គេចោទក្រុមផ្តល់ជំនួយទាំងអស់នោះថា មិនបានចាត់វិធានការអ្វីសោះ នៅពេលរាជរដ្ឋាភិបាលបង្កើនសកម្មភាពបង្រ្កាបក្រុមអ្នករិះគន់ បន្ទាប់ពីតុលាការដាក់ទោសអ្នកស្រី មូរ សុខហូរ តំណាងរាស្រ្តពីគណបក្សជំទាស់ពីបទបរិហារកេរ្តិ៍នាយករដ្ឋមន្រ្តី។
អ្នកស្រី Sara Colm អ្នកស្រាវជ្រាវពីអង្គការ Human Rights Watch នៅបុរីញូវយ៉ក សហរដ្ឋអាមេរិក បានប្រាប់កាសែតភ្នំពេញប៉ុស្តិ៍ ផ្សាយថ្ងៃព្រហស្បតិ៍ ទី៦ សីហាថា ជាការអាម៉ាស់មួយ ដែលម្ចាស់ជំនួយទាំងនោះនៅតែបន្តផ្តល់ថវិកាដល់កម្មវិធីកំណែទម្រង់ប្រព័ន្ធយុត្តិធម៌ ការអនុវត្តច្បាប់ និងការទ្រទ្រង់ប្រជាធិបតេយ្យ។
ក្នុងពេលជាមួយគ្នានេះ អតីតនាយករដ្ឋមន្រ្តី ប៉ែន សុវណ្ណ នៃរបបសាធារណរដ្ឋប្រជាមានិតកម្ពុជា ប្រាប់កាសែតភ្នំពេញប៉ុស្តិ៍ ក្នុងកិច្ចសម្ភាសន៍មួយ ថា លោកគ្មានជំនឿលើរបបគ្រប់គ្រងសព្វថ្ងៃ ថានឹងផ្តល់យុត្តិធម៌ក្នុងសង្គមបានឡើយ តាំងពីតុលាការជាតិរហូតដល់សាលាក្តីខ្មែរក្រហម។
លោក ប៉ែន សុវណ្ណ ឲ្យហេតុផលមួយចំនួន ដូចជាមេដឹកនាំបច្ចុប្បន្នទទួលឥទ្ធិពលខ្មែរក្រហម គឺគ្រាន់តែនាំគ្នានិយាយអំពីលទ្ធិប្រជាធិបតេយ្យ តែពង្រឹងអំណាចដាច់ខាត មានរដ្ឋធម្មនុញ្ញលើក្រដាស តែមិនអនុវត្ត។
លោកថា មូលហេតុចម្បងដែលគេចាប់លោកដាក់គុក១០ឆ្នាំនៅហាណូយ មកពីលោកមានគោលដៅឲ្យកម្ពុជាមានឯករាជភាព មានសេរីភាព លទ្ធិប្រជាធិបតេយ្យ អធិបតេយ្យ និងបូរណភាពទឹកដី ពោលគឺ មិនចង់ឃើញយៀកណាមត្រួតត្រាខ្មែរ ព្រោះយៀកណាមមិនសុចរិតស្មោះត្រង់ចំពោះអំពើដែលគេជួយខ្មែរនោះទេ៕