អ្នកស្រី Patricia Francis នាយកប្រតិបត្តិរបស់មជ្ឈមណ្ឌលពាណិជ្ជកម្មអន្តរជាតិ (ITC) បានបញ្ជាក់ថា ទីភ្នាក់ងារអភិឌ្ឍន៍បារាំង (AFD) កាលពីពេលថ្មីៗនេះបានចុះកិច្ចព្រមព្រៀងជាមួយនឹងមជ្ឈមណ្ឌលពាណិជ្ជកម្មអន្តរជាតិដើម្បីផ្តល់ឥណទានដល់ផ្នែកឯកជននៅតំបន់អាស៊ីដើម្បីធានាឲ្យមានដំណើរការបានសម្រាប់ជួយដល់សេដ្ឋកិច្ចប្រទេស ដែលក្នុងនោះដែរប្រទេសកម្ពុជានឹងបានជំនួយជាទឹកប្រាក់ប្រមាណ១ពាន់លានដុល្លារអាមេរិក។
អ្នកស្រី Patricia Francis បានមានប្រសាសន៍តាមរយៈអ្នកបកប្រែថា ៖ «ខាង AFD អភិឌ្ឍន៍សហគមន៍ប្រទេសបារាំងហ្នឹងគឺជាក់ស្ដែងគាត់បានចុះកិច្ចព្រមព្រៀងជាមួយស្ថាប័នរបស់យើងដើម្បីផ្ដល់ឥណទានជួយឲ្យខាងផ្នែកឯកជនហ្នឹងគាត់មានដំណើរការបាន។ សម្រាប់កម្ពុជា១ពាន់លានដុល្លារ»។
ដំណឹងនេះបង្ហើបឡើងនៅក្រោយពីសម្រាកនៃកិច្ចប្រជុំប្រចាំតំបន់ស្តីពីជំនួយសម្រាប់ពាណិជ្ជកម្មអាស៊ីនិងប៉ាស៊ីហ្វិកដែលធ្វើឡើងនៅខេត្តសៀមរាប ប្រទេសកម្ពុជា កាលពីថ្ងៃទី២៩ ខែឧសភាកន្លងមកនេះ។
អ្នកស្រី Patricia បានបន្តថា ផ្នែកពាណិជ្ជកម្មឯកជនជាច្រើននៅប្រទសតំបន់អាស៊ីនិងប៉ាស៊ីហ្វិកគឺជាអ្នកដើរតួយ៉ាងសំខាន់និងជាអ្នករងគ្រោះខាងសេដ្ឋកិច្ចដែលមិនមែនបណ្តាលមកពីខ្លួនគេជាអ្នកបង្កផ្ទាល់ទេ ដូច្នេះអង្គការពាណិជ្ជកម្មកំពុងប្រឹងប្រែងរកមធ្យោបាយឲ្យប្រទេសធំៗជាអ្នកមានដែលបណ្ដាលឲ្យមានវិបត្តិសេដ្ឋកិច្ចចេញមកពីនោះ ធ្វើយ៉ាងណាឲ្យនៅតែបន្តជំនួយដើម្បីធានាទៅលើផ្នែកឯកជននៃប្រទេសតំបន់អាស៊ីប៉ាស៊ីហ្វិកសម្រាប់ពង្រឹងពាណិជ្ជកម្មនាំចេញជួយដល់សេដ្ឋកិច្ចប្រទេសរបស់គេ។
លោកបណ្ឌិត សុខ ស៊ីផាន់ណា នាយករបស់មជ្ឈមណ្ឌលពាណិជ្ជកម្មអន្តរជាតិនិងជាអ្នកជំនាញសេដ្ឋកិច្ចរបស់ប្រទេសកម្ពុជាមួយរូប បានមានប្រសាសន៍ថា ពេលដែលប្រទេសអ្នកមានដូចជាសហរដ្ឋអាមេរិក សហគមន៍អឺរ៉ុបនិងជប៉ុនជាដើមមានវិបត្តិសេដ្ឋកិច្ច កម្ពុជាមានបញ្ហាទីផ្សារនាំចេញ ដូចជាវិស័យកាត់ដេរ ទីផ្សារទេសចរណ៍និងឧស្សាហកម្មធុនតូចបានធ្លាក់ចុះ ក៏ប៉ុន្តែផ្នែកឯកជនមានតួនាទីសំខាន់ក្នុងការជួយដល់សេដ្ឋកិច្ចដោយសម្លឹងទៅលើផ្នែកកសិកម្មនាំចេញទៅកាន់ប្រទេសជិតខាងវិញ។
ប្រធានក្រុមហ៊ុន ខូវជីលីគ្រូប លោកឧកញ៉ា ខូវ ផល្លាបុត្រ បានមានប្រសាសន៍ថា នៅពេលដែលពិភពលោកកំពុងជួបវិបត្តិហិរញ្ញវត្ថុនេះផ្នែកពាណិជ្ជកម្មឯកជននៅកម្ពុជាកំពុងមានបញ្ហាចោទលើកង្វះហិរញ្ញវត្ថុដោយធនាគារក្នុងប្រទេសមិនហ៊ានឲ្យខ្ជីលុយតាមតម្រូវការនោះ។
លោកឧកញ៉ា ខូវ ផល្លាបុត្រ បានបញ្ជាក់ថា ៖ «ទូទៅហើយវាជួបបញ្ហាហិរញ្ញវត្ថុហ្នឹង ហើយទី២ជួបបញ្ហារឿងទីផ្សារ»។
លោក ខូវ ផល្លាបុត្រ បានមានប្រសាសន៍ថា ផលវិបាកនៃកង្វះហិរញ្ញវត្ថុនេះតាមសហគ្រាសខ្លះត្រូវផ្អាកផលិតនិងកន្លែងការងារខ្លះត្រូវកាត់បន្ថយបុគ្គលិកជាដើម ក៏ប៉ុន្តែទោះយ៉ាងណាអ្នកពាណិជ្ជកម្មនៅតែមានសង្ឃឹមនិងរង់ចាំភាពស្រស់បំព្រងនៃសេដ្ឋកិច្ចត្រឡប់មកវិញនោះ៕