ជំងឺគ្រុនឈាមសម្លាប់មនុស្សអស់៣១នាក់ហើយនៅកម្ពុជា
ដោយ សុខ សេរី
2009-10-10
រដូវជំងឺគ្រុនឈាមនឹងឈានដល់ទីបញ្ចប់នៅចុងខែតុលាខាងមុខនេះហើយ ប៉ុន្តែចំនួនអ្នកស្លាប់និងកើតជំងឺនេះបានកើនទ្បើងគួរឲ្យព្រួយបារម្ភ។
ពលរដ្ឋពរកូនតម្រង់ជួរនៅមុខមន្ទីរពេទ្យគន្ធបុប្ផាក្នុងទីក្រុងភ្នំពេញ កាលពីថ្ងៃ១៩ មិថុនា ២០០៧។
មន្រ្តីជាន់ខ្ពស់នៃក្រសួងសុខាភិបាលបានអះអាងថា ជំងឺគ្រុនឈាមបានសម្លាប់ប្រជាពលរដ្ឋចំនួន៣១នាក់ហើយមកដល់ពេលនេះ ក្នុងនោះភាគច្រើនជាកុមារក្រោមអាយុ១៥ឆ្នាំ ហើយទន្ទឹមនឹងនេះប្រជាពលរដ្ឋចំនួនជាង១ម៉ឺននាក់ទៀតកំពុងតែកើតជំងឺគ្រុនឈាមនេះនៅទូទាំងប្រទេសកម្ពុជា នៅគ្រាដែលរដូវជំងឺគ្រុនឈាមនឹងឈានដល់ទីបញ្ចប់ឬស្បើយទៅវិញនៅចុងខែតុលាខាងមុខនេះ។
លោក ង៉ាន់ ចន្ថា ប្រធានកម្មវិធីជាតិប្រយុទ្ធប្រឆាំងនឹងជំងឺគ្រុនឈាមនៃក្រសួងសុខាភិបាល បានមានប្រសាសន៍ប្រាប់វិទ្យុអាស៊ីសេរីថា ក្រសួងសុខាភិបាលកំពុងតែបន្តការតាមដានស្ថានការណ៍នេះដោយយកចិត្តទុកដាក់។
លោក ង៉ាន់ ចន្ថា បានឲ្យដឹងថា ៖ «អាទិត្យទី៣៨ហ្នឹង យើងមើល មាន១ម៉ឺន៦៧នាក់ ហើយស្លាប់៣១ ប៉ុន្តែយើងប្រៀបទៅនឹងឆ្នាំ២០០៨ មាន៦ពាន់ប៉ុន្មាន ខ្ញុំអត់ចាំទេ ប៉ុន្តែស្លាប់៥០»។
លោកបានបញ្ជាក់ថា ខេត្តដែលមានប្រជាពលរដ្ឋស្លាប់និងកើតជំងឺគ្រុនឈាមច្រើនជាងគេនោះ មានដូចជាទីក្រុងភ្នំពេញ ខេត្តកំពង់ចាម ខេត្តកណ្តាល ខេត្តតាកែវ ខេត្តកំពត និងខេត្តព្រះសីហនុ ដោយសារតែខេត្តទាំងនោះមានចំនួនប្រជាពលរដ្ឋរស់នៅច្រើនជាងគេ និងបញ្ហាអនាម័យដោយសារមានការស្តុកទឹកជាជម្រកសត្វមូស។
ថ្នាំអាប៊េតចំនួន៩០តោនសម្រាប់សង្គ្រោះជាបន្ទាន់ចែកជូនប្រជាពលរដ្ឋទូទាំង២៤ខេត្តក្រុងនោះកំពុងតែដំណើរការចែកជូនប្រជាពលរដ្ឋក្នុងការសម្លាប់ដង្កូវទឹក ក្រោយពីថ្នាំអាប៊េតចំនួន១២០តោនត្រូវបានចែកជូនរួចហើយជាលើកដំបូងកាលពីប៉ុន្មានខែកន្លងទៅនេះ។
ប្រភពដដែលបានឲ្យដឹងទៀតថា យុទ្ធនាការនៃការយោសនាអប់រំនៅតាមទូរទស្សន៍និងនៅតាមមូលដ្ឋាននៅតែបន្តនៅទ្បើយ។
ប្រជាពលរដ្ឋម្នាក់នៅក្នុងសង្កាត់ទួលសង្កែ ខណ្ឌឫស្សីកែវ ក្រុងភ្នំពេញ បានថែ្លងថា កន្លែងរស់នៅរបស់លោកស្រីពុំមានការកើតជំងឺគ្រុនឈាមនោះទេ ដោយសារតែប្រជាពលរដ្ឋនៅទីនោះមានការយល់ដឹងអំពីវិធីបង្ការ ៖ «ម្ដុំហ្នឹងដូចអត់មានអ្នកណាជួបប្រទះគ្រុនឈាមផង។ និយាយទៅបើសិនជាគ្រួសារខ្ញុំសុទ្ធតែគេងដាក់មុង»។
សុខ សេរី ៖ មានន័យថាចេះបង្ការដោយខ្លួនឯង? ពលរដ្ឋ ៖ ចាស។ សុខ សេរី ៖ ចុះគ្រួសារផ្សេងៗ? ពលរដ្ឋ ៖ គ្រួសារនៅជុំវិញហ្នឹងក៏អត់ជួបបញ្ហាហ្នឹងផង។
សុខ សេរី ៖ បានយល់ដឹងអំពីការគេឃោសនាដើម្បីអប់រំបង្ការជំងឺគ្រុនឈាមហ្នឹងទេ? ពលរដ្ឋ ៖ ចាស ដឹង។ សុខ សេរី ៖ មើលតាមរយៈអ្វី? ពលរដ្ឋ ៖ ទូរទស្សន៍។
សូមជម្រាបថា កាលពីឆ្នាំ២០០៨កន្លងទៅ ជំងឺគ្រុនឈាមបានសម្លាប់ប្រជាពលរដ្ឋចំនួន៤៥នាក់និងមានអ្នកកើតជំងឺនេះចំនួន៥៧៥០ ប្រៀបធៀបទៅនឹងឆ្នាំ២០០៧កន្លងទៅ ជំងឺគ្រុនឈាមបានសម្លាប់ប្រជាពលរដ្ឋចំនួន៣៥២នាក់ និងមានអ្នកកើតជំងឺនេះមានចំនួនខ្ពស់រហូតដល់៣៥.៧៨២នាក់ ភាគច្រើនជាកុមារ៕
អត្ថបទដែលទាក់ទង
បញ្ហាការខ្វះទឹកប្រើប្រាស់ក្នុងរដូវប្រាំងនៅតាកែវ
ក្រុមនិស្សិតជួបប្រជុំគ្នាពិភាក្សាអំពីជំងឺអេដស៍
ជំងឺរាករូសរាតត្បាតនៅតំបន់ដាច់ស្រយាលក្នុងខែត្រពោធិ៍សាត់
អ្នកភូមិនៅកំពង់ឆ្នាំងកើតជំងឺរាកធ្ងន់ធ្ងរ
អ្នកកើតជំងឺគ្រុនចាញ់កើនឡើងក្នុងឆ្នាំ២០០៩
ស.រ.អា.ផ្ដល់ថវិកាជាង១៣លានដុល្លារដល់កម្មវិធីអេដស៍ក្នុងសហគមន៍ខ្មែរ
អាជ្ញាធរដាក់ឱសានវាទដល់ម្ចាស់ឱសថស្ថានឲ្យមកសុំអាជ្ញាប័ណ្ណ
កិច្ចពិភាក្សាស្ដីពីការទប់ស្កាត់ផលប៉ះពាល់នៃថ្នាំជក់នៅកម្ពុជា
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
មើលមតិទាំងអស់.