ឌុច បដិសេធសាក្សីទី៤នៅគុកទួលស្លែង
ដោយ ឡេង ម៉ាលី
2009-07-03
អតីតប្រធានគុកទួលស្លែង កាំង ហ្កេកអ៊ាវ ហៅ ឌុច និងមេធាវីរបស់គាត់ បានបដិសេធសាក្សីទី៤នៅគុកទួលស្លែង ដែលឡើងមកបំភ្លឺដល់អង្គជំនុំជម្រះនៅសាលាក្តីខ្មែរក្រហម កាលពីថ្ងៃទី២ ខែកក្កដានេះ ដោយនិយាយថា មិនមានភស្តុតាងមាំទាំឡើយ។
អតីតមេគុកទួលស្លែង កាំង ហ្កិចអ៊ាវ ហៅ ឌុច បង្ហាញខ្លួនលើកដំបូងក្នុងសវនាការជំនុំជម្រះក្ដីនៅឯសាលាក្ដីខ្មែរក្រហម កាលពីថ្ងៃទី១៧ កុម្ភៈ ២០០៩។
ការបដិសេធនេះបានកើតមានក្នុងពេលដែលលោក នង ចាន់ផល ឡើងបំភ្លឺជូនអង្គជំនុំជម្រះសាលាដំបូងអំពីរឿងរ៉ាវរបស់លោកនៅក្នុងគុកទួលស្លែង ក្នុងគ្រាដែលលោក ម្តាយនិងប្អូនរបស់លោកជាប់ឃុំនៅទីនោះ កាលពីចុងឆ្នាំ១៩៧៨ មុននឹងរបបខ្មែរក្រហមដួលរលំបន្តិច។
ការអះអាងរបស់លោក នង ចាន់ផល ត្រូវបានលោក កា សាវុធ មេធាវីការពារក្តីឲ្យជនជាប់ចោទ កាំង ហ្កេកអ៊ាវ ហៅ ឌុច តវ៉ាជាមួយនឹងមន្ទិលរបស់ខ្លួនដូច្នេះ ៖ «គេបញ្ជាមកពីលើ ជាពិសេស គឺថ្ងៃ២-៣ មករា ១៩៧៩ គឺ នួន ជា បញ្ជាតែម្ដង ទាំងក្មេងទាំងចាស់ទាំងប្រុសទាំងស្រីត្រូវកម្ទេចឲ្យអស់គ្មានឲ្យសល់។ ដូច្នេះ គេប្រមូលខ្ទេចខ្ទី គ្មានឲ្យនៅសល់ម្នាក់នៅស-២១ទេ លើកលែងតែ៤នាក់ដែលបាញ់ជនបរទេសជាអ្នកកាសែតដែលគេមិនទាន់សួរចម្លើយ គេទុកសិន។ មានតែប៉ុណ្ណឹងទេ ហើយជនជាប់ចោទ គាត់បានប្រាប់ខ្ញុំថា គាត់អត់ជឿថា មាននរណាហ៊ានប្រឆាំងនឹងបញ្ជារបស់ថ្នាក់លើទេ»។
លោក នង ចាន់ផល បានជម្រាបជូនអង្គជំនុំជម្រះអំពីស្ថានភាពម្តាយរបស់លោកយ៉ាងដូច្នេះ ៖ «ដល់ពេលគាត់ទៅដល់ គេសម្លុតគាត់ គេច្រានគាត់ឲ្យឈរនៅមុខម៉ាស៊ីនថត ហើមានការរុញឲ្យគាត់ឈរឲ្យត្រង់ តែគាត់ធ្វើមិនត្រូវ។ ដោយគាត់មានជំងឺហើមផង ខ្ញុំឃើញគេរុញគាត់ចង់ដួល ហើយទាញសក់គាត់មកក្រោយ។ មកដល់ចំណុចនេះ ធ្វើឲ្យខ្ញុំនឹកឃើញដដែល ថ្មីៗ»។
លោក នង ចាន់ផល ជម្រាបអង្គជំនុំជម្រះថា ម្តាយរបស់លោក ប្អូន និងរូបលោក ត្រូវខ្មែរក្រហមចាប់បញ្ជូនមកគុកទួលស្លែង បន្ទាប់ពីឳពុករបស់លោកត្រូវចាប់ខ្លួនមួយរយៈមក។
ជនជាប់ចោទ ឌុច បានទទួលយកការឈឺចាប់របស់លោក នង ចាន់ផល ហើយទទួលស្គាល់ថា ឳពុករបស់លោក នង ចាន់ផល ពិតជាត្រូវចាប់មកគុកទួលស្លែង ពីព្រោះមានឯកសារបញ្ជាក់។
ចំពោះករណីម្តាយរបស់លោក នង ចាន់ផល ជនជាប់ចោទ ឌុច បានបញ្ជាក់ដូច្នេះ ៖ «ចំពោះម្ដាយ និងរូបលោក នង ចាន់ផល ផ្ទាល់ តើរងទុក្ខវេទនានៅទីណា ខ្ញុំអត់ទាន់ច្បាស់ ដូច្នេះបើមានក្រដាសមួយសន្លឹកមកទៀត វាច្បាស់ហើយ ម្ដាយមកគឺកូនមកហើយ។ គ្រប់ភស្តុតាងទាំងអស់ដែលមានឥទ្ធិពលលើខ្ញុំគឺភស្តុតាងចេញពីស-២១។ ខ្ញុំមិនទទួលស្គាល់ភស្តុតាងណាដែលមិនចេញពីស-២១ទេ»។
លោក នង ចាន់ផល គឺជាអតីតកុមារម្នាក់ក្នុងចំណោមកុមារ ៥នាក់ ដែលត្រូវបានសង្រ្គោះឲ្យរួចជីវិតពីគុកទួលស្លែង ក្រោយពេលរបបខ្មែរក្រហមដួលរលំនៅឆ្នាំ១៩៧៩៕
អត្ថបទដែលទាក់ទង
- សង្គមស៊ីវិលផ្សព្វផ្សាយការយល់ដឹងពីសាលាក្ដីខ្មែរក្រហមនៅស្វាយរៀង
- មន្រ្តីនៃសាលាក្ដីខ្មែរក្រហមអំពាវនាវឲ្យជនរងគ្រោះដាក់ពាក្យបណ្ដឹងឲ្យបានឆាប់
- គ្រូបងៀននិងសិស្សជួបគ្នាស្វែងយល់ពីដំណើរការកាត់ក្តីអតីតមេខ្មែរក្រហម
- ចៅក្រមអន្តរជាតិមួយរូបនៃសាលាក្តីខ្មែរក្រហមរងការទាមទារឲ្យដកចេញ
- ហ៊ុន សែន ប្រតិកម្មនឹងការកោះហៅមន្ត្រីរដ្ឋាភិបាលទៅធ្វើជាសាក្សី
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.