ប្រធានសហភាពការងារកម្ពុជា លោក អាត់ ធន់ បានថ្លែងនៅថ្ងៃអង្គារ ទី២៧ ខែកក្កដាថា សេចក្ដីព្រាងច្បាប់ស្ដីពីសហជីព ត្រូវបានក្រសួងការងារ និងបណ្ដុះបណ្ដាលវិជ្ជាជីវៈ ផ្ញើមកឲ្យគ្រប់សហជីពនានាពិនិត្យច្បាប់នេះ មានរយៈពេលខ្លីពេក។ ក្រសួងតម្រូវឲ្យសហជីពសុំកែតម្រូវនានាក្នុងច្បាប់នេះមិនឲ្យហួសថ្ងៃទី៣០ ខែកក្កដាទេ។ លោកបានចោទថា ក្រសួងការងារហាក់ចាប់បង្ខំឲ្យសហជីពកម្មករទាំងអស់ ត្រូវទទួលយកសេចក្ដីព្រាងច្បាប់ស្តីពីសហជីពនេះ។
លោកបន្តថា ក្នុងជំពូកទី៣ និងមាត្រាមួយចំនួននៃសេចក្ដីព្រាងច្បាប់នេះ ហាក់កៀបសង្កត់តែមកលើសហជីពដែលធ្វើការបម្រើកម្មករពិតប្រាកដ។ ប៉ុន្តែសេចក្ដីព្រាងច្បាប់នោះបែរជាផ្ដល់សិទ្ធិអំណាចឲ្យទៅថៅកែ និងក្រសួងរបស់រដ្ឋទើបអាចបង្កើតសហជីពបានងាយស្រួល។
លោក អាត់ ធន់ មានប្រសាសន៍ដូច្នេះ ៖ «ដើម្បីបង្កើតសហជីពបាន កម្មករត្រូវមានគ្នាយ៉ាងតិច ២០នាក់ ហើយត្រូវបានបង់លុយតាមរយៈក្រុមហ៊ុន។ អ៊ីចឹងមានន័យថា ក្រុមហ៊ុនដែលកម្មករនៅហ្នឹង គឺវាពិតជាមានការលូកលាន់នៅក្នុងសហជីពហើយ។ គាត់បង្កើតម៉េចបាន បើក្រុមហ៊ុនគាត់មិនចង់ឲ្យបង្កើត គាត់ម៉េចចេញអាកាតលុយនោះឲ្យ»។
លោក អាត់ ធន់ មិនបានប្រាប់ពីមាត្រាក្នុងជំពូកណាខ្លះដែលសហភាពការងារកម្ពុជា សុំលុប និងកែតម្រូវនោះទេ។
ចំណែកប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុនី ថ្លែងថា លោកមានការព្រួយបារម្ភខ្លាំងអំពីច្បាប់ស្តីពីសហជីព នៅពេលអនុម័តរួចសហជីពនានាអាចនឹងបិទទាំងអស់ ក្រៅពីរដ្ឋាភិបាល និងថៅកែជាអ្នកបង្កើតសហជីព។
លោក ជា មុនី មានប្រសាសន៍ថា ៖ «ច្បាប់នេះភាគច្រើនមិនតម្រូវឲ្យមានចលនាសហជីពខ្លាំងក្លាទេ។ ជាទូទៅគឺតម្រូវទៅលើនិយោជកច្រើនជាង ហើយច្បាប់នេះទៀតសោត ខាងសហជីពសេរីកម្មករនៃព្រះរាជាណាចក្រកម្ពុជា គឺមិនស្វាគមន៍ទេ នៅមាត្រាមួយចំនួនដែលយើងឃើញថា គឺកម្មករកម្មការិនីនឹងត្រូវបាត់បង់ទៅនឹងសហជីពរបស់គាត់ហើយ»។
ប្រធានសភាពសហជីពកម្ពុជា លោក រ៉ុង ឈុន បានថ្លែងថា មាត្រាមួយចំនួននៃសេចក្ដីព្រាងច្បាប់ស្ដីពីសហជីពនេះ បានរឹតបន្តឹងសេរីភាពសហជីព និងថ្នាក់ដឹងនាំសហជីពផងដែរ។
លោក រ៉ុង ឈុន ថ្លែងដូច្នេះ ៖ «ពីព្រោះយើងបានទាមទារឲ្យលុបមាត្រាមួយចំនួននៅក្នុងច្បាប់ ហើយនិងកែលម្អនូវខ្លឹមសារក្នុងមាត្រាខ្លះថែមទៀត ដើម្បីធ្វើយ៉ាងណាឲ្យមានការធានាដល់សេរីភាព និងថ្នាក់ដឹកនាំសហជីព គ្រប់លំដាប់ថ្នាក់»។
មន្ត្រីសម្របសម្រួលគម្រោងថ្នាក់ជាតិផ្នែកគម្រោងអប់រំសហជីព លោក យឹម សេរីវឌ្ឍនៈ បានថ្លែងថា ខាងសហជីពចង់ឲ្យច្បាប់សហជីពនោះគ្របដណ្ដប់ទៅលើទាំងកម្មករ ទាំងថៅកែ ឲ្យបានស្របទៅតាមអនុសញ្ញាអង្គការពលកម្មអន្តរជាតិ ដែលរដ្ឋាភិបាលបានផ្ដល់សច្ចាប័នរួចហើយ គឺអនុសញ្ញាលេខ៨៧ និងលេខ៩៨។ ទី២ គឺឲ្យមានការផ្តល់អំណាចទៅលើសហជីពដែលមានភាពជាតំណាងបំផុតឲ្យមានសិទ្ធិចរចាជាមួយថៅកែ ហើយថៅកែត្រូវតែស្មោះត្រង់ចូលមកចរចាជាមួយតំណាងបំផុតនោះ ដើម្បីសម្រេចឲ្យបាននូវកិច្ចព្រមព្រៀងការងារក្តី ការសុំដំឡើងប្រាក់ខែក្តី និងសុខុមាលភាពកម្មករក្តី។ ទី៣ បើមានសមាជិកចាប់ពី ៦នាក់ឡើងទៅ គេអាចសុំបង្កើតសហជីពបានដើម្បីចរចារកផលប្រយោជន៍ផ្សេងៗ ជាមួយនិយោជក ឬថៅកែ។ ទី៤ ការកំណត់ទោសទណ្ឌ ត្រូវកំណត់ទោសតាមបុគ្គល មិនត្រូវដាក់កំហុសទៅលើអង្គការវិជ្ជាជីវៈនោះទេ។ លោកបន្តថា ការសុំកែតម្រូវ និងលុបមាត្រាខ្លះនៃសេចក្ដីព្រាងច្បាប់នោះ ត្រូវបានដាក់ជូនទៅក្រុមការងាររបស់ក្រសួងនោះហើយ កាលពីថ្ងៃ២៦ ខែកក្កដា ឆ្នាំ២០១០។
សេចក្ដីព្រាងច្បាប់ស្ដីពីសហជីពមាន ១៧ជំពូក និង ៩១មាត្រា៕