ក្នុងពិធីនោះ អភិបាលរាជធានីភ្នំពេញ លោក កែប ជុតិមា អំពាវនាវឲ្យពលរដ្ឋ និងសមត្ថកិច្ចគ្រប់លំដាប់ថ្នាក់ចូលរួមទាំងអស់គ្នា ដើម្បីទប់ស្កាត់គ្រឿងញៀន ព្រោះគ្រឿងញៀនអាចបំផ្លាញធនធានមនុស្ស និងធ្វើឲ្យប៉ះពាល់យ៉ាងខ្លាំងដល់សង្គមជាតិ។
លោក កែប ជុតិមា៖ «រាល់ឆ្នាំយើងបង្ក្រាប យើងដុតគ្រឿងញៀន។ យើងមើលទៅគឺថា អត់ច្រើនទេ ខ្ញុំគិតថា បើដឹកឡានប្រហែលជាឡានកាំមីញ៉ុងមួយ ប៉ុន្តែបរិមាណនៃគ្រឿងញៀននេះ អាចបំផ្លាញទីក្រុងភ្នំពេញមួយទាំងមូល ហើយអាចបំផ្លាញប្រទេសកម្ពុជា ពាក់កណ្ដាល»។
ជាមួយគ្នានេះ អនុប្រធានអាជ្ញាធរប្រយុទ្ធប្រឆាំងគ្រឿង លោក កៅ ខុនណារ៉ា លើកឡើងថា ការប្រយុទ្ធប្រឆាំងគ្រឿងញៀនប្រព្រឹត្តទៅប្រកបដោយប្រសិទ្ធភាពបានគេត្រូវពឹងផ្អែកលើការយល់ដឹងច្បាស់លាស់របស់ប្រជាពលរដ្ឋលើផលប៉ះពាល់នៃគ្រឿងញៀន ហើយពលរដ្ឋទាំងនោះចូលរួមយ៉ាងសកម្មដើម្បីទប់ស្កាត់កុំឲ្យមានការប្រើប្រាស់គ្រឿងញៀនក្នុងសហគមន៍។
លោក កៅ ខុនណារ៉ា៖ «សង្គមជាតិយើងមួយដែលគ្មានគ្រឿងញៀន យើងអាចធ្វើបាន បើសិនប្រជាជនរស់នៅក្នុងសហគមន៍ ក្នុងប្រទេសទាំងមូលយល់ច្បាស់ពីបញ្ហាគ្រឿងញៀន និងចូលរួមកំលាំងគ្នាដើម្បីចែករំលែកនូវការទទួលខុសត្រូវក្នុងការធ្វើឲ្យសហគមន៍គ្មានគ្រឿងញៀនតាមគោលនយោបាយភូមិ ឃុំ មានសុវត្ថិភាពរបស់រដ្ឋាភិបាលកម្ពុជា»។
កាដុតបំផ្លាញគ្រឿងញៀនជាទម្លាប់មួយរបស់អាជ្ញាធរកម្ពុជា តែងធើ្វឡើងរាល់លើកពេលចាប់បានគ្រឿងញៀន។
ប្រទេសកម្ពុជាគឺជាប្រទេសមួយដែលមានចរាចរណ៍គ្រឿងញៀនឆ្លងកាត់ ហើយរយៈពេលប៉ុន្មានឆ្នាំចុងក្រោយនេះ ក៏ជាកន្លែងផលិតគ្រឿងញៀនផងដែរ ជាពិសេសការផលិតថ្នាំ ម៉េតំហ្វេតាមីន (Methamphetamines)។
មានមន្ត្រីរដ្ឋាភិបាលមួយចំនួន រហូតមានអ្នកខ្លះពាក់ដល់ទៅផ្កាយ ជាប់ពាក់ព័ន្ធរឿងរកស៊ីគ្រឿងញៀននេះដែរ។ ជាក់ស្ដែងដូចជាអតីតប្រធានមន្ទីរប្រឆាំងគ្រឿងញៀនក្រសួងមហាផ្ទៃ លោកផ្កាយបី ម៉ឹក ដារ៉ា និងមន្ត្រីគ្រាក់ៗក្រោមឱវាទមួយចំនួនទៀត ត្រូវបានចាប់ខ្លួនជាបន្តបន្ទាប់បញ្ជូនទៅតុលាការ។ នៅថ្ងៃទី២៤ សីហា ឆ្នាំ២០១២ កន្លងទៅនេះ ប៉ូលិសបានចាប់ខ្លួនលោកផ្កាយពីរនៅក្រសួងការពារជាតិម្នាក់ទៀត លោក ចាន់ ឫទ្ធីឌី និងបក្សពួក ពាក់ព័ន្ទជួញដូរគ្រឿងញៀនដូចគ្នា។
ប្រធានមន្ទីរប្រឆាំងគ្រឿងញៀននៃក្រសួងមហាផ្ទៃ លោក ខៀវ សាម៉ន ឲ្យដឹងនៅថ្ងៃទី២៨ សីហា ថា លោក ច័ន្ទ ឫទ្ធីឌី និងបក្សពួកដែលគេសង្ស័យថា ជួញដូរគ្រឿងញៀននោះ កំពុងស្ថិតក្រោមការសាកសួររបស់ចៅក្រមសាលាដំបូងរាជធានីភ្នំពេញ៖ «បាទ! បានបញ្ជូនទៅតុលាការដើម្បីគេរៀបចំតាមនីតិវិធីនៅខាងតុលាការនោះហើយបាទ!»។
លោក ខៀវ សាម៉ន បញ្ជាក់ថា លោក ចន្ទ័ ឫទ្ធីឌី និងបក្សពួកប្រឈមនឹងការឃុំខ្លួនបណ្ដោះអាសន្ន បើតុលាការរកឃើញភស្តុតាងច្បាស់លាស់បញ្ជាក់ថា ពួកគេជាប់ពាក់ព័ន្ធនឹងការជួញដូរគ្រឿងញៀនពិតប្រាកដ៖ «កិច្ចការហ្នឹង បើនិយាយពីការសារភាពរបស់គាត់ ហើយនិងវត្ថុតាងជាថ្នាំញៀនដែលមានទំហំដ៏ច្រើន គឺថាអាហ្នឹងតុលាការហ្នឹងត្រូវតែចាត់ការតាមផ្លូវហ្នឹង»។
ទាក់ទងនឹងបញ្ហាការជួញដូរគ្រឿងញៀននេះ អ្នកនាំពាក្យក្រសួងមហាផ្ទៃ លោក ខៀវ សុភ័គ អះអាងថា មន្ទីរប្រឆាំងការជួញដូរគ្រឿងញៀននៃក្រសួងមហាផ្ទៃ បានចុះបង្ក្រាបការជួញដូរគ្រឿងញៀនចំនួន ៦ករណី និងចាប់ជនសង្ស័យបានចំនួន ៩នាក់ នៅក្នុងខែសីហា ឆ្នាំ២០១២។
លោក ខៀវ សុភ័គ បញ្ជាក់បន្ថែមថា ដើម្បីលើកទឹកចិត្តដល់កំលាំងសមត្ថកិច្ចឲ្យបន្តសកម្មភាពចុះបង្ក្រាបគ្រឿងញៀន ឧបនាយករដ្ឋមន្ត្រី និងជាមន្ត្រីក្រសួងមហាផ្ទៃ លោក ស ខេង ផ្ដល់ថវិកាលើកទឹកចិត្តដល់មន្ទីរប្រឆាំងការជួញដូរគ្រឿងញៀនចំនួន ៥០លានរៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។