រដ្ឋបាលជលផលនៃប្រទេសកម្ពុជា មានគម្រោងស្នើសុំឲ្យរាជរដ្ឋាភិបាលឲ្យប្រកាសដាក់តំបន់ទឹកទន្លេពីខេត្តក្រចេះ ទៅដល់ខេត្តស្ទឹងត្រែង ជាង១០០គីឡូម៉ែត្រ ទុកជាតំបន់ការពារ និងអភិរក្សសត្វផ្សោត។
លោក ណៅ ធួក ប្រតិភូរាជរដ្ឋាភិបាលទទួលបន្ទុករដ្ឋបាលជលផល បានមានប្រសាសន៍នៅថ្ងៃទី៧ កញ្ញា ថា លោកបានជួបជាមួយតំណាងប្រជាសហគមន៍នៅខេត្តក្រចេះ និងស្ទឹងត្រែង ពិភាក្សាលើគម្រោងអនុក្រឹត្យចេញផ្សាយលំអិតពីតំបន់ការពារសត្វផ្សោត។ លោកមានជំនឿថា ការការពារ និងអភិរក្សសត្វផ្សោត ផ្ដល់ផលប្រយោជន៍ជាច្រើនដល់ប្រជាពលរដ្ឋនៅតំបន់មាត់ទន្លេ ដែលមានសត្វផ្សោតរស់នៅ ៖ "តាំងតែពីមានគណៈកម្មាធិការផ្សោតមកនោះ ២០០៥មកគឺយើងបាន គឺយើងបានចាត់វិធានការការពារផ្សោតនោះបានច្រើនហើយ។ បានបន្ថយការងាប់។ កាលមុនងាប់១៦ ឬ១៧ក្បាលក្នុង១ឆ្នាំ ឥឡូវងាប់នៅតែ ៣ទៅ៤ក្បាលទេក្នុង១ឆ្នាំ។ ប៉ុន្តែដើម្បីយើងជាប់ជាជលផលនោះ យើងបានដាក់ថាកន្លែងណាដែលមានសារសំខាន់ ឲ្យបង្កើតទៅជាកន្លែងការពារ កន្លែងអភិរក្សអ៊ីចឹងអីណា"។
សេចក្ដីព្រាងអនុក្រឹត្យនោះ បានកំណត់ខ្លឹមសារជាអាទិ៍ថា នៅខែវស្សាទឹកចម្ងាយប្រមាណ ១០០គីឡូម៉ែត្រពីក្រចេះ ទៅស្ទឹងត្រែង ជាតំបន់ការពារត្រីផ្សោត ហើយដល់ខែប្រាំង មានចំណុចចំនួន៥ ជាតំបន់អភិរក្សសត្វផ្សោតដែលហាមនេសាទ។
លោក ណៅ ធួក បានបន្ថែមឲ្យដឹងថា សេចក្ដីព្រាងអនុក្រឹត្យនោះមិនមានចែងអំពីការដាក់ទោសទេ ប៉ុន្តែយោងតាមច្បាប់ជលផល និងច្បាប់ពាក់ព័ន្ធការពារសត្វកម្រផ្សេងៗទៀតនោះ ជនណាដែលដាក់មងចាប់ ឬនេសាទត្រីផ្សោត ត្រូវមានទោសជាប់គុក ៖ "អានឹងទោសទៅតាមច្បាប់ជាធរមាន។ វាមានច្បាប់ វាមានច្បាប់ជលផល វាមានច្បាប់បរិស្ថាន អ៊ីចឹងទៅ។ ព្រោះក្នុងអនុក្រឹត្យអត់មានបាននិយាយរឿងទោសទេ។ តែបាននិយាយថា អ្នកណាប្រព្រឹត្តិល្មើស ត្រូវបានទទួលទោសតាមច្បាប់ជាធរមាន។ មានអ្នកទៅកន្លែងនោះ បើប្រើឧបករណ៍ឆក់ វាត្រូវជាប់ទោស៥ឆ្នាំ។ ៣ឆ្នាំទៅ៥ឆ្នាំ។ ហើយបើប្រើស្បៃមុងនោះ វាត្រូវ១ឆ្នាំទៅ៣ឆ្នាំ អ៊ីចឹងទៅ"។
ប្រធានសហគមន៍នេសាទនៅឃុំកាំពី ខេត្តក្រចេះ លោក ទុយ សុវណ្ណា បានមានប្រសាសន៍ថា ការបង្កើតឲ្យមានអនុក្រឹត្យការពារត្រីផ្សោត អាចជួយដោះស្រាយ និងបញ្ចៀសទំនាស់រវាងសហគមន៍នេសាទក្នុងការការពារត្រីផ្សោត ៖ "វាប៉ះពាល់ការនេសាទ ប៉ុន្តែវាមានសារសំខាន់សម្រាប់ទេសចរណ៍ សម្រាប់សហគមន៍ដែរ។ ព្រោះបើយើងមានផ្សោត គឺយើងមានទេសចរណ៍។ បើអត់មានទេសចរណ៍ គឺយើងក៏អត់មានអីចូលតាមក្នុងសហគមន៍យើងដែរ។ កន្លងទៅវាមាន។ ហើយម៉្យាងទៀតគម្រោងនេះ ដើម្បីកុំឲ្យមានចម្រូងចម្រាស់នៅតាមសហគមន៍ ឲ្យគេយល់ពីច្បាប់ទម្លាប់អ៊ីចឹងទៅណា"។
លោក សុវណ្ណា បានឲ្យដឹងថា នៅក្នុងឱកាសពិភាក្សាអំពីសេចក្ដីព្រាងច្បាប់ការពារផ្សោតនោះ មានសហគមន៍ខ្លះបានសុំឲ្យមានការកែប្រែលើចំណុចភូមិសាស្ត្រ ដែលរក្សាទុកអភិរក្សត្រីផ្សោត ៖ "សំណើខ្លះឲ្យកែពាក្យពេចន៍ខ្លះ ហើយសហគមន៍នៅបឹងចាម វាបានសុំទុកតំបន់មួយចំនួនសម្រាប់ឲ្យប្រជាពលរដ្ឋនេសាទអ៊ីចឹងទៅណា"។
បច្ចុប្បន្នអ្នកឯកទេសបានសន្និដ្ឋានថា ចំនួនត្រីផ្សោតនៅកម្ពុជាមានប្រមាណពី ១០០ទៅ១៥០ក្បាលប៉ុណ្ណោះ។ ហើយត្រីផ្សោតទាំងនោះរស់នៅតាមអន្លង់ទឹកជ្រៅក្នុងទន្លេមេគង្គ នៅខេត្តក្រចេះ និងស្ទឹងត្រែង៕