ការកាត់សេចក្តីលើជនជាប់ចោទឈ្មោះ កាំង ហ្កេកអ៊ាវ ហៅ ឌុច អតីតមេគុកទួលស្លែង ឬមន្ទីរស-២១ នៃរបបកម្ពុជាប្រជាធិបតេយ្យ នឹងត្រូវឈានដល់ទីបញ្ចប់នៅសប្តាហ៍នេះ ហើយដែលគេរំពឹងថា ឌុច នឹងទទួលសារភាពកំហុសរបស់ខ្លួនក្នុងអំពើធ្វើទារុណកម្មនិងការកាប់សម្លាប់មនុស្សប្រមាណពី១៤.០០០នាក់ទៅ១៦.០០០នាក់នៅក្នុងបរិវេណគុកទួលស្លែង និងនៅវាលពិឃាតបឹងជើងឯក។
ប្រភពព័ត៌មានអេភី (AP) បានឲ្យដឹងថា លោក ហ្វ្រង់ស្វ័រ រូស (Francois Roux) មេធាវីជនបរទេសដែលការពារក្តីឲ្យ ឌុច បានមានប្រសាសន៍កាលពីថ្ងៃអាទិត្យម្សិលមិញនេះថា ឌុច កំពុងមានអារម្មណ៍ញាប់ញ័រក្នុងចិត្តខណៈដែលនឹងត្រូវឡើងថ្លែងជាចុងក្រោយនៅសប្តាហ៍នេះនៅចំពោះមុខអង្គជំនុំជម្រះវិសាមញ្ញនៃសាលាក្តីខ្មែរក្រហម។
លោកមេធាវី ហ្វ្រង់ស្វ័រ រូស បន្តថា ឌុច មានការព្រួយបារម្ភនិងខ្វាយខ្វល់ដោយពុំដឹងថា នឹងថ្លែងនិយាយពីអ្វីខ្លះ ហើយតើត្រូវនិយាយដោយរបៀបណា? លោកមេធាវី ហ្វ្រង់ស្វ័រ រូស បន្តទៀតថា ឌុច សង្ឃឹមថា ចៅក្រមនឹងធ្វើការពិចារណាចំពោះការសារភាពនិងការសុំខមាទោសរបស់គាត់ពីជនរងគ្រោះនិងក្រុមគ្រួសាររបស់គេ។
លោក រាជ សម្បត្តិ ប្រធានផ្នែកកិច្ចការសាធារណៈនៃសាលាក្តីខ្មែរក្រហមបានថ្លែងថា សប្តាហ៍នេះគឺជាសប្តាហ៍ដែលមានអត្ថន័យនិងមានសារសំខាន់ជាខ្លាំងសម្រាប់ប្រជាពលរដ្ឋខ្មែរទូទៅនិងជនរងគ្រោះទាំងឡាយនៃរបបខ្មែរក្រហម ដែលបានបាត់បង់អ្នកជាទីស្រឡាញ់របស់គេ ដែលក្នុងរបបនេះបានបណ្តាលឲ្យមានមនុស្សប្រមាណ១លាន៧សែននាក់បានស្លាប់ ដោយសារការកាប់សម្លាប់ ធ្វើការហួសកម្លាំង ជំងឺតម្កាត់ និងការបង្អត់ស្បៀងអាហារ។
ជនជាប់ចោទ ឌុច ត្រូវគេរំពឹងថា នឹងប្រឈមមុខចំពោះការប្រកាសសាលក្រមរបស់សាលាដំបូងនៃសាលាក្តីខ្មែរក្រហមដែលអាចនឹងសម្រេចផ្តន្ទាទោសឲ្យជាប់ក្នុងពន្ធនាគារអស់មួយជីវិត នៅដើមឆ្នាំ២០១០ខាងមុខនេះ៕