លោកស្រី កឹម ចន្ថា ប្រធានសណ្ឋាគាររណសិរ្សស្ថិតនៅចំខាងមុខព្រះបរមរាជវាំងក្នុងទីក្រុងភ្នំពេញ បានមានប្រសាសន៍ប្រាប់វិទ្យុអាស៊ីសេរីថា មន្រ្តីនៃទីស្តីការគណៈរដ្ឋមន្រ្តីបានប្រគល់លិខិតស.ជ.ណ.មកឲ្យលោកស្រី កាលពីថ្ងៃព្រហស្បតិ៍ម្សិលមិញ តម្រូវឲ្យលោកស្រីប្រគល់សណ្ឋាគារនេះឲ្យទៅក្រុមហ៊ុនឈ្មោះ អាទ្បិចសាន់អ៊ិន។
លោកស្រី កឹម ចន្ថា បានឲ្យដឹងថា ៖ «ខ្ញុំសាងសង់តាំងពីចាក់គ្រឹះមក រួចឲ្យខ្ញុំចេញយ៉ាងម៉េចទទេហ្នឹង ខ្ញុំអត់យល់ទេណា៎!»។
សុខ សេរី ៖ លោកស្រីមានត្រៀមលក្ខណៈរៀបចំរើទាន់ទេមើលទៅ?
កឹម ចន្ថា ៖ ខ្ញុំរៀបមិនចេញទេ ខ្ញុំអត់រៀបអីកើតទេ ខ្ញុំអត់ដឹងរៀបដោយវិធីណា។
ផែ្អកតាមឯកសារថតចម្លងដែលវិទ្យុអាស៊ីសេរីទទួលបាន ចុះថៃ្ងទី២៥ ខែកញ្ញាកន្លងទៅថ្មីៗនេះ ចុះហត្ថលេខានិងត្រាដោយ លោក សេង លឹមនៅ ជារដ្ឋលេខាធិការនៃទីស្តីការគណៈរដ្ឋមន្រ្តី បាននិយាយថា សូមឲ្យលោកស្រីប្រធានសណ្ឋាគារជួយសម្រួលដោះស្រាយអគារនេះឲ្យបាននៅដំណាច់ខែកញ្ញា ឆ្នាំ២០០៨នេះ។
កម្មវត្ថុនៃលិខិតនោះបានបញ្ជាក់ថា ករណីស្នើសុំប្រគល់សណ្ឋាគាររណសិរ្ស ផ្ទះលេខ៤០ មហាវិថីសម្តេចសុធារស ជូនក្រុមហ៊ុនអាទ្បិចសាន់អ៊ិន របស់លោកស្រី ជីង សុគន្ធាវី ដែលប្រភពបានអះអាងឲ្យដឹងថា គេបានទិញទីតាំងសណ្ឋាគារនោះក្នុងតម្លៃទឹកប្រាក់ ៣លាន៨សែនដុល្លារអាមេរិក ពីគណបក្សប្រជាជនកម្ពុជា។
ផ្អែកតាមប្រភពនិងឯកសារមួយចំនួនបានឲ្យដឹងថា ម្ចាស់ក្រុមហ៊ុនអាទ្បិចសាន់អ៊ិន គឺមានឈ្មោះ ជីង សុគន្ធាវី ដែលជាកូនស្រីរបស់យាយភូ ភរិយារបស់លោក ទ្បៅ ម៉េងខីន ប្រធានក្រុមហ៊ុនស៊ូកាគូ។
មិនអាចទាក់ទង លោកស្រី ជីង សុគន្ធាវី ដើម្បីបំភ្លឺជុំវិញរឿងចម្រូងចម្រាសខាងលើនេះបានទេ។
លោកស្រី កឹម ចន្ថា ប្រធានសណ្ឋាគាររណសិរ្សបានឲ្យដឹងថា លោកស្រីបានជួលសណ្ឋាគារនេះបើកសេវាកម្មទទួលភ្ញៀវស្នាក់នៅពីគណបក្សប្រជាជនកម្ពុជា ចាប់តាំងពីឆ្នាំ១៩៨៩មកម៉្លេះក្នុងតម្លៃទឹកប្រាក់២៦៤០០ដុល្លារអាមេរិកក្នុងមួយឆ្នាំ ហើយកិច្ចសន្យាជួលនោះកំពុងតែនៅជាធរមាននៅទ្បើយ។
លោកស្រីបានបញ្ជាក់ឲ្យដឹងថា លោកស្រីមិនបានរំលោភលើកិច្ចសន្យានោះដូចការចោទប្រកាន់នោះទ្បើយ។
លោក មិន ឃិន ជាប្រធានគណៈកម្មាធិការអចិន្រ្តៃយ៍រៀបចំបុណ្យជាតិនិងអន្តរជាតិ ហើយបច្ចុប្បន្នក្លាយជារដ្ឋមន្រ្តីក្រសួងធម្មការនិងសាសនា សម្រាប់រដ្ឋាភិបាលទើបបង្កើតថ្មី ដែលលោកមានចំណែកក្នុងការសម្រេចជុំវិញរឿងចម្រូងចម្រាសខាងលើនេះ មិនអាចទាក់ទងសុំសេចក្ដីបំភ្លឺបានទេនៅថ្ងៃសុក្រនេះ ដោយទូរស័ព្ទរបស់លោកបានបិទ ប៉ុនែ្តលោកធ្លាប់បានមានប្រសាសន៍បំភ្លឺប្រាប់វិទ្យុអាស៊ីសេរីថា ៖ «...គាត់ជួល១៧ឆ្នាំហើយ គាត់អត់មានគោរពតាមកិច្ចសន្យាទេ។ ១៧ឆ្នាំគាត់អត់មានបានជួសជុល បានធ្វើអីទាំងអស់»។
លោក វ៉ាន់ សូផាត នាយករងនៃអង្គការសិទ្ធិមនុស្សលីកាដូ បានមានប្រសាសន៍ថា ៖ «រាល់ថ្ងៃនេះគឺថា រឿងជម្លោះដីធ្លីហ្នឹងវាកាន់តែរីករាលដាលតាំងពីប្រជាពលរដ្ឋក្រីក្រដែលគ្នាគ្មានលទ្ធភាព រហូតមកដល់ជម្លោះរវាងអ្នកដែលមានឥទ្ធិពលដូចគ្នា»។
លោកបានកត់សម្គាល់ឃើញថា រាល់ការលក់និងការដោះដូរទីតាំងដីធ្លីនិងអគារសាធារណៈនានាក្នុងប្រទេសកម្ពុជាត្រូវបានគេធ្វើឡើងគ្មានតម្លាភាពដោយសារទំនាក់ទំនងរវាងឈ្មួញនិងមន្រ្តីជាន់ខ្ពស់មានភាពជិតស្និទ្ធជាមួយគ្នា៕