុជានេះ នឹងផ្តោតទៅលើការពង្រឹងកិច្ចសហការរវាងអាស៊ានជាមួយសហភាពអឺរ៉ុបទៅលើបញ្ហាសន្តិសុខ សេដ្ឋកិច្ច សង្គមកិច្ច ក្នុងនោះ នឹងមានការពិភាក្សាទាក់ទងជាមួយវិបត្តិសេដ្ឋកិច្ចពិភពលោក បញ្ហាស្បៀង បញ្ហាប្រឆាំងភេរវកម្មនិងបរិស្ថានផងដែរ។
ឯកសារដែលចែកផ្សាយដោយក្រសួងព័ត៌មានកម្ពុជា បានឲ្យដឹងដែរថា គណៈប្រតិភូដែលមកពីសហគមន៍អឺរ៉ុប មានរដ្ឋមន្រ្តីចំនួន១៣រូបនិងមន្រ្តីថ្នាក់ប្រហាក់ប្រហែលរដ្ឋមន្រ្តីមានចំនួន១៣រូប។ចំពោះគណៈប្រតិភូមកពីប្រទេសអាស៊ានទាំង៩ វិញ មានរដ្ឋមន្ត្រីចំនួន ៧រូប និងគណៈប្រតិភូថ្នាក់ប្រហាក់ប្រហែលរដ្ឋមន្រ្តីមានចំនួន ៣រូប។
មន្រ្តីក្រសួងព័ត៌មានបានឲ្យដឹងផងដែរថា នៅក្នុងកិច្ចប្រជុំនេះ មានអ្នកកាសែតជិត ២០០នាក់ តាមដានយកព័ត៌មានព្រឹត្តិការណ៍នេះ ដោយក្នុងនោះមានអ្នកកាសែតបរទេសមកពីក្រៅចំនួន ១៧នាក់ អ្នកកាសែតបរទេសដែលមានទីស្នាក់ការនៅក្នុងប្រទេសមានចំនួន ៥៨នាក់ និងអ្នកកាសែតជាតិមានចំនួន ១២២នាក់។
នៅស្របពេលមានកិច្ចប្រជុំអាស៊ាន-សហភាពអឺរ៉ុបនៅក្រុងភ្នំពេញនេះ ក៏មានការតវ៉ាដោយសកម្មជនមួយចំនួនរបស់អង្គការក្រៅរដ្ឋាភិបាលកើតមាននៅមុខទីស្នាក់ការស្ថានទូតប្រទេសភូមានៅកម្ពុជា ទាមទារឲ្យមានការដោះលែងលោកស្រី អ៊ុងសាន ស៊ូជី មេដឹកនាំប្រជាធិបតេយ្យនៅភូមាដែលកំពុងរងការចោទប្រកាន់ ហើយអាចនឹងត្រូវកាត់ទោសឲ្យជាប់ឃុំច្រើនឆ្នាំទៀតនោះ៕