ពលរដ្ឋឈ្មោះ ម៉ាន់ សត្យា រស់នៅភូមិព្រៃកោះ ឃុំវ័រស ស្រុកសំរោងទង បានឲ្យវិទ្យុអាស៊ីសេរីដឹងថា ក្នុងអំឡុងពេលពីរបីថ្ងៃក្នុងសប្តាហ៍នេះ ជំងឺរាករូសចម្លែកបានឆ្លងពីមនុស្សម្នាក់ទៅមនុស្សម្នាក់ទៀតយ៉ាងឆាប់រហ័សដោយមិនដឹងមូលហេតុច្បាស់លាស់។ លោកបន្តថា ជំងឺរាករូសនេះមិនធ្លាប់កើតមានពីមុនមកនោះទេនៅមូលដ្ឋាននេះ។ ប្រជាពលរដ្ឋរូបនេះ បានអំពាវនាវដល់មន្ត្រីក្រសួង មន្ទីរសុខាភិបាលចុះជួយអន្តរាគមន៍ឲ្យបានទាន់ពេលវេលា។
លោក ម៉ាន់ សត្យា បានឲ្យដឹងដូច្នេះ ៖ «រាកហើយក្អួតខ្លាំងតែម្ដង មកខ្លាំងៗមែនទែន។ ដំបូងអត់សូវចាប់អារម្មណ៍ រាករូសធម្មតា រាកឡើងអស់ជាតិទឹកពេកទៅឡើងក្រញង់ដៃជើង រមួលក្រពើ ខ្លះប្រកាច់ទៀត ព្រោះរាកខ្លាំងពេក»។
មេឃុំវ័រសនិងមេភូមិព្រៃកោះ បានទទួលស្គាល់ថា នៅមូលដ្ឋានរបស់លោកពិតជាកើតមានជំងឺរាករូសចម្លែកនេះពិតមែន។ លោកបានស្នើដល់មន្ត្រីពីគ្រប់ក្រសួងស្ថាប័នពាក់ព័ន្ធទាំងក្នុងរដ្ឋាភិបាលនិងអង្គការក្រៅរដ្ឋាភិបាលជួយចុះស៊ើបអង្កេតពីប្រភេទជំងឺនេះ ឲ្យបានទាន់ពេលវេលាដើម្បីទប់ស្កាត់ការឆ្លងធ្ងន់ធ្ងរកើតឡើងទៅថ្ងៃខាងមុខ។
មេភូមិព្រៃកោះ លោក ឡោះ ឡឹង មានប្រសាសន៍ថា ជំងឺរាករូសកំពុងបន្តឆ្លងពីប្រជាពលរដ្ឋម្នាក់ទៅម្នាក់ទៀតនៅឡើយ។ លោកសំណូមពរមន្ត្រីជំនាញចុះជួយធ្វើអន្តរាគមន៍។
លោក ឡោះ ឡឹង មានប្រសាសន៍ថា ៖ «ឈឺបីបួនថ្ងៃនឹងថ្ងៃហ្នឹងហើយ ហើយការព្យាបាលយើងបញ្ជូនទៅព្យាបាលនៅមន្ទីរពេទ្យបង្អែកខេត្តកំពង់ស្ពឺ ក្លីនិកឯកជនជាបន្តបន្ទាប់ហើយការរាលដាលចេះតែបន្តបន្ទាប់»។
ពាក់ព័ន្ធជំងឺរាករូសឆ្លងចម្លែកនេះ មន្ត្រីក្រសួងមន្ទីរសុខាភិបាលបានឲ្យដឹងថា កំពុងចាត់ចែងមន្ត្រីជំនាញចុះទៅកាន់មូលដ្ឋានដែលកើតមានជំងឺរាករូសនេះរួចហើយ។
លោក អោ វ៉ាន់ថេន ប្រធានមន្ទីរសុខាភិបាលខេត្តកំពង់ស្ពឺ មានប្រសាសន៍ថា រហូតមកដល់ថ្ងៃទី៧ ខែកុម្ភៈនេះ មន្ទីរសុខាភិបាលខេត្តបានទទួលអ្នកជំងឺប្រភេទរាករូសនេះបានជិត៤០នាក់រួចហើយ។ លោកបន្តថា ជំងឺរាករូសនេះ មន្ទីរសុខាភិបាលខេត្តបានធ្វើរបាយការណ៍ទៅក្រសួងសុខាភិបាលនិងបានចាត់មន្ត្រីជំនាញចុះត្រួតពិនិត្យ និងអប់រំឲ្យប្រជាពលរដ្ឋធ្វើអនាម័យក្នុងមូលដ្ឋាន។ ទោះយ៉ាងនេះក្តីជំងឺរាករូសនេះ មន្ត្រីជំនាញពុំទាន់រកឃើញពីមូលហេតុនៅឡើយ។
លោក អោ វ៉ាន់ថេន មានប្រសាសន៍ដូច្នេះ ៖ «គាត់រាកក្អូត ស្រដៀងគ្នានឹងពុលចំណីពុលអីហ្នឹងដែរ ប៉ុន្តែយើងកំពុងឲ្យក្រុមការងារចុះស្រាវជ្រាវហើយ ពីរបីថ្ងៃនេះកំពុងចុះស្រាវជ្រាវ លទ្ធផលមិនទាន់ទទួលបានថាយ៉ាងម៉េច។ មិនមែនទ្រង់ទ្រាយជាអាសន្នរោគទេ ព្រោះអាសន្នរោគវាមានទ្រង់ទ្រាយរាតត្បាតធំ»។
មន្ត្រីមន្ទីរសុខាភិបាលខេត្តកំពង់ស្ពឺ បានឲ្យដឹងថា ជំងឺរាករូសចម្លែកនេះបានកើតមានទៅលើប្រជាពលរដ្ឋរស់នៅក្នុងមូលដ្ឋានក្រុងច្បារមន ស្រុកសំរោងទង និងស្រុកឧត្តុង្គ ខេតកំពងស្ពឺ។ ជំងឺរាករូសចម្លែកនេះ មន្ត្រីសុខាភិបាលខេត្តកំពង់ស្ពឺ បញ្ជាក់ថា មិនទាន់ដល់ថ្នាក់ប្រកាសអាសន្ននៅឡើយទេ។ ទោះយ៉ាងនេះក្តីជំងឺរាករូសនេះមន្ត្រីជំនាញសុខាភិបាលកំពុងធ្វើការតាមដានជាប្រចាំដោយមិនធ្វេសប្រហែសឡើយ៕