អ្នកយកព័ត៌មានវិទ្យុអាស៊ីសេរី លោក មណ្ឌលកែវ កាលពីប្រមាណម៉ោងជិត៦ល្ងាចកន្លងមកនេះ បានរាយការណ៍មកថា អ្នកស្រុកបានលើកគ្នាទៅរារាំងមិនឲ្យព្រះចៅអធិការវត្តនោះចូលព្រះវិហារឡើយ នៅគ្រាដែលមានកងកម្លាំងអាជ្ញាធរបានព្យាយាមដឹកព្រះអង្គចូលមកក្នុងវត្តវិញនោះ។
មណ្ឌលកែវ ៖ សភាពការណ៍ថ្ងៃហ្នឹង គឺវាពាក់ព័ន្ធនឹងបញ្ហាម្សិលមិញគឺប្រជាពលរដ្ឋគាត់បានកើតទុក្ខ មិនសុខចិត្តពីបញ្ហាគាត់ចោទប្រកាន់ថា ព្រះគ្រូចៅអធិការវត្ត ព្រះនាម ហួត ប៊ុនថុន ហ្នឹង ជាព្រះសង្ឃដែលបរាជិក គឺអត់ចេះធម៌ អត់ប្រតិបត្តិធម៌ អត់កសាងវត្តទេ ក្នុងរយៈពេល៤ឆ្នាំកន្លងមក ដូច្នេះពួកគាត់មានបំណងនឹងបណ្ដេញព្រះសង្ឃចេញពីវត្តនេះ។
ហើយម្សិលមិញហ្នឹង ខាងមន្ទីរធម្មការក្រុង បាននិយាយថា នឹងមានដំណោះស្រាយ ចាំទៅទូលសួរទៅសម្ដេចសង្ឃសិន ប៉ុន្តែការអូសបន្លាយហ្នឹង រហូតមកដល់រសៀលថ្ងៃនេះ គឺខាងអាជ្ញាធរបែរជាដឹកព្រះសង្ឃ ព្រះនាម ហួត ប៊ុនថុន ហ្នឹង ត្រឡប់ចូលមកអារាមវិញ។
ព្រះចៅអធិការ ហួត ប៊ុនថុន ហ្នឹង គង់នៅលើឡានស៊ីរ៉ែនមួយ ដែលមានអង្គរក្សស្លៀកពាក់ឈុតខ្មៅការពារ ចំនួនប្រហែលជា ១០នាក់ ហើយក្រៅពីហ្នឹង គឺនៅមានកម្លាំងអាជ្ញាធរមូលដ្ឋានប៉ូលិសមូលដ្ឋាន ហើយនិងប៉េអឹម ជាដើមហ្នឹង ប្រហែលជា ៣០-៤០នាក់ ហើយនិងឡានរបស់កម្លាំងប្រដាប់អាវុធ ៥-៦គ្រឿង មកបញ្ឈរនៅមុខវិហារ ហើយនៅមុខវិហារហ្នឹង គឺប្រជាពលរដ្ឋ ប្រមាណជា ២០០នាក់ គាត់កំពុងតែស្រែកទាមទារឲ្យព្រះសង្ឃហ្នឹង ចេញទៅវិញ គឺមិនឲ្យព្រះសង្ឃហ្នឹង ចុះពីលើឡាន ចូលមកក្នុងវិហារទេ។
ម៉ាយ៉ារិទ្ធិ ៖ ហើយចុះរហូតមកទល់នឹងម៉ោង ៥កន្លះល្ងាច (ថ្ងៃទី២ កញ្ញា ២០០៨) ដែលលោកកំពុងតែធ្វើសេចក្ដីរាយការណ៍នេះហើយ តើមានការដោះស្រាយយ៉ាងណាដែរទៅ?
មណ្ឌលកែវ ៖ ឥឡូវសភាពការណ៍កំពុងនៅទ្រឹង ពោលគឺព្រះសង្ឃនៅតែគង់នៅលើឡានស៊ីរ៉ែនដដែល ឯពុទ្ធបរិស័ទដែលជាបាតុករដែលមិនយល់ព្រមឲ្យព្រះសង្ឃចុះចូលមកគង់នៅក្នុងវត្ត គាត់នៅតែព័ទ្ធជុំវិញហ្នឹង គឺនៅព័ទ្ធមុខព្រះវិហារដដែល។ ខ្ញុំសូមឲ្យលោកជួបជាមួយនឹងលោកយាយម្នាក់ គាត់ជាយាយជី ដែលមានវ័យចំណាស់ប្រហែលជា ៦០ឆ្នាំ ដែលគាត់ចូលរួមនៅក្នុងការតវ៉ាហ្នឹង ដូច្នេះអញ្ជើញស្ដាប់គាត់មានប្រសាសន៍ ៖ «រឿងសង្រ្គាជហ្នឹង ខ្ញុំសូមតែដកឲ្យចេញពីវត្តព្រែកលៀបហ្នឹងចេញតែម្ដង សុំដកតែលោកសង្រ្គាជមួយ អត់ឲ្យចូលវត្តទេ អ្នកជើងវត្តនៅខាងណេះ គេអស់ជំនឿហើយ ព្រោះកន្លងមក ៤ឆ្នាំហើយ ដែលពុករលួយនោះ»។
មណ្ឌលកែវ ៖ ខ្ញុំសូមជម្រាបលោកថា ឥឡូវនេះ សភាពការណ៍នៅទ្រឹង អត់មានបញ្ហាអីកើតឡើងនៅឡើយទេ ហើយប្រសិនបើនៅមានសភាពការណ៍អីកើតឡើង ខ្ញុំនឹងរាយការណ៍បន្តទៅទៀត។
នៅមិនទាន់មានការបកស្រាយនិងបង្ហាញភស្តុតាងបញ្ជាក់ច្បាស់ថា តើការចោទព្រះចៅអធិការវត្តព្រះតេជព្រះគុណ ហួត ប៊ុនថុន ថា ពុករលួយនិងថាជាសង្ឃបរាជិកនោះ មានជាប់ពាក់ព័ន្ធនឹងអ្វីខ្លះនោះទេ៕