នៅក្នុងពិធីផ្សព្វផ្សាយរបាយការណ៍ប្រចាំឆ្នាំ២០០៧ របស់អាជ្ញាធរជាតិប្រយុទ្ធប្រឆាំងគ្រឿងញៀន ស្តីពីទិន្ន័យគ្រឿងញៀនខុសច្បាប់ និងប្រព័ន្ធតាមដានជាប្រចាំនៅកម្ពុជា នៅថ្ងៃទី១២ សីហា អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក លួ រ៉ាមីន បានថ្លែងថា ពួកឧក្រិដ្ឋជនគ្រឿងញៀនមិននៅស្ងៀមទេ នៅពេលដែលមានការត្រួតពិនិត្យនៅតាមទីប្រជុំជន ពួកគេបានទៅធ្វើចរាចរណ៍នៅតាមជនបទ។
លោក លួ រ៉ាមីន មានប្រសាសន៍ដូច្នេះថា ៖ «យើងបានកត់សម្គាល់ឃើញថា តួលេខអ្នកប្រើបំពានគ្រឿងញៀន មានការថយចុះ បើប្រៀបធៀបទៅនឹងឆ្នាំ២០០៦។ នៅក្នុងឆ្នាំ២០០៦ យើងមានតួលេខ អ្នកប្រើគ្រឿងញៀន គឺ ៦.៥០០នាក់ ប៉ុន្តែ នៅក្នុងឆ្នាំ២០០៧, ២០០៨នេះ យើងឃើញថា បានធ្លាក់មកនៅ ៥.៧៩៧នាក់»។
លោក លួ រ៉ាមីន ក៏បានសម្ដែងការព្រួយបារម្ភចំពោះការរាលដាលខាងលើនេះ ហើយអាជ្ញាធរជាតិប្រយុទ្ធប្រឆាំងនឹងគ្រឿងញៀន ទាមទារឲ្យមានការចូលរួមសហការជួយជ្រុមជ្រែងជាមួយនឹងបណ្ដាដៃគូអភិវឌ្ឍន៍នានា អ្នកផ្ដល់សេវានានា ដើម្បីកាត់បន្ថយអ្នកប្រើប្រាស់គ្រឿងញៀន។
លោក លួ រ៉ាមីន មានប្រសាសន៍បន្ថែមដូច្នេះថា ៖ «ហើយឥឡូវនេះ យើងក៏ឃើញដែរថា បរិមាណគ្រឿងញៀន ដែលឆ្លងកាត់កម្ពុជា នៅតែជាបញ្ហាមួយ គួរឲ្យកង្វល់ ហើយនៅតែមានលក្ខណៈស្មុគស្មាញ។ ពីព្រោះដូចខ្ញុំបានបញ្ជាក់ នៅក្នុងរបាយការណ៍ ៦ខែដើមឆ្នាំ ២០០៨ យើងឃើញថា ប្រតិបត្តិការដែលយើងបង្រ្កាបគ្រឿងញៀន មានចំនួនច្រើនជាងមុន»។
នៅក្នុងពិធីនេះដែរ មន្រ្តីអង្គការ UNODC លោក ឡា ភីឌ័រសុន មានប្រសាសន៍ថា អង្គការរបស់លោក នឹងបញ្ជូនអ្នកជំនាញ ១៥នាក់មកកម្ពុជា ដែលមានជំនាញដូចជាផ្នែកច្បាប់ ផ្នែករៀបចំរចនាសម្ព័ន្ធត្រួតពិនិត្យគ្រឿងញៀន ព្រមទាំងជំនាញផ្សេងៗមួយចំនួនទៀត នៅខែខាងមុខនេះ ដើម្បីជួយកាត់បន្ថយអ្នកប្រើប្រាស់គ្រឿងញៀន នៅប្រទេសកម្ពុជា។
ចំណែកឯនាយកកម្មវិធីនៃអង្គការ KHANA លោក ទិត ឃីមួយ បានមានប្រសាសន៍នៅក្នុងពិធីនេះដែរថា រហូតមកដល់ថ្ងៃនេះ គម្រោងអង្គការរបស់លោកបានអប់រំអំពីគ្រោះថ្នាក់និងផលប៉ះពាល់នៃគ្រឿងញៀន និងកាត់បន្ថយនូវការចម្លងមេរោគអេដស៍ ដែលមានទំនាក់ទំនងនឹងការប្រើបំពានគ្រឿងញៀន ដែលមានមនុស្សសរុប ប្រមាណជិត ២ម៉ឺននាក់។
លោកបន្តថា នៅឆ្នាំខាងមុខនេះ លោកនឹងធ្វើការជាមួយនឹងអង្គការដៃគូ ដើម្បីពង្រីកប្រព័ន្ធផ្សព្វផ្សាយដល់តំបន់ជនបទឲ្យបានកាន់តែច្រើន ដើម្បីជួយកាត់បន្ថយអ្នកប្រើប្រាស់គ្រឿងញៀន។
បើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងថា បញ្ហាការប្រើប្រាស់គ្រឿងញៀននៅកម្ពុជា នៅតែមានការពាក់ព័ន្ធនឹងយុវជន ដែលគេដឹងថា ជាអ្នកប្រើប្រាស់គ្រឿងញៀន មានអាយុក្រោម ២៦ឆ្នាំ។ មេតំហ្វេតាមីន មានចំនួន ៨០% នៃគ្រឿងញៀនទាំងអស់។ ការប្រើប្រាស់គ្រឿងញៀន ហាក់ដូចជាមានការកើនឡើង ដោយសារតែភាពសម្បូរបែបនៃគ្រឿងញៀន និងការខ្វះការយល់ដឹងក្នុងចំណោមយុវជន៕