នីតិវិធីសួរដេញដោលអំពីអត្តចរិតរបស់ឌុចត្រូវបានបញ្ចប់
ដោយ ឡេង ម៉ាលី
2009-09-17
ចៅក្រមជំនុំជម្រះរបស់សាលាក្តីខ្មែរក្រហម បានប្រកាសថា នីតិវិធីសួរដេញដោលអំពីអត្តចរិតរបស់ជនជាប់ចោទ ឈ្មោះ កាំង ហ្កេកអ៊ាវ ហៅ ឌុច បានបញ្ចប់ហើយ។
រូប កាំង ហ្កេកអ៊ាវ ហៅ ឌុច ថតចេញពីរូបភាពវីដេអូផ្សាយផ្ទាល់ឲ្យអ្នកកាសែតទស្សនា នាថ្ងៃទី២៣ មេសា ២០០៩។
ការបញ្ចប់នេះបានប្រកាសឡើងដោយលោក និល ណុន ប្រធានចៅក្រមជំនុំជម្រះសាលាដំបូងនៃសាលាក្តីខ្មែរក្រហម កាលពីព្រឹកថ្ងៃពុធ ទី១៦ ខែកញ្ញា ឆ្នាំ២០០៩ បន្ទាប់ពីបានពិភាក្សាដេញដោលគ្នាអស់រយៈពេលពីរសប្តាហ៍អំពីអត្តចរិតរបស់ជនជាប់ចោទ កាំង ហ្កេកអ៊ាវ ហៅ ឌុច។
លោក និល ណុន ថ្លែងដូច្នេះថា ៖ «ដំណើរការនៃកិច្ចពិភាក្សាដេញដោលអំពីអត្តចរិតរបស់ជនជាប់ចោទ ឃើញថាដល់ទីបញ្ចប់ហើយ»។
ការពិភាក្សាដេញដោលគ្នាក្នុងរយៈពេលពីរសប្តាហ៍កន្លងមក បានផ្តោតទៅលើសក្ខីកម្មនានា ផ្តល់ដោយសាក្សីនិងអ្នកជំនាញជាច្រើនរូប ដែលបានស្គាល់និងសិក្សាអំពីជនជាប់ចោទ កាំង ហ្កេកអ៊ាវ ហៅ ឌុច កន្លងមក។
សាក្សីដែលឡើងមកផ្តល់សក្ខីកម្មអំពីអត្តចរិតរបស់ជនជាប់ចោទ កាំង ហ្កេកអ៊ាវ ហៅ ឌុច មានជាអាទិ៍មិត្តភក្តិ កូនសិស្សរបស់ជនជាប់ចោទ គ្រូពេទ្យ អ្នកចិត្តសាស្រ្ត និងអ្នកជំនាញខាងផ្នែកច្បាប់ផងដែរ។
ទាក់ទងនឹងសវនាការលើសំណុំរឿងក្តីលេខ០០១ របស់ជនជាប់ចោទ កាំង ហ្កេកអ៊ាវ ហៅ ឌុច រហូតមកដល់ការបញ្ចប់លើនីតិវិធីសួរដេញដោលអំពីអត្តចរិតជនជាប់ចោទនេះ ត្រូវលោក Knut Rosendhaug អនុប្រធានរដ្ឋបាលនៃសាលាក្តីខ្មែរក្រហមថ្លែងប្រាប់អ្នកកាសែតនៅក្នុងសន្និសីទសារព័ត៌មានកាលពីថ្ងៃពុធ ទី១៦ ខែកញ្ញា ឆ្នាំ២០០៩នេះ ថាជាការឈានជិតដល់ទីបញ្ចប់សំណុំរឿងនេះហើយ ដោយលោកថ្លែងដូច្នេះ ៖ «ដូច្នេះខ្ញុំចង់ជម្រាបថា ឥឡូវនេះយើងកំពុងតែធ្វើដំណើរកៀកទៅរកការបញ្ចប់នូវសំណុំរឿង ០០១ ហើយ»។
ការជំនុំជម្រះលើសំណុំរឿងក្តីឧក្រិដ្ឋកម្មរបស់អតីតប្រធានគុកទួលស្លែង ឈ្មោះ កាំង ហ្កេកអ៊ាវ ហៅ ឌុច ត្រូវមន្រ្តីកិច្ចការសាធារណៈនៃសាលាក្តីខ្មែរក្រហម ប្រកាសឲ្យដឹងក្នុងពេលថ្មីៗ ថា អាចនឹងត្រូវបញ្ចប់នៅក្នុងខែវិច្ឆិកា ឆ្នាំ២០០៩នេះ។
ចំណែកឯថវិកាសម្រាប់ទ្រទ្រង់ដំណើរការសាលាក្តីនេះ ក៏នឹងត្រូវអស់នៅចុងឆ្នាំនេះដែរ។ ទាំងលោក ក្រាញ់ តូនី ប្រធានរដ្ឋបាលស្តីទី និងលោក Knut Rosendhaug អនុប្រធានរដ្ឋបាល ថ្លែងថា គម្រោងថវិកាថ្មីសម្រាប់ឆ្នាំ២០១០ និង២០១១ កំពុងតែរៀបចំដើម្បីដាក់ជូនក្រុមប្រទេស ដែលចាប់អារម្មណ៍និងសាលាក្តីខ្មែរក្រហមនេះនៅទីក្រុងញូវយ៉ក សហរដ្ឋអាមេរិក។ ក៏ប៉ុន្តែនៅពេលជម្រាបសួរថា តើគម្រោងថវិកាសម្រាប់ឆ្នាំ២០១០ និង២០១១នោះ មានទំហំទឹកប្រាក់ប៉ុណ្ណា លោក Knut Rosendhaug ថ្លែងថា លោកមិនទាន់អាចផ្ដល់ចំនួនជាក់លាក់បានទេនៅពេលនេះ៕
អត្ថបទដែលទាក់ទង
- អ្នកឃ្លាំមើល៖ ការជ្រៀតជ្រែករបស់រដ្ឋាភិបាលជាការគំរាមដល់តុលាការខ្មែរក្រហម
- រឿងក្ដីឌុចជិតដល់ទីបញ្ចប់ខណៈជនរងគ្រោះឃើញពន្លឺយុត្តិធម៌តិចនៅឡើយ
- ឌុចព្រួយបារម្ភចំពោះការប្រឈមមុខនឹងការកាត់សេចក្ដីចុងក្រោយ
- សង្គមស៊ីវិលផ្សព្វផ្សាយការយល់ដឹងពីសាលាក្ដីខ្មែរក្រហមនៅស្វាយរៀង
- មន្រ្តីនៃសាលាក្ដីខ្មែរក្រហមអំពាវនាវឲ្យជនរងគ្រោះដាក់ពាក្យបណ្ដឹងឲ្យបានឆាប់
