លោក សេង ទៀក ជានាយកអង្គការដាប់បិលយូ ដាប់បិលយូ អែហ្វ (WWF) ប្រចាំកម្ពុជា។ លោកបានឲ្យដឹងក្នុងសិក្ខាសាលាស្ដីពីការអភិរក្សសត្វផ្សោតក្បាលត្រងោលទន្លេមេគង្គ នាខេត្តក្រចេះ ថ្ងៃទី១០ ខែមករា ថាគោលបំណងសិក្ខាសាលា ៣ថ្ងៃ របស់មន្ត្រីជំនាញពេលនេះ គឺចង់ទប់ស្កាត់ និងរកពីមូលហេតុនាំឲ្យសត្វផ្សោតស្លាប់ជារៀងរាល់ឆ្នាំ។
លោកបន្តថា កន្លងមកដាប់បិលយូដាប់បិលយូអែហ្វ បានរកឃើញថា សត្វផ្សោតស្លាប់ដោយជាប់មងប្រជានេសាទ ខ្វះជំរក ខ្វះចំណី និងអាចមកពីសារជាតិបារ៉តពុលមានក្នុងទឹកជាដើម។
ប៉ុន្តែលោកមានជំនឿថា តាមរយៈកិច្ចពិភាក្សារបស់មន្ត្រីជំនាញអន្តរជាតិ នឹងអាចជួយឲ្យផែនការអភិរក្សសត្វផ្សោតមានភាពរីកចំរើន និងអាចទប់ស្កាត់ការស្លាប់របស់សត្វផ្សោតទន្លេមេគង្គមិនឲ្យបាត់បង់តទៅទៀត ៖ «ការអភិរក្ស ការទប់ស្កាត់បទល្មើសនេសាទមួយចំនួន គឺជាកត្តាមួយដែលអាចជំរុញឲ្យការគ្រប់គ្រង និងអភិរក្សសត្វផ្សោតឲ្យមានប្រសិទ្ធភាពឡើងវិញ»។
តាមលោក សេង ទៀក សត្វផ្សោតនៅតាមដងទន្លេមេគង្គកម្ពុជា អាចមានមិនដល់ ១០០ក្បាល ទេ បើទោះមន្ត្រីជាន់ខ្ពស់រដ្ឋាភិបាលអះអាងថា អាចមានលើសពី ១០០ក្បាលបែបណាក្តី។ សត្វផ្សោតច្រើនរស់នៅក្នុងទន្លេខេត្តក្រចេះ និងស្ទឹងត្រែង។
ទាក់ទងបញ្ហានេះ លោក បង សុផារិទ្ធ ជាអភិបាលរងខេត្តក្រចេះ។ លោកបានទទួលស្គាល់ថា ជារៀងរាល់ឆ្នាំ សត្វផ្សោតទន្លេមេគង្គភាគច្រើនបានស្លាប់ដោយជាប់មងអ្នកនេសាទ។ ផ្ដើមពីករណីនេះ លោកស្នើឲ្យប្រជាពលរដ្ឋត្រូវលះបង់របរទទួលទានធ្វើនេសាទ មកបង្កើតរបរថ្មី ដូចជាបម្រើសេវាដឹកជញ្ជូនទេសចរណ៍ ឬកែឆ្នៃវត្ថុអនុស្សាវរីយ៍ ជំនួសការធ្វើនេសាទ ដើម្បីចូលរួមអភិរក្សសត្វផ្សោតឲ្យបានគងវង់។
លោក ណៅ ធួក ជាប្រធានរដ្ឋបាលជលផល ដែលបានចូលរួមក្នុងសិក្ខាសាលា។ លោកបានចាត់ទុកសត្វផ្សោតកំពុងដើរតួសំខាន់សម្រាប់ទាក់ទាញភ្ញៀវទេសចរជាតិ និងអន្តរជាតិ ឲ្យចូលមកទស្សនាខេត្តក្រចេះ និងស្ទឹងត្រែង និងនាំឲ្យជីវភាពរស់នៅរបស់ពលរដ្ឋក្នុងមូលដ្ឋានតាមរយៈការលក់វត្ថុអនុស្សាវរីយ៍ សេវាដឹកជញ្ជូនភ្ញៀវទេសចរទស្សនាផ្សោតមានការផ្លាស់ប្ដូរពី១ថ្ងៃទៅ១ថ្ងៃ។
លោកបន្តថា ដើម្បីទប់ស្កាត់ផ្សោតកុំឲ្យបាត់បង់ អាជ្ញាធរពាក់ព័ន្ធត្រូវអប់រំពីសារសំខាន់របស់សត្វផ្សោតឲ្យពលរដ្ឋបានដឹង ៖ «យើងអញ្ជើញអ្នកជំនាញ១សកលលោកមកនេះ ដើម្បីឲ្យជួយពិភាក្សាធ្វើម៉េចមិនត្រឹមតែអភិរក្សសត្វផ្សោតឲ្យសល់ទេ គឺថែមទាំងឲ្យមានចំនួនកើនឡើងថែមទៀតផង។ រកយុទ្ធសាស្ត្រឯកភាពគ្នាមួយទាំងអ្នកជំនាញ ទាំងអ្នកផ្ដល់ជំនួយ ដើម្បីយើងអភិរក្សផ្សោតឲ្យបានគងវង់ និងមានចំនួនកើនឡើង»។
បន្ថែមលើនេះ លោក ទូច ស៊ាងតាណា ជាប្រធានគណៈកម្មការសត្វផ្សោតកម្ពុជា។ លោកបានថ្លែងថា កន្លងមកមានការសន្និដ្ឋានផ្សេងៗ គ្នា ពីស្ថាប័នរដ្ឋាភិបាល និងអង្គការអភិរក្សសត្វផ្សោត ជុំវិញរឿងសត្វផ្សោតស្លាប់។ ប៉ុន្តែលោករំពឹងថា តាមរយៈកិច្ចពិភាក្សារវាងមន្ត្រីជំនាញទាំងជាតិ និងអន្តរជាតិពេលនេះ នឹងអាចរកឃើញពីមូលហេតុពិតនៃការស្លាប់របស់សត្វផ្សោត និងដាក់ចេញផែនការអភិរក្សប្រភេទសត្វផ្សោតដ៏កម្រឲ្យបានគងវង់ទៅថ្ងៃអនាគត។
មន្ត្រីជំនាញផ្នែកថនិកសត្វទឹករបស់អង្គការអន្តរជាតិ មកពីប្រទេសកាណាដា ដែលចូលរួមក្នុងសិក្ខាសាលា បានស្នើទៅមន្ត្រីពាក់ព័ន្ធរដ្ឋាភិបាល ឲ្យចូលរួមការពារសត្វផ្សោតទន្លេមេគង្គឲ្យបានគងវង់ ព្រោះថា សត្វប្រភេទនេះ ជាផ្នែកដ៏សំខាន់នៃបេតិកភណ្ឌជាតិរបស់ប្រទេសកម្ពុជា។ លោកព្រមានថា ការទុកឲ្យសត្វផ្សោតដ៏កម្រឲ្យបាត់បង់ គឺជាអន្តរាយដ៏ធ្ងន់ធ្ងរបំផុតមួយនៅកម្ពុជា។
លោក សេង ទៀក ប្រធានអង្គការដាប់បិលយូ ដាប់បិលយូអែហ្វ បានលើកឡើងពីឱកាស ដែលល្អបំផុតសម្រាប់ការជួយសង្គ្រោះសត្វផ្សោតទន្លេមេគង្គ គឺសកម្មភាពអភិរក្សរួមគ្នា ទាំងស្ថាប័នរដ្ឋាភិបាល សមត្ថកិច្ចពាក់ព័ន្ធ និងអង្គការជាដៃគូអភិវឌ្ឍន៍។
ទាក់ទងផែនការអភិរក្សផ្សោតនេះដែរ កន្លងមកនេះ រាជរដ្ឋាភិបាលកម្ពុជា បានអនុម័តលើអនុក្រឹត្យមួយ ដើម្បីដាក់បញ្ចូលសត្វផ្សោតទន្លេមេគង្គ ចូលទៅក្នុងបញ្ជីឈ្មោះនៃសត្វដែលកំពុងរងគ្រោះចំនួន ៥៨ប្រភេទ ឲ្យស្ថិតនៅក្រោមការការពារយ៉ាងតឹងរ៉ឹងបំផុត៕