ជំងឺគ្រុនឈាមសម្លាប់មនុស្សអស់៣៤នាក់ហើយនៅកម្ពុជា
ដោយ សុខ សេរី
2009-11-03
មន្រ្តីជំនាញនៃក្រសួងសុខាភិបាលបានអះអាងថា ជំងឺគ្រុនឈាមបានសម្លាប់ប្រជាពលរដ្ឋចំនួន៣៤នាក់ហើយ ភាគច្រើនជាកុមារក្រោមអាយុ១៥ឆ្នាំ និងមានប្រជាពលរដ្ឋកើតជំងឺនេះបានកើនទ្បើងរហូតដល់ជិត២ម៉ឺននាក់ចាប់តាំងពីខែមេសាមក។
កុមារីកើតជំងឺគ្រុនឈាមមកពីខេត្តតាកែវទទួលការព្យាបាលនៅមន្ទីរពេទ្យកុមារជាតិក្នុងទីក្រុងភ្នំពេញនាថ្ងៃទី២៤ សីហា ២០០៩។
លោក ង៉ាន់ ចន្ថា នាយកនៃកម្មវិធីជាតិប្រយុទ្ធប្រឆាំងនឹងជំងឺគ្រុនឈាមនៃក្រសួងសុខាភិបាល ប្រទេសកម្ពុជា បានមានប្រសាសន៍ប្រាប់វិទ្យុអាស៊ីសេរីនៅថៃ្ងច័ន្ទ ទី២ ខែវិច្ឆិកានេះ ថា ស្ថានការណ៍នៃជំងឺគ្រុនឈាមនោះនៅល្អច្រើនជាងឆ្នាំ២០០៧ និងឆ្នាំ២០០៨កន្លងទៅ។
លោក ង៉ាន់ ចន្ថា បានឲ្យដឹងថា ៖ «ឆ្លង១៨៨៦(នាក់) និងស្លាប់៣៤នាក់។ តួលេខដែលយើងទទួលបានភាគច្រើនគឺក្មេងក្រោមអាយុ១៥ឆ្នាំ ប៉ុន្តែយើងមិនបានដឹងអំពីតួលេខពិតប្រាកដរបស់មនុស្សចាស់ទេ ពីព្រោះយើងអត់ទាន់មានប្រព័ន្ធ គ្រប់គ្រងនៅតាមមន្ទីរពេទ្យសម្រាប់មនុស្សចាស់នៅទ្បើយ»។
ខេត្តដែលមានប្រជាពលរដ្ឋស្លាប់និងកើតជំងឺគ្រុនឈាមនោះច្រើនជាងគេ មានដូចជាខេត្តកំពង់ចាម, រាជធានីភ្នំពេញ, ខេត្តកណ្តាល, ខេត្តកណ្តាល, ខេត្តសៀមរាប, ខេត្តតាកែវ, ខេត្តកំពត និងខេត្តក្រចេះ ជាដើម។
មន្រ្តីជំនាញរបស់ក្រសួងសុខាភិបាលដដែលបានបន្ទោសថា ការប្រែប្រួលនៃកម្ដៅផែនដី ការផ្លាស់ទីរបស់ប្រជាពលរដ្ឋ បញ្ហាអនាម័យនិងសំណង់នានា គឺជាមូលហេតុសំខាន់ចំពោះការរីករាលដាលនៃជំងឺនេះ។ រដូវជំងឺគ្រុនឈាមដែលបានចាប់ផ្តើមតាំងពីខែមេសាមកនោះនឹងថយចុះវិញនៅចុងខែតុលានេះតទៅ។
ក្រសួងសុខាភិបាលបានចែកចាយថ្នាំអាប៊េតចំនួនសរុប២១៦តោនហើយដល់ប្រជាពលរដ្ឋទូទាំង២៤ខេត្តក្រុង ដោយមិនយកកម្រៃដើម្បីសម្លាប់ដង្កូវទឹក។
ប្រជាពលរដ្ឋរស់នៅក្នុងឃុំស្ពឺក ស្រុកបាភ្នំ ខេត្តព្រៃវែង បានរិះគន់ថា មន្រ្តីជំនាញក្រសួងសុខាភិបាលនៅមូលដ្ឋានបានចុះចែកថ្នាំអាប៊េតនិងសម្ភារៈការពារជំងឺគ្រុនឈាមនោះនៅតែទីប្រជុំជន ៖ «មានកើតច្រើន! ទី១ ដោយសាររដូវនេះជារដូវកាលទឹកវាទ្បើងជន់ ទឹកទន្លេផងនិងទឹកភ្លៀងផង ហើយដល់ពេលអ៊ីចឹងទៅ ប្រជាពលរដ្ឋ ជាពិសេសគាត់អត់មានមុង អត់មានថ្នាំបង្ការ ដូចជាមូសខាំគាត់ គាត់អត់មានថ្នាំមូស អត់មានមុងឬក៏ថ្នាំជ្រលក់មុងសម្រាប់ការពារជំងឺគ្រុនឈាម កុំឲ្យមូសខ្លាមកជិតគាត់ទេ។ ជាពិសេសកុមារ កើតទ្បើងច្រើនណាស់ ហើយគ្រោះថ្នាក់បាត់បង់ជីវិតក៏កើតទ្បើងច្រើនដែរនៅក្នុងខេត្តព្រៃវែងរបស់ខ្ញុំហ្នឹង»។
សុខ សេរី ៖ អាហ្នឹងគឺដោយសារតែភ្នាក់ងារសុខាភិបាលមិនបានទៅដល់តំបន់របស់លោកឬក៏យ៉ាងម៉េច? ពលរដ្ឋ ៖ គេទៅតែប្រជុំជន ដូចនៅទីផ្សារនៅអីអ៊ីចឹងទៅ។ គាត់ចាក់ស្ពតតាមទូរទស្សន៍បន្តិចបន្តួច ហើយប្រជាពលរដ្ឋគាត់មិនសូវជាបានយល់ដឹង ជាពិសេសសេដ្ឋកិច្ចរបស់គាត់ធ្លាក់ចុះ គាត់ក្រីក្រ មានទូរទស្សន៍ឯណាមើល វិទ្យុគ្មានស្តាប់ តែបាយគ្មានហូបផង។
កាលពីឆ្នាំ២០០៨កន្លងទៅ ជំងឺគ្រុនឈាមបានសម្លាប់ប្រជាពលរដ្ឋចំនួន៥៦នាក់ និងមានអ្នកកើតជំងឺនេះចំនួន៧៧៣៤ ប្រៀបធៀបទៅនឹងឆ្នាំ២០០៧កន្លងទៅ ជំងឺគ្រុនឈាមបានសម្លាប់ប្រជាពលរដ្ឋចំនួនច្រើនរហូតដល់៣៩៣នាក់ និងមានអ្នកកើតជំងឺនេះចំនួន៣៨.៣៩០នាក់នៅទូទាំងប្រទេស៕
អត្ថបទដែលទាក់ទង
ស្ថានភាពជំងឺគ្រុនឈាមក្នុងរយៈពេល៤៤អាទិត្យនៃឆ្នាំ២០០៩
បញ្ហាធូលីហុយនៅតាមផ្លូវជាតិលេខ៣ប៉ះពាល់ដល់សុខភាពអ្នកស្រុក
ក្រសួងសុខាភិបាលបារម្ភចំពោះការចរាចរឱសថក្លែងក្លាយ
អ្នកភូមិនៅខេត្តកណ្ដាលនិងកំពង់ស្ពឺបារម្ភពីបញ្ហាសុខភាព
រោងចក្រដែលមានកម្មករសន្លប់ដោយជាតិពុលបើកដំណើរការឡើងវិញ
ជំងឺគ្រុនឈាមសម្លាប់មនុស្សអស់៣១នាក់ហើយនៅកម្ពុជា
WHOចេញរបាយការណ៍អំពីការរាលដាលនៃជំងឺគ្រុនឈាម
ជំងឺគ្រុនផ្តាសាយ A(H1N1) នៅកម្ពុជាកើនឡើងដល់៦៨ករណីហើយ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
i often heard about bad event from two provinces svay reang and prey veang about hospital employee do the job careless. no money must be die! is it the right to let that happened to cambodia after you had graduated from a mediclal shchool. <br>like i told you if you need more money talk to sister bunra ney, who is incharged the red cross in Cambodia or try to find a good idea from her team, don't just let our children die that way.
2009-11-04 01:51
មើលមតិទាំងអស់.