រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី លោក សុខ អាន ជាឧបនាយករដ្ឋមន្ត្រី នៅថ្ងៃទី២៦ ខែមករា ឆ្នាំ២០១២ បានយល់ព្រមឲ្យក្រុមហ៊ុនរបស់ប្រទេសហ្វីលីពីន ឈ្មោះ ស៊ីប៊ូ ប៉ាស៊ីហ្វិក អ៊ែរ (Cebu Pacific Air) ជាយន្តហោះខ្នាតធំ អ៊ែរ ប៊ឺស ៣១៩ (Air Bus 319) ចាប់ផ្ដើមហោះត្រង់មកខេត្តសៀមរាប ចាប់ពីចុងខែមីនា ខាងមុខនេះ។
កិច្ចព្រមព្រៀងនេះ បានធ្វើឡើងនៅក្នុងជំនួបរវាងលោក សុខ អាន ជាមួយឯកអគ្គរដ្ឋទូតនៃប្រទេសហ្វីលីពីននៅកម្ពុជា គឺលោក ណូអេ អាល់បាណូ វង់ (Noe Albano Wong) នៅឯទីស្ដីការគណៈរដ្ឋមន្រ្តី នៅថ្ងៃទី២៦ ខែមករា ឆ្នាំ២០១២។
អ្នកនាំពាក្យនៃអង្គភាពប្រតិកម្មរហ័សទីស្ដីការគណៈរដ្ឋមន្ត្រី លោក ឯក ថា បានមានប្រសាសន៍ប្រាប់អ្នកកាសែត ក្រោយពីជំនួបនោះថា ការហោះហើរត្រង់នេះ គឺមានសារសំខាន់ណាស់ ដើម្បីបង្កើនភ្ញៀវទេសចរណ៍មកទស្សនាអង្គរវត្ត៖ «ហើយយើងដឹងហើយថា ខេត្តសៀមរាប ជាទូទៅទេសចរហ្នឹង គឺមានកំណើនក្នុងមួយឆ្នាំជាង ២៧%។ អ៊ីចឹងកំណើនទេសចរណ៍នេះ គឺវាច្រើនសន្ធឹកសន្ធាប់ណាស់សំរាប់ព្រះរាជាណាចក្រកម្ពុជាយើង»។
អភិបាលខេត្តសៀមរាប លោក ស៊ូ ភីរិន្ទ បានមានប្រសាសន៍ថា លោកត្រេកអរចំពោះការចាប់ផ្តើមជើងហោះហើរថ្មីនេះ៖ «ហ្វីលីពីន ជាប្រទេសមួយដ៏សំខាន់ណាស់ ដូច្នេះវានឹងធ្វើឲ្យមានកំណើនភ្ញៀវទេសចរអន្តរជាតិមកកាន់តែច្រើនម្យ៉ាង ម្យ៉ាងទៀតបានមកឃើញស្នាដៃទាំងឡាយ មានអរិយធម៌ខ្ពស់ មានប្រាង្គប្រាសាទអង្គរវត្ត»។
ក្រុមហ៊ុន ស៊ីប៊ូ ប៉ាស៊ីហ្វិក អ៊ែរ របស់ប្រទេសហ្វីលីពីននោះ គ្រោងហោះហើរដោយត្រង់មកខេត្តសៀមរាប ចំនួន ៤ជើង ក្នុង១សប្ដាហ៍ គឺនៅថ្ងៃអង្គារ ថ្ងៃព្រហស្បតិ៍ ថ្ងៃសៅរ៍ និងថ្ងៃអាទិត្យ។
នៅឆ្នាំ២០១១ កន្លងទៅនេះ ភ្ញៀវទេសចរបរទេសនានា មកទស្សនាអង្គរវត្តនៅខេត្តសៀមរាប គឺមានចំនួនជាង ៣លាននាក់ ប្រៀបធៀបនឹងឆ្នាំ២០១០ កន្លងទៅ គឺមានចំនួនជាង ២.៦លាននាក់។
លោក ស៊ូ ភីរិន្ទ បានបញ្ជាក់ថា ការកើនបែបនេះ គឺដោយសារតែកម្ពុជា ជាពិសេសនៅខេត្តសៀមរាប មានសន្តិសុខល្អ និងសេវាល្អ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។