ព្រឹត្តិការណ៍នៃការផ្លាស់ទីតាំងស្រឡាងបូមខ្សាច់លុបផ្ទៃសមុទ្រទំហំ ១.០០០ហិកតារនៅក្នុងភូមិរលួស ឃុំបឹងទូក ស្រុកកំពត ខេត្តកំពតនេះ បានធ្វើឡើងបន្ទាប់ពីមានកិច្ចចរចាគ្នារយៈពេល ២ម៉ោង កាលពីរសៀលថ្ងៃ២៦ សីហា រវាងមនុស្សចំនួន ១៥នាក់ តំណាងឲ្យប្រជាពលរដ្ឋអ្នកនេសាទមកពីឃុំចំនួនបី គឺឃុំបឹងទូក ឃុំព្រែកត្នោត និងឃុំត្រើយកោះ និងប្រធានក្រុមហ៊ុនកំពតផត លោកឧកញ៉ា វិញ ហួរ ក្រោមកិច្ចឃ្លាំមើលពីសំណាក់អង្គការក្រៅរដ្ឋាភិបាលនិងក្រុមសិទ្ធិមនុស្ស។
ប្រធានក្រុមហ៊ុនកំពតផត លោកឧកញ៉ា វិញ ហួរ បានមានប្រសាសន៍ឲ្យដឹងថា ក្រុមហ៊ុនបានព្រមទទួលយកសំណើពីប្រជាពលរដ្ឋ ដោយផ្លាស់ទីកន្លែងបូមខ្សាច់ជាបណ្ដោះអាសន្ន ហើយរង់ចាំជំនួបម្ដងទៀត ដែលនឹងប្រព្រឹត្តទៅនៅថ្ងៃទី៣០ ខែសីហា ខាងមុខ។
លោកឧកញ៉ា វិញ ហួរ មានប្រសាសន៍ថា ៖ «ប្រជាជនសំណូមពរថា កុំឲ្យផ្ដាច់អាហារគាត់ ដាច់ពោះគាត់ អាហ្នឹងជាបញ្ហាមួយ បញ្ហាទី២ ខ្លាចងាប់ព្រៃកោងកាង។ ឥឡូវហ្នឹង ព្រៃកោងកាង យើងដាំថែម។ ចំពោះការបូមខ្សាច់ យើងអាចបូមកន្លែងផ្សេងសិន ដើម្បីឲ្យយើងបានជំហានទី១ ដើរទៅរួច បូមកន្លែងផ្សេងសិន ខ្ញុំសំណូមពរគាត់»។
ប្រធានសមាគមកែបថ្មី លោក អ៊ិន ជុំ បានមានប្រសាសន៍ថា ប្រជាពលរដ្ឋនៅតែប្រកាន់ជំហរមិនឲ្យក្រុមហ៊ុនបូមខ្សាច់នៅតាមឆ្នេរនោះដដែល ហើយទន្ទឹងរង់ចាំការជួបចរចាគ្នាម្ដងទៀត ៖ «បើសិនគេនៅតែបូមទៀត គាត់នឹងដាច់ពោះស្លាប់ ហើយគាត់នឹងតស៊ូដល់ចុងបំផុត ទាំងគ្រួសារ ទាំងកូនចៅរបស់គាត់ហ្នឹង គាត់ត្រូវតែតស៊ូដើម្បីទឹកដីកន្លែងហ្នឹង ព្រោះជាទឹកដីឆ្នាំងបាយរបស់គាត់ ភូមិសាស្រ្ដគាត់...»។
ការចរចារវាងភាគីក្រុមហ៊ុននិងប្រជាពលរដ្ឋ បានធ្វើឡើង បន្ទាប់ពីមានការតវ៉ាជាបន្តបន្ទាប់ពីសំណាក់ប្រជាពលរដ្ឋអ្នកនេសាទ ប្រឆាំងមិនឲ្យក្រុមហ៊ុនកំពតផត ធ្វើការបូមខ្សាច់លុបផ្ទៃសមុទ្រទំហំ ១.០០០ហិកតារ ដើម្បីអភិវឌ្ឍជាតំបន់សេដ្ឋកិច្ចពិសេសកំពត មានដូចជា ការសាងសង់កំពង់ផែអន្តរជាតិ រោងចក្រកាត់ដេរសម្លៀកបំពាក់ និងស្បែកជើង និងប្រឆាំងគម្រោងបូមខ្សាច់លុបផ្ទៃសមុទ្រទំហំ ២០០ហិកតារ នៅភូមិកែបថ្មី និងភូមិទទឹងថ្ងៃ ឃុំបឹងទូករបស់ក្រុមហ៊ុន កែវ ជា Property and Development។
ប្រជាពលរដ្ឋអះអាងថា ការអភិវឌ្ឍនេះនឹងធ្វើឲ្យប៉ះពាល់យ៉ាងធ្ងន់ធ្ងរដល់របរចិញ្ចឹមជីវិតរបស់ពួកគាត់និងធនធានធម្មជាតិ ដូចជាស្មៅសមុទ្រ សារាយ និងព្រៃកោងកាង។
បើតាមលិខិត ស.ជ.ណ. ចុះថ្ងៃទី២៥ មេសា ឆ្នាំ២០០៧ មន្ត្រីទីស្ដីការគណៈរដ្ឋមន្ត្រី លោក ប៊ុន អ៊ុយ បានអនុញ្ញាតឲ្យក្រុមហ៊ុនកំពតផត បូមខ្សាច់ចាក់បំពេញពង្រីកផ្ទៃដីទំហំ ១.០០០ ហិកតារ ដើម្បីបង្កើតជាតំបន់សេដ្ឋកិច្ចពិសេស កំពត។
ហើយបើតាមលិខិតស.ជ.ណ. ដោយឡែកមួយទៀត ចុះថ្ងៃទី៣ មិថុនា ឆ្នាំ២០០៨ ដោយទីស្ដីការគណៈរដ្ឋមន្ត្រី បានអនុញ្ញាតឲ្យក្រុមហ៊ុនឈ្មោះ កែវ ជា Property and Development បូមខ្សាច់និងចាក់ដីលុបឆ្នេរសមុទ្រទំហំប្រមាណ ២០០ហិកតារ នៅភូមិកែបថ្មី និងភូមិទទឹងថ្ងៃ ឃុំបឹងទូក ដើម្បីវិនិយោគអភិវឌ្ឍតំបន់ទេសចរណ៍៕