អគ្គមេបញ្ជាការរងនៃកងយោធពលខេមរភូមិន្ទដែលកំពុងគ្រប់គ្រងកងកម្លាំងយោធាខ្មែរនៅតាមតំបន់ជម្លោះព្រំដែនជុំវិញប្រាសាទព្រះវិហារ លោកឧត្តមសេនីយ៍ឯក ជា តារា បានមានប្រសាសន៍កាលពីព្រឹកថ្ងៃអាទិត្យ ទី៥ ខែកក្កដា ថា ការប្រឈមមុខដាក់គ្នារវាងទាហានខ្មែរថៃនៅតំបន់ជម្លោះព្រំដែនជួរមុខជុំវិញតំបន់ប្រាសាទព្រះវិហារមិនមានភាពតានតឹងទេនាថ្ងៃអាទិត្យនេះ ដោយយោធាខ្មែរថៃខ្លះនៅតាមតំបន់ជម្លោះបានចូលរួមបាយសាមគ្គីជាមួយគ្នាផងដើម្បីបន្ធូរបន្ថយភាពតានតឹងនាថ្ងៃអាទិត្យនេះ។
លោកឧត្តមសេនីយ៍ឯក ជា តារា បានបញ្ជាក់ថា ៖ «កម្លាំងនៅជួរមុខគឺប្រាសាទព្រះវិហារនេះមិនមានការតានតឹងទេ មានការធូរស្រាលណាស់។ ថ្ងៃនេះគឺបណ្ដាមុខព្រួញទាំងអស់ គេធ្វើពិធីជប់លៀងមួយ។ ខាងកម្ពុជាចេញជ្រូកខ្វៃពីរ ឯខាងថៃមានបន្លែ មានបាយដំណើបអី ជួបគ្នាដើម្បីនិយាយគ្នា។ យើងក៏បានបញ្ជាក់យ៉ាងច្បាស់លាស់អំពីគោលជំហររបស់រាជរដ្ឋាភិបាលកម្ពុជា ពិសេសរបស់សម្ដេចតេជោ គឺកម្ពុជាមិនមានគំនិតឈ្លានពានទឹកដីនរណា សូម្បីតែ១មីលីម៉ែត្រក៏គ្មានដែរ។ កន្លងមកហើយសិទ្ធិស្វ័យការពារគឺមាន»។
មន្ត្រីយោធាខ្មែរដដែលបានមានប្រសាសន៍ទៀតថា ការថយចុះនៃភាពតានតឹងបានកើតឡើងក្រោយពីប្រមុខនៃរាជរដ្ឋាភិបាលខ្មែរបានជួបជជែកជាមួយឧបនាយករដ្ឋមន្ត្រីថៃ ខណៈដែលបានធ្វើដំណើរទៅបើកសម្ពោធឲ្យប្រើប្រាស់កំណាត់ផ្លូវ Highway មួយខ្សែចេញពីស្រុកអន្លង់វែង ខេត្តឧត្តរមានជ័យ ឆ្ពោះមកស្រុកប្រាសាទបាគង ខេត្តសៀមរាប កាលពីព្រឹកថ្ងៃសៅរ៍ជាមួយគ្នា។
ក៏ប៉ុន្តែនៅថ្ងៃអាទិត្យដដែលនេះ កងរក្សាព្រំដែនខ្មែរមួយរូបសុំមិនបញ្ចេញឈ្មោះដែលកំពុងប្រចាំការនៅតំបន់ភ្នំចាក់ច្រែងបានរាយការណ៍ថា ទាហានប៉ារ៉ាថៃបានលើកដីចាក់ជាទំនប់ធ្វើជាលេណដ្ឋានយោធាចូលមកក្នុងតំបន់ដែលហាមឃាត់មិនឲ្យមានកងទ័ពបន្ថែមទៀតបន្ទាប់ពីថៃបានប្រើគ្រឿងចក្រឈូសធ្វើផ្លូវរួចមក ៖ «ព្រឹកមិញ វាចាក់ទំនប់ព័ទ្ធធ្វើព្រែកមកដល់កន្លែងមាត់ពិលយើងហើយ ទោះបីហាមម៉េចក៏វានៅតែធ្វើ ទៅប្រាប់វា វានៅតែធ្វើ»។
យោងតាមទីភ្នាក់ងារព័ត៌មានចិន Xinhau ដែលចេញផ្សាយកាលពីថ្ងៃសៅរ៍ ទី៤ ខែកក្កដា បានដកស្រង់សម្ដីឧបនាយករដ្ឋមន្ត្រីថៃទទួលបន្ទុកសន្តិសុខជាតិ លោក Suthep Thoug suban ដោយមានប្រសាសន៍ថា លោកមិនបានជជែកអំពីបញ្ហាដកកងទ័ពចេញពីតំបន់ជម្លោះព្រំដែននៅក្នុងដំណើររបស់លោកមកកាន់កម្ពុជាទេ។
លោក Suthep Thoug suban បានមានប្រសាសន៍ទៀតថា ប្រទេសថៃគ្មាននយោបាយណាមួយក្នុងការកាត់បន្ថយចំនួនកងទ័ពដែលបានដាក់ពង្រាយនៅតាមតំបន់ជម្លោះព្រំដែនកម្ពុជាថៃនោះទេ។
ទោះយ៉ាងណា លោក Suthep បានបញ្ជាក់ដោយជំនឿមុតមាំថា ស្ថានការណ៍ប្រឈមមុខដាក់គ្នាដោយយោធាខ្មែរថៃនៅតាមតំបន់ជម្លោះព្រំដែននឹងមិនធ្វើឲ្យកើនឡើងនូវអំពើហិង្សាទេ៕